ەلىمىز ءتورتىنشى ونەركاسىپتىك ورلەۋ جولىندا

وتكەن عاسىردىڭ 70-جىلدارى بەلگىلى امەريكالىق فۋتۋ­رولوگ ەلۆين توففلەر ءوزىنىڭ ايگىلى بەستسەللەرى «بولاشاق­تىڭ تاڭ­عاجايىبى» اتتى شىعار­ماسىندا الداعى كومپيۋتەرلىك عاسىردىڭ عالاماتىن قيالمەن سۋرەتتەگەنى بەلگىلى. قالامگەردىڭ ساۋەگەيلىگى تاڭعالارلىقتاي كورەگەندىلىك ەكەنىنە بۇگىندە كوزىمىز جەتۋدە. قازىرگى ۋاقىتتا ومىرىمىزدە ەلەك­تروندىق قۇرالداردىڭ تورىمىزگە ەنىپ, تورەلىك ەتۋى وسىعان ايقىن دالەل بولماق. جاڭعىرۋدىڭ قازىرگى ءداۋى­رى الەمدىك ەكونوميكانى جاھان­دىق دەڭگەيدە تسيفرلاندىرۋ­دى كوزدەيتىن ءتورتىنشى ونەركاسىپتىك رەۆوليۋتسيانى باستان وتكەرۋدە. سوندىقتان, اۋىسپالى تەحنو­لو­گيالىق تۇرمىس سالتى تۇسىندا قول­­دا بار رەزەرۆتەرگە نەعۇرلىم ءۇمىت ارتۋ, بەينەلەپ ايتقاندا, كەل­­مەس­كە كەرى كەتۋمەن تەڭ بول­ماق. ەل پرەزيدەنتى نۇرسۇلتان نازارباەۆتىڭ «قازاقستاننىڭ ءۇشىن­شى جاڭعىرۋى: جاھاندىق باسە­كەگە قابىلەتتىلىك» اتتى جاڭا جولداۋىن پراكتيكالىق شەشىم­دەردىڭ ارسەنالىنا ارقاسۇيەي وتىرىپ, اكادەميالىق باستاۋلارمەن ۇيلەسىمدى ۇندەسەتىن جاڭا ۇلگىدەگى قۇجاتتاردىڭ قاتارىنا ەنگىزۋگە بولادى. حالىق مەملەكەت باسشى­سى­نىڭ جاڭا جولداۋىن شىنايى تاعاتسىزدىقپەن كۇتەتىنى قۇپيا ەمەس. قوعام ءاربىر جولداۋدان بار­شامىزدى تولعاندىراتىن كوكەي­كەستى ماسەلەلەرگە جاۋاپتار ءىز­دەيدى. پرەزيدەنت ءاردايىم قازاق­ستان­دىقتاردىڭ ساۋالىن قانا­عات­­تاندىراتىن بىرەگەي ءارى ءدال جاۋاپ­تار تاۋىپ كەلەدى. ەگەر ماسە­لەنىڭ شەشىمى كەيىنگە قال­دى­رىلعان جاعدايدا, ءتيىستى مەر­زىم­­نىڭ وزگەرۋ سەبەپتەرىن تۇ­جى­­رىم­دى جانە ناقتى تۇردە ءتۇسىن­دىرەدى. 2017 جىلعى جولداۋ – تەو­ريا­لىق-پراكتيكالىق تۇردە سالماق­تالعان جوعارى دەڭگەيدەگى قۇجات. وندا قازاقستان جولىنىڭ مازمۇندى قۇرامداسى: جاڭعىرۋ ۇشتىگىنىڭ قىسقاشا تۇسىندىرمەسى بەرىلەدى. دالىرەك ايتساق,  ءبىرىنشى جاڭعىرۋ – الەم كارتاسىندا جاڭا مەملەكەتتىڭ قۇرىلۋى. ەكىنشى جاڭ­عىرۋ – «قازاقستان-2030» سترا­­تەگياسىنىڭ قابىلدانۋى, جا­ڭا ەلوردامىز استانانىڭ سالى­­نۋى. ءۇشىنشى جاڭعىرۋ – ۇلت جوسپارى­نىڭ اياسىندا «قازاق­ستان-2050» ستراتەگياسىن ىسكە اسىرۋ. ەلباسى الەمدەگى ەڭ وزىق 30 ەلدىڭ قاتارىنا كىرۋ ءۇشىن 5 نەگىزگى باسىمدىقتى ايقىندايدى. باسقا باسىمدىقتاردىڭ ءمانىن الاسارتپاستان نازارلارىڭىزدى مىنا ەكەۋىنە ەرەكشە اۋدارىپ كورسەك. ءبىرىنشى – ەكونوميكانىڭ ۇدەمەلى تەحنولوگيالىق جاڭ­عىرۋى جانە ءتورتىنشى – ادامي كاپيتالدىڭ ساپاسىن جاقسارتۋ. مەملەكەت باسشىسى بۇل قۇ­جاتتا دا جان-جاقتى وبەك­تيۆ­تىلىگى مەن بارىنشا اكسيوما­لىعىن كورسەتە وتىرىپ, «اۋەلى – ەكو­­نوميكا, ودان كەيىن ساياسات» دەپ اتالاتىن ءوزىنىڭ ايگىلى قا­­عي­داسىن العا تارتادى. البەتتە, ەكو­­نو­ميكانى تۇبەگەيلى جاڭعىر­تۋسىز باسقا سالالاردىڭ دامۋى تۋرا­لى ءسوز قوزعاۋدىڭ ءوزى ارتىق. ال  وزگەرىستەردىڭ درايۆەرى, ارينە, ادامي كاپيتال بولىپ  تابى­­لادى. ادامي كاپيتالدى ناقتى جاق­­سارتۋدا جاريا ەتىلگەن ماق­سات­تارعا قول جەتكىزۋدىڭ كىلتى جاتىر. بۇعان ءبىز ەكونوميكالىق ءوسۋ­دىڭ جاڭا مودەلىنە وقۋ-ءبىلىمدى ءتۇپ­قازىق ەتىپ بەلگىلەۋ ارقىلى قول جەتكىزەمىز. بارشامىز جاس مەملە­كە­تى­مىزدىڭ شيرەك عاسىرداعى قالىپ­تاسۋى مەن قۇرىلۋىنداعى قازاق­ستاندىقتاردىڭ ءومىر ساپاسىنىڭ مەيلىنشە ارتقانىنىڭ كۋاسى بولىپ كەلەمىز. بۇگىندە ەلىمىزدە حالىقتىڭ ورتاشا ءومىر ءسۇرۋ دەڭگەيى 72 جاستى قۇرايدى. ارينە, ادامنىڭ جاسى ۇلعايعان تۇستا قالىپتى ءومىردى ۇستاپ تۇرۋ ءۇشىن مەديتسينانىڭ كومەگىنە جۇگىنەتىنى بەلگىلى. كەيىنگى كەزدە مەديتسينالىق پرەپاراتتار باعاسىنىڭ وسە تۇسكەنى جاسىرىن ەمەس. سول سەبەپتى, ەمدىك قۇرالداردىڭ باعاسىن رەتتەۋدى ەنگىزۋ قاجەت ەتىلگەن ءارى شەشىمىن كۇتكەن شارا بولىپ تابىلادى. ال زەينەتاقىنى 20 پايىزعا ارتتىرۋ – ەلباسىنىڭ زاماناۋي قۋاتتى قازاقستاندى ءوز قول­دارىمەن جانە زەردە-پاراسا­تىمەن قۇرۋعا كۇش سالعان اعا بۋىنعا دەگەن ۇدايى قامقور­لى­عىنىڭ ايعاعى. ەلىمىزدىڭ ساتىلاپ دامۋىنىڭ كەلەسى ماڭىزدى كورسەتكىشى حالىق­تىڭ ءوسىمى بولىپ تابىلادى. بۇگىندە ءبىزدىڭ حالقىمىز 17,9 ملن ادامدى قۇرايدى. جى­لىنا 400 مىڭنىڭ شاماسىندا نارەستە دۇنيەگە كەلەدى. وسى­لايشا قازاقستاندىقتار ەل پرە­زي­دەنتىنىڭ سىندارلى ساياسا­تىنا قولداۋ كورسەتۋدە. سوندىق­تان مەملەكەت باسشىسى كۇر­دەلى ەكونوميكالىق كەزەڭگە قارا­ماستان, بالا ومىرگە كەلگەندە ءبىر رەتتىك بەرىلەتىن جاردەماقىنىڭ مولشەرىن 20 پايىزعا ءوسىرۋ جونىندە شەشىم قابىلدادى. باستىسى, مەملەكەت باسشى­سى­نىڭ جولداۋى اعىمداعى سان الۋان وزگەرىستەردى تۇسىندىرە وتىرىپ, ومىرلىك تۇجىرىمدارعا قوزعاۋ سالادى جانە ءبىزدى الداعى ءىس-ارەكەتتەرىمىزدىڭ ناقتى كەشەندى باعدارىنا باستايدى. ەلىمىزدىڭ ءۇشىنشى جاڭعىرۋى جونىندەگى «قازاقستاننىڭ ۇلت­تىق تەحنولوگيالىق باستاماسى» اتتى 2025 جىلعا دەيىنگى دامۋدىڭ جاڭا ستراتەگيالىق جوسپارى ۇلى دالا ەلىنىڭ ودان ءارى ورلەۋى مەن وركەندەۋىنە جول اشاتىنىنا سەنىمدىمىز. گۇلشارا ابدىقالىقوۆا, قازاقستان رەسپۋبليكاسىنىڭ مەملەكەتتىك حاتشىسى