ءبىز شىمكەنتتەن شىققاندا جاڭبىر نوسەرلەتپەسە دە, ءسىركىرەپ تۇرعان. الماتىعا جەتكەندە قىلامىقتاعان قار سوڭى جاپالاقتاپ, سوڭىنان اسپان تىعىنى اتىلىپ كەتتى. تۇمان كوتەرىلدى. ۋنيۆەرسيادا باسشىلىعى ەكى-ءۇش جارىس ءتۇرىن كەيىنگە شەگەردى. بىراق, تابيعاتتىڭ توسىن مىنەزى بيىلعى قىستا قارىنان گورى جاڭبىرى كوپ شىمكەنتتىڭ فريستايلشىلارى ءۇشىن ايى وڭىنان تۋعان كۇن بولدى.
فريستايل-اكروباتيكا تۇرىنەن ۋنيۆەرسياداعا جارىسقا تۇسكەن بەس سپورتشىنىڭ بەسەۋى دە شىمكەنتتىك. ەڭ تاماشاسى – ءبارى ءوزىمىزدىڭ ءىنى-قارىنداستارىمىز.
جانبوتا الدابەرگەنوۆا مەن باعلان ىڭكاربەك جۇبىنىڭ التىنى – ۋنيۆەرسيادا تاريحىنىڭ پاراعىنا قازاق سپورتشىلارىنىڭ قالدىرعان قولتاڭباسى, تۇڭعىش ءىرى جەڭىسى. بۇعان اياعىنىڭ ءسىڭىرىن سوزىپ السا دا, كۇمىس مەدالعا قول جەتكىزگەن جىبەك اراپباەۆانىڭ ەرلىگىن قوسىڭىز.
ءبىز وسى ساڭلاقتارمەن سويلەسىپ, ايتۋلى قۋانىشتارىمەن بولىستىك.
«بۇلار كىمدەر؟ لەگيونەرلەر مە؟..»
باقىتجان زيابەكوۆ, شىمكەنتتەگى قىسقى سپورت تۇرلەرى مەكتەبىنىڭ ديرەكتورى, قازاقستاننىڭ ەڭبەك سىڭىرگەن جاتتىقتىرۋشىسى: – سپورتشىلارىمىز ۋنيۆەرسياداعا ۇلكەن دايىندىقپەن كەلدى. فينليانديادا, بەلورۋسسيادا, رەسەيدە وقۋ-جاتتىعۋ جيىندارىن وتكىزدى. قىتاي مەن فينليانديادا وتكەن الەم كۋبوگىنىڭ كەزەڭدەرىنە قاتىستى. ۋنيۆەرسياداعا ءبىر اپتا قالعاندا ەلگە ورالىپ, سوڭعى دايىندىقتارىن پىسىقتادى. شىنىمدى ايتايىن, ءبىزدىڭ سپورتشىلارىمىز اعا جاتتىقتىرۋشى مۇرات ءابۋتالىپوۆ ەكەۋمىزدىڭ ايتقان بولجامىمىزدان اسىپ ءتۇستى. جولدا جاتقان باتپان قۇيرىق جوق, ءبىر التىن, ءبىر قولا مەدالدان ءۇمىتىمىز بولعان. التىندى جانبوتا الارىنا سەندىك, باعلان كەم دەگەندە قولاعا ىلىنەدى دەگەن وي بولدى. جىبەك جارىس قارساڭىندا اياعىنىڭ ءسىڭىرىن سوزىپ العاندىقتان, قاتىسا الار ما ەكەن دەپ قاۋىپتەندىك. بىراق, جىبەك سەنساتسيا جاسادى. كۇمىس مەدال الدى. جانبوتا مەن باعلان ىرىكتەۋ سىنى مەن فينال, سۋپەرفينالدا قارسىلاستارىنان قۇرىق بويى وزىپ كەتتى. ەلدەن ءبىر مال اكەلىپ سويىپ, قۇران وقىتقانمىن. جارىس كەزىندە اللاعا ءمىناجات ەتىپ, تىلەك تىلەپ وتىردىم. باعلان العاشقى جارىسىندا قۇلاپ قالىپ, قاتتى قوبالجىعان ەدى. ءبارىن جيناپ, تولقىنىستارىن باساتىنداي ءسوز تاپتىق, جىگەرلەندىردىك. بىراق, ءسىزدىڭ كەي اعايىندارعا وكپەمىز بار ەكەنىن جاسىرمايمىن. ءباسپاسوز ءماسليحاتىندا ءبىر جۋرناليست: «ءبىز بىلگەن شىمكەنتتە قار جوق, بۇل لەگيونەرلەردى قايدان اكەلدىڭىزدەر؟», دەپ سۇراپ كۇيدىردى. ءجۋرناليستىڭ سپورتتى جازىپ ءجۇرىپ, سپورتتى بىلمەيتىنى تاڭعالدىردى. سوڭعى قىسقى وليمپياداعا شىمكەنتتەن ءۇش سپورتشى قاتىستى. جانبوتا الدابەرگەنوۆا قازاق سپورتشىلارىنىڭ ىشىنەن العاشقى التىلىققا كىردى. جىبەك اراپباەۆا ازيا ويىندارىندا كۇمىس مەدال العان. وسىنى ءوزىمىزدىڭ جۋرناليستەر ءبىلىپ, وسىنداي سۇراق قويماۋى كەرەك ەدى. ەلباسى وڭتۇستىكتە قىسقى سپورت تۇرلەرىن ورىستەتۋ كەرەك دەگەن. كورەگەن باسشى ۇلىستىڭ ۇيىتقىسى وڭتۇستىكتە قازاق سپورتشىلارىنىڭ وسەرىنە سەندى. ەندى مىنە, سونىڭ ءتاتتى جەمىسىن جەپ جاتىرمىز. وبلىس اكىمى جانسەيىت تۇيمەباەۆقا راحمەت. ءبىزدى قولداۋعا اۋدان, قالادان ءبىر توپ جانكۇيەردى جىبەردى. وبلىستىڭ سپورت جانە دەنە تاربيەسى باسقارماسىنىڭ باسشىسى الىبەك نۇرتاەۆ پەن شىمكەنت قالاسى اكىمىنىڭ ورىنباسارى قايرات نۇرتاي جارىستىڭ سوڭىنا دەيىن بولىپ, سپورتشىلارىمىزعا قولداۋ كورسەتتى. وڭتۇستىك جامپوزدارىنىڭ ەرلىگى قازاق سپورت تاريحىنىڭ جارقىن بەلەستەرى. ءبىز ءۇشىن جارىس بۇگىنگىمەن بىتپەيدى. ەندى وليمپيادا ويىندارىنا دايىندىقتى باستاپ كەتەمىز.جانبوتا مەن باعلان: «ءبىز ەلدىڭ ءۇمىتىن اقتادىق»
جانبوتانىڭ اناسىن ۇشىراتقانبىز. «مەن كوڭىل-كۇيىمدى ايتىپ جەتكىزە المايمىن. جۇرەگىم كەۋدەمە سىيماي تۇر, اعاتاي». تۇسىندىك. ءبىراز اڭگىمەلەستىك. التى پەرزەنتىنىڭ ءۇشىنشىسى, تويعان قوزىداي تومپيعان جانبوتاسى وليمپيادا ويىندارىندا دا, ۋنيۆەرسيادا دا قازاق قىزدارى ىشىنەن وشپەستەي ءىز قالدىردى. جانبوتا جەكەلەي سىندا دا التىنعا سىنىق سۇيەم جەردەن ءسۇرىنگەن. ءبارى ادەمى ەدى. وكشەلەپ كەلە جاتقان قىتاي سپورتشىسىنان ونداعان ۇپاي الدا بولعانىمەن, سوڭعى سەكۋندتا عانا اتتەگەن-اي دەگىزىپ, ءبىر وتىرىپ بارىپ تۇزەلدى. جانبوتا ايتادى: – ءبىزدى ماراپاتتاۋ ءۇشىن ءمىنبەگە شاقىرعاندا كوزىمنىڭ قيىعىمەن قىتاي سپورتشىسىنىڭ موينىنداعى التىنعا قىزىعىپ قاراي بەردىم. شىركىن-اي, مەنىڭ موينىمدا دا التىن مەدال بولسا عوي دەپ ارماندادىم. قۇداي نيەتىمىزدى قوش كورىپتى. ءاۋ باستا ماعان التىن مەدال ەسەپتەلگەنىن بىلەمىن. جاۋاپكەرشىلىك ۇلكەن. قاتتى تولقىدىم. باعلانعا راحمەت. ەكەۋمىز قازاقستان قورجىنىنا التىن مەدال سالعانىمىزعا, ەلدىڭ ءۇمىتىن اقتاعانىمىزعا قۋانامىن. ءبىز, ءجىبەك اپكەمىز ەكەۋمىز – م.اۋەزوۆ اتىنداعى وقمۋ-ءدىڭ ستۋدەنتتەرىمىز. باعلان شىمكەنتتەگى اكادەميالىق يننوۆاتسيالىق ۋنيۆەرسيتەتتىڭ ستۋدەنتى. ءبىزدىڭ جەڭىسىمىزگە قۇربىلارىمىز قاتتى قۋاندى. ەلدىڭ جانە ەلباسىنىڭ سەنىمىن اقتاعانىمىزعا ءبىز دە قۋاندىق. باعلان ايتادى: – جانبوتا ەكەۋمىزدىڭ يىعىمىزعا ۇلكەن جۇك ارتىلدى. كوڭىلدە ەكىۇداي كۇي بولدى. بىرىنشىدەن, ءوز ەلىڭ, ءوز جەرىڭدە ءوتىپ جاتقان ۋنيۆەرسيادادا جەڭىسكە جەتپەسەڭ, جانكۇيەرلەرىڭنىڭ ءۇمىتىن ۇرلاعانداي, كوڭىلىن جەتىمسىرەتكەندەي بولاسىڭ. ەكىنشىدەن, ءوز ەلىڭدە ءوتىپ جاتقان سوڭ تولقۋ باسىم بولادى ەكەن. بىراق ءبىز, جانبوتا ەكەۋمىز بارلىق ءمۇمكىندىكتى قالت ءجىبەرمەي, ءبارىن تازا ورىندادىق. ءىشتەگى قوبالجۋىمىزدى جەڭۋگە باپكەرلەرىمىز جانە اعالارىمىز كوپ كومەكتەستى. بىزگە ءۇمىت ارتقان ەلىمىزدىڭ سەنىمى كوڭىلىمىزگە دەمەۋ بولدى.كوك تۋدىڭ جەلبىرەگەنى...
ءبىزدىڭ سپورتشىلارىمىز كەرەمەت قوي. جىبەككە اۋەلى دارىگەرلەر اياعىڭ سىندى دەپ جارىسقا قاتىسۋعا رۇقسات بەرمەپتى. قايسار قىز قاسارىسىپ تۇرىپ العان. جارىسقا ءبىر كۇن قالعاندا قاتىسۋعا رۇقسات العان. ۇلگى الاتىن داڭقتى اپالارى بار ءبىزدىڭ قىز وسىلاي ەرلىك كورسەتتى. جانبوتا مەن باعلان. ماراپاتتاۋ. كوز الدىمىزدا ءۇش مەملەكەتتىك تۋدى اكەلە جاتىر. ءبىر جارىم ميللياردقا جۋىق حالقى بار قىتايدىڭ القىزىل تۋى قازاق بايراعىن ورتاعا الىپ كەلەدى. سونى كورگەندە كوزگە جاس تىعىلدى. مىقتى ەكەنسىڭ, الاش. بار بول, قازاق ەلى!.. ىشتەي وسىلاي دەپ سۇيسىندىك. باقتيار تايجان, «ەگەمەن قازاقستان»
