وتكەن جىلدىڭ ءبىرىنشى جارتىسىندا وبلىستىق پروكۋراتۋراعا تەرگەۋشىلەردىڭ ازاپتاعانى تۋرالى 28 ارىز تۇسسە, ەكىنشى جارتىسىندا 4 ارىز تۇسكەن, ول دا تەرگەۋ ناتيجەلەرى وىنشا راستالماعان. بۇل تۋرالى وبلىستىق پروكۋراتۋرانىڭ جىل قورىتىندىسى بويىنشا وتكەن القا ماجىلىسىندە ايتىلدى.
مۇنداي ناتيجەگە وبلىستىق پروكۋراتۋرا «ازاپتاۋعا جول بەرمەيمىز» جوباسىن جۇزەگە اسىرۋ ارقىلى قول جەتكىزدى. 2012-2014 جىلدارى بۇۇ كوميتەتىنىڭ شەشىمدەرى بويىنشا وبلىستىڭ ەكى تۇرعىنى 2007-2008 جىلدارى جاسالعان ازاپتاۋ قۇرباندارى بولىپ تانىلعان ەدى. سونداي-اق ازاپتاۋعا بايلانىستى ارىزدار سانى 2015 جىلى 63-كە دەيىن جەتكەن بولاتىن.
وبلىستىق پروكۋراتۋرا «ازاپتاۋعا جول بەرمەيمىز» اتتى جوباسىن وتكەن جىلدىڭ ەكىنشى جارتىسىندا جۇزەگە اسىرا باستادى. جوبا اياسىندا تەرگەۋ ورىندارىندا 337 بەينە كامەرا ورناتىلدى, ىشكى ىستەر باسقارماسىندا 83 بەينەقۇرىلعى پروكۋرورلارمەن ونلاين قاراۋ قىزمەتىنە قوسىلدى. جەتكىزىلگەن ادامدارمەن ساۋالناما تولتىرۋ تاجىريبەگە ەنگىزىلدى, ۋچاسكەلىك ينسپەكتورلار بەكەتتەرىندە پروكۋراتۋرا جاشىكتەرى قويىلدى. تۇزەۋ مەكەمەلەرىندە ەتاپتاردى قابىلداعاندا پروكۋروردىڭ مىندەتتى تۇردە قاتىسۋى, بەينە جازبا جۇرگىزۋ قامتاماسىز ەتىلدى جانە ءاربىر سوتتالعان ادام كەم دەگەندە توقسانىنا ءبىر رەت جەكە قابىلداۋدا بولادى.وسىنداي شارالار ارقىلى پروكۋرورلىق باقىلاۋدى نىعايتۋ مۇمكىن بولدى.
ءنازيرا جارىمبەتوۆا, «ەگەمەن قازاقستان»
