بيزنەس الەۋمەتتىك سالالارعا قارجى سالا باستادى

بيزنەس سۋبەكتىلەرىنىڭ ءبىلىم بەرۋ سالاسىنا سالعان قارجىسى ءبىر جىلدا 37,9% وسسە, دەنساۋلىق ساقتاۋ مەن الەۋمەتتىك قىزمەت سالاسىنا سالعان ينۆەستيتسياسى 7,2% ۇلعايعان. 2016 جىلى ءبىلىم بەرۋ سالاسىنا سالىنعان ينۆەستيتسيا 219,3 ملرد تەڭگەنى قۇرادى. 2015 جىلعى كورسەتكىش تە وسىنداي بولعان. ال 2014 جىلى ينۆەستيتسيا كولەمى 229,4 ملرد تەڭگە بولدى. 2013 جىلعىمەن سالىستىرعاندا بۇل 58,4% ارتىق, دەپ جازادى ranking.kz. سوڭعى بىرنەشە جىلدا كاسىپكەرلەردىڭ الەۋمەتتىك سالاعا قارجى سالۋىنا تۇرتكى بولعان فاكتور مەملەكەتتىك-جەكە مەنشىك سەرىكتەستىك باعدارلاماسىنىڭ قولعا الىنۋى. تيىسىنشە, مەملەكەتتىك سەكتور الەۋمەتتىك سالاعا قۇياتىن تىكەلەي ينۆەستيتسياسىن 2015 جىلى 13,1% ازايتسا, 2016 جىل 16,9% قىسقارتتى. ال كاسىپورىنداردىڭ وزىندىك قاراجاتى 2014 جىلى 2,2 ەسە, 2015 جىلى 22,9 پايىز, ال 2016 جىلى 37,9 پايىز كوبەيدى. 2016 جىل قورىتىندىسى بويىنشا, بيزنەستىڭ ءبىلىم بەرۋ سالاسىنا سالعان قاراجاتى جالپى ينۆەستيتسيانىڭ شامامەن 42%-ىن قۇراسا, 2015 جىلى بۇل كورسەتكىش 30,2%, 2014 جىلى 23,5%, 2013 جىلى 17,2%-دى قۇراعان. وڭىرلەر بويىنشا ەڭ كوپ ينۆەستيتسيا استانا قالاسىنا تيەسىلى. ەلورداداعى ينۆەستيتسيا كولەمى 67,1 ملرد تەڭگە, بۇل رەسپۋبليكا بويىنشا سالىنعان قاراجاتتىڭ 30,6%-ىن قۇرايدى. استاناداعى ەڭ ءىرى ينۆەستيتسيا نەگىزىنەن نازارباەۆ ۋنيۆەرسيتەتىنە تيەسىلى. سونىمەن قاتار, العاشقى ۇشتىكتە 38,8 ملرد تەڭگەمەن (17,7%) الماتى وبلىسى جانە 33 ملرد تەڭگەمەن وقو بار. ال دەنساۋلىق ساقتاۋ سالاسىنا كەلەر بولساق, سالاعا سالىنعان مەملەكەتتىك جانە جەرگىلىكتى بيۋدجەت ينۆەستيتسياسى بىر جىلدا 30,1% قىسقاردى. كەرىسىنشە, بيزنەستىڭ وزىندىك قاراجاتى 2016 جىلى 7,2% ۇلعايىپ, 23,5 ملرد تەڭگە بولدى. 2015 جىلى بۇل كورسەتكىش 5% بولعان ەدى. ال 2014 جىلى 2013-پەن سالىستىرعاندا بىردەن 67,6% كوبەيگەن بولاتىن. جالپى, 2016 جىلى دەنساۋلىق ساقتاۋ جانە الەۋمەتتىك قىزمەت كورسەتۋ سالاسىنا سالىنعان قاراجات 62,8% ءوسىمدى كورسەتتى. دەگەنمەن, بۇل 2015 جىلعىمەن سالىستىرعاندا 20,2% از. سونىڭ ىشىندە 37,5% كاسىپكەرلەردىڭ وزىندىك قارجىسى. وڭىرلەر بويىنشا دەنساۋلىق ساقتاۋ سالاسىنا ەڭ كوپ قارجى سالعان كاسىپكەرلەر الماتى وبلىسىندا (8,3 ملرد تەڭگە, رەسپۋبليكا بويىنشا سالىنعان ينۆەستيتسيانىڭ 13,3%-ىن قۇرايدى). سونىمەن قاتار العاشقى ۇشتىكتە استانا قالاسى (78 ملرد تەڭگە) مەن الماتى قالاسى (7,3 ملرد تەڭگە).