مىندەتتى مەديتسينالىق ساقتاندىرۋ تولەمى ازايتىلدى

ۇلتتىق كاسىپكەرلەر پالاتاسى قر ۇلتتىق ەكونوميكا مينيسترلىگىمەن جۇمىس بەرۋشىلەردىڭ مىندەتتى الەۋمەتتىك مەديتسينالىق ساقتاندىرۋ جۇيەسىنە اۋداراتىن تولەمدەرىنىڭ پايىزىن ازايتۋ تۋرالى كەلىسىمگە كەلدى, دەپ جازادى palata.kz. بۇل تۋرالى ۇكپ قىزمەت كورسەتۋ سالاسى دەپارتامەنتىنىڭ ديرەكتورى جاننا وسپانوۆا «كەيبىر زاڭنامالىق اكتىلەرگە دەنساۋلىق ساقتاۋ جانە الەۋمەتتىك-ەڭبەك سالاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋعا ارنالعان قوعامدىق تىڭدالىم بارىسىندا ايتتى. قر ۇكپ وكىلى ۇلتتىق كاسىپكەرلەر پالاتاسى قر دەنساۋلىق ساقتاۋ جانە الەۋمەتتىك دامۋ مينيسترلىگىمەن بىرلەسە وتىرىپ, مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىن ەنگىزۋ بويىنشا اۋقىمدى جۇمىس جۇرگىزگەنىن اتاپ ءوتتى. «كەيبىر زاڭنامالىق اكتىلەرگە دەنساۋلىق ساقتاۋ جانە الەۋمەتتىك-ەڭبەك سالاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ۇكپ-نىڭ قاراۋىنا ەكى مارتە كەلىپ تۇسكەن. وندا قازاقستان رەسپۋبليكاسىنىڭ 18 زاڭى مەن 7 كودەكسىنە وزگەرىستەر مەن  تولىقتىرۋلار ەنگىزۋ قاراستىرىلعان. اتالعان زاڭ جوباسىنىڭ ەرەجەلەرى وتكەن جىلدىڭ ماۋسىم ايىندا جانە تامىز ايىندا ۇلتتىق كاسىپكەرلەر پالاتاسىنىڭ الاڭىندا تالقىلانعان ەدى. وعان دەنساۋلىق ساقتاۋ جانە الەۋمەتتىك دامۋ مينيسترلىگىنىڭ, سالالىق قاۋىمداستىقتاردىڭ, ءىرى جۇمىس بەرۋشىلەردىڭ, بيزنەس-قاۋىمداستىقتىڭ وكىلدەرى مەن قر پارلامەنتى دەپۋتاتتارى قاتىستى. وتكىزىلگەن كەزدەسۋلەردىڭ ناتيجەسى بويىنشا كاسىپكەرلىك قاۋىمداستىعىنىڭ ۇسىنىستارى مەن ەسكەرتپەلەرى ۇلتتىق پالاتانىڭ ساراپتامالىق قورىتىندىسىنا ەنگىزىلدى. «جەلتوقسان ايىندا قر ۇكپ-نىڭ كاسىپكەرلەرگە سالىناتىن سالىقتىق جۇكتەمەنى وڭتايلاندىرۋعا قاتىستى ۇسىنىستارى بويىنشا جۇرگىزىلىپ جاتقان جۇمىسقا قازاقستان رەسپۋبليكاسى ۇلتتىق ەكونوميكا مينيسترلىگى قوسىلدى. ماسەلە مىنادا, مىندەتتى زەينەتاقى جارنالارىن تولەۋ جانە ءمامس جۇيەسىنە اۋدارىم جاساۋ مىندەتتەمەلەرى قاتار ەنگىزىلگەندىكتەن, 2020 جىلعا قاراي جۇمىس بەرۋشىنىڭ دە, جۇمىسشىنىڭ دا ەڭبەكاقى تولەۋ قورىنا جالپى جۇكتەمەسى 50% بولادى, ياعني 2016 جىلمەن سالىستىرعاندا, 14%-عا ارتادى. جۇرگىزىلگەن جۇمىستىڭ باستى جەتىستىگى – جۇمىس بەرۋشىلەردىڭ اۋدارىمدارىنىڭ  %-دىق مولشەرلەمەلەرىن ازايتۋ جونىندەگى ۇلتتىق ەكونوميكا مينيسترلىگىمەن جاسالعان كەلىسىم», – دەپ ەسەپتەيدى جاننا وسپانوۆا. «كەيبىر زاڭنامالىق اكتىلەرگە دەنساۋلىق ساقتاۋ جانە الەۋمەتتىك-ەڭبەك سالاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا سايكەس, جۇمىس بەرۋشىلەردىڭ ءمامس جۇيەسىنە اۋداراتىن تولەمدەرى 2017 جىلى 2%-دان 1%-عا دەيىن, 2018 جىلى 3%-دان 1,5%-عا دەيىن, 2019 جىلى 4%-دان 1,5%-عا دەيىن, 2020-2021 جىلدارى 5%-دان 2%-عا دەيىن, 2022 جىلى 3%- عا دەيىن ازايادى. بۇدان بولەك, دەنساۋلىق ساقتاۋ مينيسترلىگىمەن بىرلەسە وتىرىپ اتقارعان جۇمىس ناتيجەلەرى بويىنشا, بيزنەس-قاۋىمداستىقتىڭ 60-تان استام ۇسىنىسى قارالىپ, ءبىراز ۇسىنىستار ەسكەرىلدى. «مىسالى, قازاقستان رەسپۋبليكاسىنىڭ «مىندەتتى الەۋمەتتىك مەديتسينالىق ساقتاندىرۋ تۋرالى» زاڭىندا ءمامس جۇيەسىندە مەديتسينالىق كومەك الۋ مەرزىمى اۋدارىمداردىڭ سوڭعى تولەمىن تولەگەننەن كەيىن 1 ايدان 3-ايعا دەيىن ارتتى. اۋدارىمدار مەن جارنالار سوماسىن تۇزەتۋ قاجەتتىگى الىنىپ تاستالدى», – دەپ اتاپ ءوتتى ۇكپ دەپارتامەنتىنىڭ ديرەكتورى. جاننا وسپانوۆا اتاپ وتكەندەي, ءمامس جۇيەسىن ءتيىمدى ەنگىزۋ ءۇشىن, بيزنەس-قاۋىمداستىقتىڭ پىكىرىنشە, مىنانداي شارالاردى جۇزەگە اسىرۋ قاجەت: قر پارلامەنتى دەپۋتاتتارىن, قوعامدى, ۇلتتىق پالاتا مەن بيزنەس-قاۋىمداستىقتى تارتا وتىرىپ, تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە مەديتسينالىق كومەك كورسەتۋگە اۋدارىلاتىن قارجى شىعىنىنا اۋديت جۇرگىزۋ. «اۋديت قارجىلىق اعىنداردىڭ مولدىرلىگىن, قارجىنىڭ قانداي ماقساتتارعا جۇمسالىپ جاتقانىن, ولاردى پايدالانۋدىڭ تيىمدىلىگىن كورسەتەدى. سونداي-اق تەگىن مەديتسينالىق كومەكتىڭ كەپىلدىك بەرىلگەن كولەمى, مىندەتتى الەۋمەتتىك مەديتسينالىق ساقتاندىرۋ جانە ەرىكتى مەديتسينالىق ساقتاندىرۋ قىزمەتتەرىن قۇرامداستىرۋ مۇمكىندىكتەرىن ەسكەرە وتىرىپ, مەديتسينالىق قىزمەت كورسەتۋ ساپاسىن جاقسارتۋدىڭ جول كارتاسىن ازىرلەۋ قاجەت. ەمدەلۋشىنىڭ ەلەكتروندى پاسپورتىن ەنگىزۋدى جىلدامداتىپ, 2018 جىلدىڭ 1 قاڭتارىنا دەيىن كوپفۋنكتسيالى اقپاراتتىق جۇيەنى ەنگىزۋىمىز كەرەك. تەگىن مەديتسينالىق كومەكتىڭ كەپىلدىك بەرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ اياسىندا مەديتسينالىق كومەك كورسەتۋ كەزىندە جەكەمەنشىك مەديتسينالىق ۇيىمداردىڭ مەديتسينالىق ۇيىمدار جەلىلەرىن قۇرۋعا قاجەتتى رەسۋرستارىن بارىنشا ەسكەرۋ قاجەت. ال جۇمىسشىلارى اۋرىپ قالعان جاعدايدا, ەرىكتى ساقتاندىرۋ شارتى بويىنشا جۇمىس بەرۋشى تولەيتىن ساقتاندىرۋ سىياقىلارىن جەكە تابىس سالىعى كىرىستەرىنەن الىپ تاستاۋ قاجەت», – دەپ اتاپ ءوتتى ول.