بيزنەس كەشەندى اتتەستاتسيادان زور ءۇمىت كۇتىپ وتىر

كاسىپكەرلەردىڭ ەڭ كوپ شاعىمداناتىن جانە قۇقىق قورعاۋ باعىتى اياسىندا ەڭ ءجيى تۇسەتىن وتىنىشتەر جەر قاتىناستارى, ساۋلەت جانە قۇرىلىس, مەملەكەتتىك ساتىپ الۋعا بايلانىستى, دەپ جازادى abctv.kz. «وبلىستىق كاسىپكەرلەر پالاتاسى جۇرگىزگەن ساراپتاما قورىتىندىسى بويىنشا, كاسىپكەرلەردىڭ ەڭ كوپ شاعىمداناتىن جانە قۇقىق قورعاۋ باعىتى اياسىندا ەڭ ءجيى تۇسەتىن وتىنىشتەر جەر قاتىناستارى, ساۋلەت جانە قۇرىلىس, مەملەكەتتىك ساتىپ الۋعا بايلانىستى. بۇعان تەك زاڭداعى ولقىلىقتار عانا ەمەس, كوپ جاعدايدا باسقارما نە ءبولىم ماماندارىنىڭ سالا بويىنشا حابارسىز بولىپ شىعۋى,  ءنورماتيۆتى-قۇقىقتىق اكتىلەردى بىلمەۋىنەن نەمەسە ادەپ كودەكسىن ساقتاماۋىنان تۋىنداپ جاتادى. قاعازباستىلىقتىڭ, جەمقورلىقتىڭ پايدا بولۋى دا وسىدان», – دەيدى الماتى وبلىستىق كاسىپكەرلەر پالاتاسىنىڭ ديرەكتورى ءلاززات شىڭعىسباەۆا. بيىل الماتى وبلىسى بويىنشا 7 مىڭنان استام مەملەكەتتىك قىزمەتشى تەست تاپسىرادى. ءبىلىمى مەن بىلىكتىلىگى ساراپقا تۇسەتىن سىناق جايى پرەزيدەنتتىڭ «ۇلت جوسپارىنداعى» باسىم باعىتتارىنىڭ ءبىرى – كاسىبي مەملەكەتتىك اپپاراتتى قۇرۋ باستاماسىندا ايتىلعان بولاتىن. سىناق تەك مەملەكەتتىك قىزمەتشىلەر ءۇشىن ماڭىزدى عانا ەمەس, مەملەكەتتىك قىزمەت تۇرلەرىن الۋشىلار ءۇشىن دە وزەكتى. ويتكەنى, كاسىپكەرلەردىڭ كۇندەلىكتى جۇمىسى جەرگىلىكتى اتقارۋشى بيلىكپەن, مەملەكەتتىك ورگاندارمەن تىعىز بايلانىستى. كاسىپتى اشۋ, كەڭەيتۋ, ءتىپتى جابۋ ءۇشىن دە رۇقسات قاعازدار, ءتيىستى قۇجاتتار مەملەكەتتىك ورگانداردان الىنادى. ولاردىڭ كاسىبيلىگى ساۋالدىڭ تەز ارادا, وڭ ناتيجەمەن شەشىلۋىنە ىقپال ەتەدى. مەملەكەت باسشىسىنىڭ بيىل جاريالاعان جولداۋىندا تابىستالعان مىندەتتەردى ىسكە اسىرۋدا جەرگىلىكتى اكىمدىكتەردىڭ ورنى مەن بيزنەسكە دەگەن قارىم-قاتىناسى سارالانادى. ءتىپتى, ارنايى رەيتينگ ازىرلەنىپ, اكىمدەر جۇمىسىن باعالاۋدىڭ ءبىر كريتەريى رەتىندە بيزنەسكە كورسەتكەن قولداۋ رەتىندە انىقتاۋ جۇكتەلدى. وسى سەبەپتى جەتىسۋلىقتار مەملەكەتتىك قىزمەتكەرلەرگە ارنالعان كەشەندى اتتەستاتسيا الداعى ۋاقىتتا كاسىبي, ساۋاتتى اپپاراتتىڭ قۇرىلۋىنا سەپتىگىن تيگىزەدى دەگەن ويدا.