استانادا ءۇش اي ىشىندە 3 ملن تەكشە مەتر قار شىعارىلدى

سوڭعى جىلدارى ەلوردانىڭ كليماتتىق جاعدايلارى كۇرت وزگەرىپ, ادەتتەن تىس سۋىق اۋا رايىمەن, بۇرقاسىندارمەن جانە قاردىڭ قالىڭ تۇسۋىمەن ەرەكشەلەندى. اتاپ ايتقاندا, بيىل قالادا بۇرىن-سوڭدى بولماعان مولشەردە قار جاۋدى. سينوپتيكتەردىڭ حابارلاۋىنشا, مۇنداي قالىڭ قار ەلوردادا سوڭعى ون جىلدا جاۋماعان. 2016 جىلعى 13 قازان مەن 2017 جىلعى 3 قاڭتار ارالىعىندا قار پوليگوندارىنا 2 ملن تەكشە مەتر قار شىعارىلعان, دەپ حابارلادى استانا اكىمدىگىنىڭ ءباسپاسوز قىزمەتى. جالپى, جينالعان قاردىڭ كولەمى 3 ملن تەكشە مەترگە جۋىقتادى. وتكەن جىلداردىڭ حرونولوگياسى بويىنشا بۇل كورسەتكىشتەر جينالعان قاردىڭ كولەمىنەن بىرنەشە ەسە ارتىق. بۇعان دەيىن جۇرگىزىلگەن تالداۋ كورسەتكىشى بويىنشا, 2014 جىلى 3,2 ملن توننا, 2015 جىلى 3,4 ملن توننا, ال 2016 جىلى 2,9 ملن توننا قار شىعارىلعان. قازىرگى ۋاقىتتا كوممۋنالدىق جانە جەدەل قىزمەتتەردىڭ بارلىق كۇشتەرى قالانىڭ سانيتارلىق تازارتۋ جۇمىستارىنا باعىتتالعان. ەڭ الدىمەن, الەۋمەتتىك ماڭىزى بار مەكتەپتەر, اۋرۋحانالار, بالاباقشالار, جاياۋ جۇرگىنشى جولدارى جانە قوعامدىق كولىك جۇرەتىن جولدار تازارتىلۋدا. تۇرعىن ۇيلەردىڭ اۋلالارى مەن ورامىشىلىك تەلىمدەردىڭ اۋماعىن جەرگىلىكتى پيك-تەر ءوز كۇشتەرىمەن جينايدى.