لەففلەر گولوۆكيننىڭ جوسپارى تۋرالى ايتتى

WBA (Super), IBO, WBC جانە IBF تۇجىرىمدارى بويىنشا ورتا سالماقتاعى الەم چەمپيونى گەننادي گولوۆكين (36-0, 33 كو) كەلەر جىلى پولشالىق بوكسشى ماتسەي سۋلەتسكيمەن جۇدىرىقتاسۋى مۇمكىن. بۇل تۋرالى قازاقستاندىق بوكسشىنىڭ پروموۋتەرى توم لەففلەر ringpolska.pl باسىلىمىنا بەرگەن سۇحباتىندا ايتتى, دەپ حابارلادى vesti.kz. سۇحبات بارىسىندا پروموۋتەر گولوۆكينمەن قاشاننان بەرى جۇمىس ىستەپ كەلە جاتقانىن جانە گولوۆكيننىڭ الداعى جوسپارلارى تۋرالى مالىمدەدى «گولوۆكينمەن التىنشى جىل بىرگە جۇمىس ىستەپ كەلەمىن. وسى ۋاقىت ارالاعىندا 15 كەزدەسۋىن وتكىزدى. قازىرگى ۋاقىتتا ونىڭ بوكستان قاشان كەتەتىنى جونىندە سۇراقتار ءجيى قويىلادى. GGG-ءدىڭ باستى ماقساتى – ورتا سالماقتاعى بارلىق چەمپيوندىق بەلبەۋلەردىىڭ باسىن بىرىكتىرۋ. ازىرگە ونىڭ ەنشىسىندە بۇكىلالەمدىك بوكس ۇيىمىنىڭ ءۇش چەمپيوندىق بەلبەۋى بار. ەندى ءتورتىنشىسىن جەڭىپ الۋ كەرەك. قازىر گولوۆكين سول ءۇشىن دايىندالىپ ءجۇر. بوكستان كەتەتىن ويى جوق», – دەدى لەففلەر. «بيىلعا جوسپارىمىزدى قۇرىپ قويعانبىز. دەنيەل دجەيكوبستى ۇتقان جاعدايدا كىشى چاۆەستى نەمەسە ساۋل الۆارەستى جەكپە-جەككە شاقىرىپ كورەمىز. سونىمەن قاتار, 2018 جىلى پولشالىق ماتسەي سۋلەتسكيمەن جۇدىرىقتاسۋىمىز مۇمكىن. بۇل كەزدەسۋدى دە «Madison Square Garden» ارەناسىندا وتكىزسەك دەيمىز. بۇل كەشتىڭ اندەركارتىنا الەكساندر ۋسيك پەن كشيشتوف گلوۆاتسكي اراسىنداعى كەزدەسۋدى دە قوسۋىمىز ويدا بار», – دەيدى پروموۋتەر. ايتا كەتەيىك, 27 جاستاعى پولياك بوكسشىسى ماتسەي سۋلەتسكي وسى ۋاقىتقا دەيىن كاسىپقوي بوكستا 23 كەزدەسۋ وتكىزىپ, ونىڭ 8-دە قارسىلاسىن نوكاۋتقا تۇسىرگەن.