تەمىرحاننىڭ تاۋەلسىزدىككە تارتۋى

تەمىرحان مومبەك ۇلىن بى­لاي­عى جۇرت جازۋشى-جۋرناليست رەتىندە تانيدى. ۇزاق جىلدار بويى قازاق راديوسىندا قىزمەت ىستەدى. ول دايىنداعان جۇزدەگەن حابارلار بۇگىندە راديونىڭ التىن قو­رىنا ەنگەن. شىعارماشىلىعى دا ءبىر توبە. بۇل كىسىنىڭ وسى ۋا­قىت­قا دەيىن شىققان ون ءتورت كىتابى وقىرمانىمەن جۇزدەسىپ ۇلگەردى. جازۋشىنىڭ تاعى ءبىر قىرى بار. ول – ۆەلوسيپەدپەن ەل ارا­لاي­دى. مارافونعا شىعادى. الىس جول­داردى اۋىرسىنباي, ەل ارا­سىن­داعى ادامدارمەن ديدار­لا­سىپ, حابارلار جاسايدى. وسىعان دەيىن تالاي جەردى ارالادى. ەندىگى ساپارىن قىزىلوردا – استانا اراسىنا ار­ناپتى. بۇرناعى كۇنى ۆەلوشا­بان­دوزدى جەرلەستەرى قى­زىلوردادان شى­عارىپ سالدى. قا­نا­تىن قوم­دا­عان قىرانداي بولعان جازۋشى جەزقازعان تاسجولىنا ءتۇسىپ كەتتى. تەمىرحان مومبەك ۇلى بۇل سا­پارىن ەل تاۋەلسىزدىگىنىڭ 20 جىل­دىعىنا ارناپ وتىر. ساپاردىڭ قى­زىلوردادان باستاۋ الۋى دا زاڭدى. ويتكەنى, اقمەشىت – الاش­تىڭ اس­تاناسى بولعان قالا. بۇرىنعى استانا مەن قازىرگى ەل­دوردانىڭ اراسىن جازۋشى وسى­لاي ءبىر جالعاماق نيەتتە ەكەن. اس­تانا مەن قىزىلوردانىڭ ارا­سى 1200 شاقىرىم جولدى قۇراي­دى. وسى ارالىقتى جازۋشى 20 كۇندە ءجۇرىپ وتپەك نيەتتە. – ەكى استانانىڭ اراسىنا جول­عا شىعۋ مەن ءۇشىن باقىت. وسىعان دەيىن تالاي جەرگە ساپار شەكتىم. دەگەنمەن, بۇل جولعىسىنىڭ ءجونى بولەك. ويتكەنى, مارافون تاۋەل­سىز­دىكتىڭ 20 جىلدىعىنا ارنالىپ وتىر. بۇل – مەنىڭ مەرەيلى مە­رەي­تويعا تارتۋىم. ودان بولەك, ەلبا­سى نۇرسۇلتان نازارباەۆ ءار ءسو­زىندە سالاماتتى ءومىر سالتىن نا­سيحاتتايدى. وسى ارەكەتىم ارقى­لى جاستاردى سالاماتتىلىققا شا­قىرىپ, جول نۇسقاۋدى دا نيەت ەتىپ وتىرمىن. اللا ءساتىن سالسا, 20 كۇندە ەلورداعا بارىپ توقتا­ماق­پىن. جولدا كەزدەسكەن قيىن­شىلىقتار مەن قىزىقتار تۋرالى دا جازۋ ويدا بار دۇنيە, – دەيدى تەمىرحان مومبەك ۇلى. قىزىلوردالىقتار مارافون­شى جەرلەستەرىن ءسان-سالتانا­تى­مەن شىعارىپ سالدى. وبلىس اكى­مى­نىڭ كەڭەسشىسى ەرجان ءۋايىس قۇت­تىقتاۋ ءسوز سويلەدى. ال جاڭا­قور­عان اۋدانىنىڭ تۋماسى پاحارەددين سادىقوۆ ءوزى اعاشتان ويىپ جاساعان «قورقىت-قوبىز» كومپو­زي­تسياسىن مارافونشىعا تابىس­تاپ, استانادا ەلباسى مۇرا­جاي­ى­نا جەتكىزۋدى اماناتتادى. قالام­گەردىڭ بۇل ىسىنە جاستار دا قىزىعا قارادى. ونىڭ جانكەشتىلىگىنە ءتان­تى بولىپ, قىزۋ قولداۋ ءبىلدىردى. جازۋشى سولايشا جولعا شىقتى. ەندى ول ەلورداعا جەتىپ قانا ەنتىگىن باسپاق. ەرجان بايتىلەس, قىزىلوردا.