ستانيمير ستويلوۆ «استانادان» كەتۋى مۇمكىن

بولگاريالىق «لەۆسكي» كلۋبىنىڭ باسشىسى سپاس رۋسەۆ كەلەسى جىلى كومانداسىنا «استانا» كلۋبىنىڭ باس جاتتىقتىرۋشىسى ستانيمير ستويلوۆتى شاقىرۋعا نيەتتەنىپ وتىر. بۇل تۋرالى ول Sportal.bg پورتالىنا بەرگەن سۇحباتىندا مالىمدەدى, دەپ حابارلادى vesti.kz. «راسىندا, ءبىز ستويلوۆتى كومانداعا شاقىرۋعا نيەتتىمىز. بىراق, بۇل ءىستى بيىل ەمەس, كەلەر جىلى جۇزەگە اسىرۋعا تىرىسىپ كورەمىن. ءوز باسىم بۇرىنعى باپكەرىمىز ليۋبكو پەتروۆيچتىڭ ۇجىمنان كەتكەنىن قالاعان جوقپىن. كەرىسىنشە, ونىڭ ماۋسىم سوڭىنا دەيىن جۇمىسىن جالعاستىرسا دەپ ەدىم. ۆەنگەر نەمەسە فەرگيۋسون سەكىلدى ماماندار قىزمەت ەتسە ۇلكەن ارمانىمنىڭ ءبىرى ورىندالعان بولار ەدى. ال قازىرگى ەلين توپۋزاكوۆ بىزبەن بىرگە ۇزاق بولادى دەپ ويلامايمىن.», – دەيدى رۋسەۆ سۇحباتىندا. ايتا كەتەيىك, ستانيمير ستويلوۆ 2003-2008 جىلدار ارالىعىندا «لەۆسكي» كومانداسىن جاتتىقتىرعان ەدى. ال «استاناعا» 2014 جىلدان باستاپ جەتەكشىلىك ەتىپ كەلەدى. باپكەردىڭ كەلىسىمشارتى 2017 جىلدىڭ 31 جەلتوقسانىندا اياقتالادى.