«بارىس» ءوز ايدىنىندا ۇتىلىپ قالدى

قۇرلىقتىق حوككەي ليگاسىنىڭ تۇراقتى چەمپيوناتىندا استانانىڭ «بارىسى» ءوز ايدىنىندا حەلسينكيدىڭ «يوكەريت» كومانداسىن قابىلداپ, 0:2 ەسەبىمەن ەسە جىبەردى. وسىدان بىرەر اپتا بۇرىن حەلسينكيدە 4:3 ەسەبىمەن ۇتقان ەدۋارد زانكوۆەتس شاكىرتتەرى بۇل جولى سول جەتىستىكتەرىن قايتالاي المادى. العاشقى ەكى كەزەڭدە قوس كوماندا ءبىرىن-ءبىرى اڭدىسىپ, بىرقاتار قاۋىپتى شابۋىل ۇيىمداستىرعانمەن, ەسەپ اشىلمادى. ءبارىن جوسپار بويىنشا جۇزەگە اسىرىپ كەلگەن ەلوردالىقتار سوڭعى 20 مينۋتتا ەكى بىردەي شايبا جىبەرىپ الدى. الدىمەن, 41-مينۋتتا پەككا يورماككا ءبىرىنشى شايبانى سالسا, اراعا ون مينۋت سالىپ, ميكا نيەمي «يوكەريتتىڭ» سوڭعى گولدى سوقتى. وسىمەن 55 ويىننان كەيىن 81 ۇپاي جيناعان «بارىس» «شىعىس» كونفەرەنتسياسىندا ازىرگە 6-ورىندا كەلەدى. كەلەسى كەزدەسۋىن 3 اقپان كۇنى مينسكىنىڭ «ديناموسىنا» قارسى وتكىزەدى. «مەنىڭشە, بۇل ويىن تەڭ دارەجەدە ءوتتى. ەكىنشى كەزەڭدە ويىنشى ارتىقتىعىنا يە بولعاندىقتان, ازداپ باسىم بولدىق. وكىنىشكە وراي, العاش بولىپ شايبا جىبەرىپ العاندىقتان, ابدىراپ قالدىق. كىم ءبىرىنشى بولىپ ەسەپتە العا شىقسا, پسيحولوگيالىق تۇرعىدان باسىم بولاتىنى بەلگىلى جايت. ولار بىزگە قاراعاندا مۇمكىندىكتەرىن ءتيىمدى پايدالانا ءبىلدى», – دەدى «بارىس» جاتتىقتىرۋشىسى ەدۋارد زانكوۆەتس.