قوعامدىق كەلىسىم كەڭەسىنىڭ قاداعالاۋىندا بولادى

تاتۋلىقتىڭ تىرەگىنە, ىنتىماقتاستىقتىڭ ۇيىتقىسىنا اينالعان قازاقستان حالقى اسسامبلەياسى العاشقىلاردىڭ ءبىرى بولىپ جولداۋعا بايلانىستى ۇنقوسۋ ءۇشىن رەسپۋبليكاداعى ەتنومادەني بىرلەستىكتەردىڭ جەتەكشىلەرى, قازاقستان حالقى اسسامبلەياسى كەڭەسىنىڭ مۇشەلەرى الماتىداعى دوستىق ۇيىندە باس قوستى.  ءىس-شاراعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ, قحا توراعاسىنىڭ ورىنباسارى ل.پيتالەنكو, قحا كە­ڭە­سىنىڭ مۇشەلەرى, ەتنومادەني بىرلەستىكتەردىڭ بەلسەندىلەرى, جاس­تار ۇيىمدارى, قحا عى­لى­مي-ساراپتامالىق كەڭەسى مەن زيالىق قاۋىم وكىلدەرى, قحا-نىڭ وزگە دە قۇرىلىمدارىنىڭ باسشىلارى قاتىستى. جيىن بارىسىندا ن.نازارباەۆتىڭ «قازاقستاننىڭ ءۇشىنشى جاڭ­عىرۋى: جاھاندىق باسەكەگە قا­بىلەتتىلىك» اتتى قازاقستان حالقىنا جولداۋى, سونداي-اق, مەملەكەت باسشىسىنىڭ كونس­تي­تۋتسيالىق رەفورماسىنا بايلانىستى ۇسىنىستاردى ازىرلەۋ ماسەلەلەرى تالقىلاندى. مەملەكەت باسشىسىنىڭ ەلىمىزدىڭ جاھاندىق باسەكەگە قابىلەتتىلىگىن قامتاماسىز ەتۋدى, ەكونوميكالىق ءوسىمنىڭ جاڭا مودەلىن قۇرۋدى ماقسات ەتكەن بيىلعى جولداۋىنا وراي ارنايى بايانداما جاساعان ەرالى توعجانوۆ بىرنەشە نەگىزگى باعىتتاردى اتاپ ءوتىپ, ولاردىڭ مازمۇنىنا توقتالدى. بىرىنشىدەن, پرەزيدەنتتىڭ جولداۋى قازاقستاننىڭ ءاربىر ازاماتىنىڭ ءومىر ساپاسىن ارتتىرۋعا ارنالعان.  ەكىنشىدەن, قازاقستاننىڭ ءۇشىنشى جاڭعىرۋى مەملەكەت باسشىسىنىڭ ساياسي-كونستيتۋتسيالىق رەفورماسىنىڭ قيسىندى جالعاسى رەتىندە ەلدى دەموكراتيالاندىرۋ ءۇشىن بەرىك ەكونوميكالىق جانە الەۋمەتتىك نەگىز قۇرايدى. مەملەكەتتىڭ, قوعامنىڭ, قازاقستان حالقىنىڭ جاھاندىق تاريحي اۋقىمدا ەكونوميكالىق جانە ساياسي دامۋىن رەتتەيدى. ۇشىنشىدەن, بۇل جولداۋ – قازاقستاندىق بىرەگەيلىك پەن بىرلىكتىڭ, قوعامدىق كەلىسىم مەن تۇراقتىلىقتىڭ ەكونوميكالىق, الەۋمەتتىك نىعايۋى مەن دامۋىنىڭ الگوريتمى نەمەسە ءتيىمدى جولى. ەرالى توعجانوۆ پرەزيدەنت ايقىنداپ بەرگەن ءۇشىنشى جاڭعىرۋدىڭ نەگىزگى بەس باسىمدىعىنا توقتالدى. ولار: ەكونوميكالىق جەدەلدەتىلگەن تەحنولوگيالىق جاڭعىرۋ, ءداستۇرلى بازالىق سالالاردى دامىتۋعا سەرپىن بەرۋ, ەڭبەك نارىعىن جاڭعىرتۋ, ماكروەكونوميكالىق تۇراقتىلىق, ادامي كاپيتال ساپاسىن جاقسارتۋ, ينستيتۋتتىق وزگەرىستەر, قاۋىپسىزدىك جانە سىبايلاس جەمقورلىقپەن كۇرەس. نەگىزىنەن, بۇل جولداۋدى – ۇلى دالا ەلىنىڭ ەكونوميكالىق, الەۋمەتتىك, تەحنولوگيالىق جانە عىلىمي دامۋىنىڭ ستراتەگيالىق جوسپارى دەۋگە بولادى. ناتيجەلى رەفورما جاساۋ بەلگىلى مەرزىمگە نەمەسە جاريالاۋ ۋاقىتىنا بايلانىستى. ەرتە جاريالانسا, قوعامنىڭ ءتۇسىنۋى قيىن, كەش جاريالانسا, مەملەكەت دامۋىن تەجەيدى. ەلباسىنىڭ ساياسي كورەگەندىگى – وسى ۋاقىت ماسەلەسىن ءدوپ باسىپ, رەفورمانى مەرزىمى پىسكەن كەزدە جاريالاپ وتىر. تاۋەلسىزدىكتىڭ 25 جىلى ىشىندە بۇگىنگى جولداۋ ماقساتتارىنىڭ ىرگەتاسى كەزەڭ-كەزەڭىمەن قۇرالدى. ول, ەڭ الدىمەن, ەلدەگى بىرلىكتىڭ ارقاسىندا جەتكەن جەتىستىكتەر, ءبىلىمدى قوعام – ينتەللەكتۋالدى ۇلت تاربيەلەۋ جانە بولاشاعىنا نىق سەنىمدى ءبىرتۇتاس ۇلت قالىپتاستىرۋ. ەلباسىنىڭ جوعارى تەحنولوگياعا بايلانىستى ايتقان ويىنىڭ تۇبىندە ينتەللەكتۋالدى ۇلتتى قالىپتاستىرۋ ماسەلەسى تۇر. سونداي-اق, اۋىلدىق مەكەندەردى قالا دەڭگەيىنە تەڭەستىرۋ ماسەلەسىن دە قوعامنىڭ ءوزى كولدەنەڭ تارتىپ, كۇن تارتىبىنە شىعاردى. ەلباسى اتاپ كورسەتكەن ماسەلەلەردىڭ ءبارى دە حالىقتىڭ كوڭىلىنەن ورىن تابۋدا. بۇل تۇرعىدا اسسامبلەيا جانىنان قۇرىلعان قوعامدىق كەلىسىم وزىنە ۇلكەن جاۋاپكەرشىلىك جۇكتەيدى. توراعانىڭ ورىنباسارى ەرالى توعجانوۆ پرەزيدەنت بەلگىلەپ بەرگەن جوسپارلى مىندەت پەن تاپسىرمالاردىڭ ءبىرازى تىكەلەي ءار وبلىس, ءار اۋدان, ءتىپتى ءار اۋىلدا قۇرىلاتىن قوعامدىق كەلىسىم كەڭەستەرىنىڭ ارنايى قاراۋىندا, قاداعالاۋىندا بولاتىنىن ايتتى. ايگۇل احانبايقىزى, «ەگەمەن قازاقستان» الماتى