ج.تۇيمەباەۆ ۋنيۆەرسيادادان التىن العان وڭتۇستىك سپورتشىلارىن قۇتتىقتادى

الماتى قالاسىنداعى 28-ءشى قىسقى ۋنيۆەرسيادادا قازاقستاندىق فريستايلشىلار  ارالاس كوماندالىق اكروباتيكادان  جانبوتا الدابەرگەنوۆا  مەن باعلان ىڭكاربەك التىننان القا تاقتى. قوس جەرلەسىمىز سۋپەرفينال ويىنىندا ەكى قىتايلىق كوماندانى ارتقا تاستاپ, ەل قورجىنىنا التىن مەدال سالدى.  ولار ەكى تالپىنىستان كەيىن, 167. 05 كورسەتكىشىمەن قىتايلىق سپورتشىلاردى شاڭ قاپتىرىپ كەتتى. بۇل جەڭىس وڭتۇستىك قازاقستان سپورتى تاريحىندا ەلەۋلى وقيعاعا بالانىپ وتىر. ويتكەنى  قىسى جىپ-جىلى, قار سيرەك جاۋاتىن وڭتۇستىك قازاقستان وبلىسىنان دۇنيەجۇزىلىك قىسقى ۋنيۆەرسيادادا 3 بىردەي جەرلەسىمىز جۇلدەگەر اتاندى. التىننان القا تاققان جەرلەستەرىمىزدى وبلىس اكىمى جانسەيىت تۇيمەباەۆ ارنايى قۇتتىقتاپ, جىلى لەبىزىن ءبىلدىردى. «قىسقى ۋنيۆەرسيادا قازاقستان ءۇشىن ءساتتى باستالدى. جارىستىڭ العاشقى كۇنىندە-اق فريستايلدىڭ اكروباتيكا ءتۇرى بويىنشا سىنعا تۇسكەن جىبەك اراپباەۆا  قازاقستان قورجىنىنا كۇمىس سالسا, جانبوتا الدابەرگەنوۆا قولا مەدال ەنشىلەدى. بۇل تاريحي جەتىستىككە بۇكىل الاش حالقى مەن وڭتۇستىك جۇرتى دا ەرەكشە قۋاندى. مىنە, اراعا ەكى كۇن سالىپ, ەكى قاراكوزىمىز كوماندالىق ەسەپتە التىننان القا تاعىپ وتىر. جەڭىستى جەمىستى كۇندەرىمىز كوپ بولسىن. سپورتشىلارىمىزعا الداعى سىنداردا ساتتىلىك سەرىك بولعاي», - دەدى جانسەيىت قانسەيىت ۇلى. 28-ءشى دۇنيەجۇزىلىك قىسقى ۋنيۆەرسياداعا 1700-دەن استام سپورتشى مەن 1 000-عا تارتا رەسمي وكىل قاتىسىپ جاتىر. جۇلدە ءۇشىن الەمنىڭ 578 ۋنيۆەرسيتەتىنىڭ سپورتشىلارى باق سىناۋدا.  ايتا كەتەيىك, الماتىدا ءوتىپ جاتقان ۋنيۆەرسيادادا   قازاقستان قورجىنى ەكى التىن, ەكى كۇمىس جانە 4 قولا مەدالمەن تولىقتى.