2017 جىلدىڭ قاڭتارىندا جەرگىلىكتى اتقارۋشى ورگاندارمەن 210 جۇمىس بەرۋشىگە شەتەلدىك جۇمىس كۇشىن تارتۋ ءۇشىن 480 رۇقسات بەرىلدى, ءوز كەزەگىندە جۇمىس بەرۋشىلەرمەن 182,8 ملن. تەڭگە مولشەرىندە سالىق الىمدارى تولەندى, دەپ حابارلايدى قر ەڭبەك جانە حالىقتى الەۋمەتتىك قورعاۋ مينيسترلىگى.
رۇقسات بەرۋ بويىنشا مەملەكەتتىك قىزمەت تىكەلەي جەرگىلىكتى اتقارۋشى ورگاندارمەن قوسا «ەلەكتروندىق ۇكىمەت» پورتالىنىڭ «بىرىڭعاي تەرەزە» ءپرينتسيپى ارقىلىدا جۇزەگە اسىرىلادى.
ەسكە سالا كەتەيىك, 2017 جىلدىڭ 1 قاڭتارىنان باستاپ قازاقستان رەسپۋبليكاسىنا شەتەلدىك جۇمىس كۇشىن تارتۋدىڭ جاڭا جەڭىلدەتىلگەن ءتارتىبىنىڭ ەنگىزىلۋىنە بايلانىستى جۇمىس رۇقساتتارىن بەرۋ مەرزىمى قىسقارتىلدى جانە جۇمىس بەرۋشىلەرگە قاتىستى ەرەكشە جاعدايلاردى ورىنداۋ, ىشكى ەڭبەك نارىعىندا ىزدەۋ جۇرگىزۋ جانە شەتەلدىك جۇمىسشىلارعا كەپىلدىك جارنا ەنگىزۋ بويىنشا اكىمشىلىك تالاپتار جويىلدى.
وسى ەرەكشە شارتتاردىڭ ورنىنا جۇمىس بەرۋشى جەرگىلىكتى بيۋدجەتكە تولەيتىن جاڭا سالىق الىمى ەنگىزىلدى. الىم مولشەرلەمەسى شەتەلدىك جۇمىس كۇشىنىڭ ساناتى مەن سالاسىنا قاراي 137 اەك-دەن 250 اەك-گە دەيىنگى شامادا بەلگىلەنەدى, بۇل 290 مىڭ مەن 530 مىڭ تەڭگە ارالىعى.
بۇل رەتتە جۇمىس بەرۋشىلەرگە قويىلاتىن كادرلارعا جەرگىلىكتى قامتىلىم جونىندەگى شارتتاردى ساقتاۋ تالاپتارى وزگەرمەيدى, ياعني: باسشىلار مەن ولاردىڭ ورىنباسارلارى بويىنشا كەمىندە 70 %, ماماندار مەن بىلىكتى جۇمىسشىلار بويىنشا كەمىندە 90 %.
