اننا شەۆچەنكو: قوس جۇلدەمدى قازاقستانىما ارنايمىن

قازاقستانعا الماتى ۋنيۆەرسياداسىنىڭ العاشقى جۇلدەسىن شاڭعىشى اننا شەۆچەنكو سىيلادى. جارىستىڭ ءبىرىنشى كۇنىندە كلاسسيكالىق جەكەلەي سىندا قولا جۇلدە ولجالاعان سپورتشى, كەشە ءىز كەسۋ سايىسىندا دا وسى ناتيجەسىن قايتالادى. XXVIII دۇنيەجۇزىلىك قىسقى ۋنيۆەرسيادانىڭ ەكى دۇركىن قولا جۇلدەگەرى اتانعان اننانى از-كەم اڭگىمەگە تارتقان ەدىك. – جۇلدە قۇتتى بولسىن, اننا! ەكى رەت ءۇشىنشى ورىن­مەن شەكتەلدىڭ. ال­تىن الۋعا نە كەدەرگى بولدى؟ – راحمەت! العاشقى كۇن­­گى جارىستا توپ جارۋعا تى­رىس­تىم. وكىنىشكە قاراي, تۇعىر­دىڭ بيىگىن باعىندىرۋ قولىم­نان كەلمەدى. ءدال وسى سىندا جاقسى ونەر كور­سەتىپ, جەڭىسكە جەتۋدى قات­تى قالادىم. سەبەبى, كەلە­سى كۇنگى جارىس ءىز كەسۋ سايى­سى ەدى. مۇندا ءبىرىنشى كۇن­گى دو­دانىڭ ناتيجەسى ما­ڭىز­دى رولگە يە. ءىز كەسۋدە قوس رەسەيلىكتى قۋىپ جەتۋ ءۇشىن بارىمدى سالدىم. ولار العاشقى جارىستىڭ باسىمدىعىنىڭ ارقاسىندا ماعان مۇمكىندىك بەرمەدى. رەسەيلىك شاڭعىشىلار­دىڭ دا قارا جاياۋ ەمەس­تى­گىن ەسكەر­گەن ءجون. مۇن­داي حالىق­­ارالىق جارىسقا مىق­تى­لار عانا كەلەدى عوي. – بالكىم, جارىس بارى­سىندا قاتەلىكتەرگە بوي الدىرعان شىعارسىڭ... – ءيا, قاتەلىكتەر بولدى. 30 قاڭتار كۇنگى جارىس­تىڭ ەكىنشى بولىگىندە بيىك­كە كوتەرىلۋ قيىنعا سوقتى. جىلدام باستاعانىم­مەن, بيىككە شىعار تۇستا ەنتى­گىپ قالدىم. ال ودان كەيىن­گى دودادا كۇن رايى­نىڭ قو­لاي­سىزدىعى كەرى اسەر ەت­تى. سونداي-اق, بيىكتەن قۇل­­دي­لاعان ساتتە قاتەلىك جىبەرىپ الدىم. – جارىستىڭ ەكىنشى كۇنىندە باپكەرلەر ساعان قانداي مىندەت جۇكتەدى؟ – العاشقى سايىستا رە­سەي­لىكتەرگە ەسە جىبەرىپ ال­عان­­­دىقتان, ماعان جۇكتەل­گەن مىندەت ولارعا مەيلىنشە جاقىنداپ, رەتى كەلسە, باسىپ وزۋ ەدى. وكىنىشكە قاراي, بۇل قولىمنان كەلمەدى. – وسىمەن, ەكىنشى ۋني­­­ۆەر­سياداعا قاتىسىپ وتىر­سىڭ. سپورتتىق شە­بەر­لىك تۇرعىسىنان ىلگەرى­لەۋ بار ما؟ – ارينە. ءبىرىنشى  رەت 2013 جىلى يتاليا­­نىڭ ترەن­تينو قالاسىندا ۇيىم­­­داس­تىرىلعان قىسقى ۋني­­ۆەر­­سيادا دا ونەر كور­­­سەت­تىم. ناتيجەم – 19-ورىن. الماتىدا ەكى قو­لا­عا قول جەتكىزدىم. وسى ارا­­لىقتا جاھاندىق جا­رىس­تار­عا قاتىسىپ, مول ءتاجى­ريبە جينادىم. مەنى العا جەتەلەگەن باپكەرىمە العىسىم شەكسىز. سونداي-اق, پاۆلودار وبلىسى­نىڭ اكىمى بولات باقاۋوۆقا ريزا­­­شىلىعىمدى بىلدىرگىم كەلەدى. ول الماتى ۋنيۆەر­سيا­دا­سىنىڭ العاش­قى ءجۇل­دەسىن ۇتىپ العانىم­دا, قوڭى­راۋ شالىپ, قۇتتىق­تادى. ماعان سەنىم ارتقان جانكۇيەرلەرگە دە ريزامىن. قوس جۇلدەمدى تۋعان ەلىم – قازاقستانىما ارنايمىن. – راحمەت. اڭگىمەلەسكەن  فارحات امىرەنوۆ سۋرەتتى تۇسىرگەن ۆلاديمير بۋگاەۆ