مۇددەلەستىكتەن – ارىپتەستىككە

مەملەكەت باسشىسى نۇر­سۇلتان نازارباەۆ قازاق­ستان­عا رەسمي ساپارمەن كەلگەن پاكستان يسلام رەسپۋبلي­كا­سى­نىڭ پرەمەر-ءمينيسترى سايەد يۋسۋف رەزا گيلانيمەن كەزدەستى, دەپ حابارلادى قا­زاق­ستان رەسپۋبليكاسى پرە­زي­دەنتىنىڭ ءباسپاسوز قىزمەتى. اقوردادا وتكەن كەزدەسۋدىڭ رەس­مي راسىمىنەن كەيىن كەلىس­سوز­دەر جۇرگىزىلدى. قازاقستان پرەزيدەنتى نۇرسۇلتان نازارباەۆ پەن پاكستان يسلام رەسپۋبليكاسى­نىڭ پرەمەر-ءمينيسترى سايەد يۋسۋف رەزا گيلاني حالىقارالىق جانە ايماقتىق ۇيىمدارداعى ەكى­جاقتى ءوزارا ءىس-قيمىل مەن ىنتى­ماقتاستىقتىڭ وزەكتى ماسەلەلەرىن تالقىلادى. – مەن سىزبەن قازاقستاندا كەزدەسىپ تۇرعانىما وتە قۋانىش­تى­مىن. بۇل – ءسىزدىڭ ءبىرىنشى ساپا­رى­ڭىز. ءبىز تاۋەلسىزدىكتىڭ العاشقى كۇنىنەن باستاپ سىزدەردىڭ ەلدە­رى­ڭىزبەن جاقىن قارىم-قاتىناستار ورناتۋعا ۇمتىلىپ كەلەمىز. مەن ءسىزدىڭ ەلدە ەكى رەت بولدىم. پاكس­تان باسشىلىعى دا ءبىزدىڭ ەلىمىزدە بولدى. ءبىزدىڭ ەلدەرىمىز اراسىندا حالىقارالىق قۇجاتتار پاكەتى, ۋاعدالاستىقتار, كەلىسىمدەر بار. ءبىزدىڭ ءوزارا ءىس-قيمىلدارىمىزدى ودان ءارى دامىتۋدىڭ جولدارىن تالداپ, نىعايتۋ جانە بەلگىلەۋ ءۇشىن ءسىزدىڭ ساپارىڭىز قازىر ءبىز ءۇشىن وتە ماڭىزدى. الەم شىن مانىندە وزگەرىستەرگە تولى, ءبىزدىڭ ايماققا زور كوڭىل ءبولىنىپ وتىر­عانى بايقالادى. ءبىز بۇل ايماقتا بەيبىت جاعدايدا تاريحي ءومىر ءسۇ­رىپ جاتىرمىز, بۇل ساۋدا ءۇشىن, كوپتەگەن ومىرلىك ماسەلەلەردى بىرلەسىپ شەشۋ ءۇشىن ءتيىمدى, دەدى مەملەكەت باسشىسى. – پرەزيدەنت مىرزا, سىزدەردىڭ اسەم استانالارىڭىزدا ماعان جانە مەن باستاپ كەلگەن دەلەگا­تسيا­عا كور­سەتىلگەن جىلى شىراي­لى قا­بىل­داۋلارىڭىز ءۇشىن ۇلكەن راحمەت. استانا اۋەجايىنا كەلىپ قون­عا­نىمىزدا, مەن ەلوردالا­رى­ڭىز­دىڭ اينالاسىندا سوزىلىپ جات­قان بيداي دالاسىن كوردىم. بۇل كورىنىس ماعان قاتتى اسەر ەتتى. پاكستاندا دا بيداي وسىرىلەدى. بۇگىن قازاق­ستان­نىڭ پرەمەر-مي­نيسترىمەن كەزدەسۋ كەزىندە مەن بيدايدىڭ ءونىم­دىلىگىن ارتتىرۋ ءۇشىن زەرتتەۋلەر جۇرگىزىپ, بيداي ءوسىرۋ جونىندە ەكى ەل اراسىندا عىلىمي-وندىرىستىك تاجىريبە ال­ما­سۋدى ۇسىندىم, دەدى سايەد يۋسۋف رەزا گيلاني. كەزدەسۋ بارىسىندا اۋعان­ستان, ماگريب ايماعى مەن تاياۋ شىعىستاعى جاعدايلار تۋرالى پىكىر الماسىلدى. يادرولىق قارۋ­سىزدانۋ ماسەلەسى, ايماقتىق «كۇن تارتىبىندەگى» وزەكتى ماسەلەلەر, ونىڭ ىشىندە قاۋىپسىزدىكتى قامتا­ما­سىز ەتۋ سالاسىنداعى ماسەلە­لەر تالقىلاندى. لاڭكەستىكپەن جانە ەكسترەميزممەن كۇرەستە قۇ­زىر­لى ورگانداردىڭ ءوزارا ءىس-قي­مىلى قاجەتتىگىنە ەرەكشە نازار اۋدارىلدى. اۋىل شارۋاشىلىعى سالاسىندا جانە اۋىل شارۋا­شى­لىعى ونىمدەرىن وڭدەۋ جونىندە بىرلەسكەن وندىرىستەر قۇرۋ تۋرالى پەرسپەكتيۆالىق جوبالار بار. قازاقستان ءداندى داقىلداردىڭ ءىرى ءوندىرۋشىسى رەتىندە اتالعان ءونىمدى پاكستانعا تاسىمالداۋشى بولۋى مۇمكىن. پاكستان قازاقستاندىق تاۋارلاردىڭ ءترانزيتى ءۇشىن تەڭىز ايلاعىن ۇسىنۋعا دايىن. بۇل قا­زاقستاننىڭ ەكسپورتتىق ونىمدە­رىن الەمدىك رىنوكقا شىعارۋعا مۇمكىندىكتەر تۋعىزادى. ساۋدا-ەكونوميكالىق بايلانىستاردى كە­ڭەيتۋگە قوسىمشا سەرپىن بەرۋ ءۇشىن تەمىر جول مەن اۆتوكولىك ءدالىزى پايدالانىلاتىن بولادى. پاكستاندىق ينۆەستورلارعا قا­زاق­ستاننىڭ ۇدەمەلى يندۋس­تريا­لىق-يننوۆاتسيالىق دامۋ باعدار­لا­ماسىنا قاتىسۋ تۋرالى ۇسى­نىستار جاسالدى. وسى ورايدا پاكستاننىڭ ىسكەر توپتارى ءۇشىن قازاقستاندىق رىنوك پەن كەدەن وداعىنا مۇشە رەسەي مەن بەلا­رۋس­تىڭ رىنوك الەۋەتى اشىق.