قازاقستان قىتايداعى ءىرى تۋريستىك كورمەگە قاتىسادى

قازاقستان گۋانچجوۋدا وتەتىن GITF تۋريستىك كورمەسىنە قاتىسۋدى جوسپارلاپ وتىر. بۇل تۋرالى قر يدم حابارلادى. «2017 جىلى باستالعان قازاقستانداعى قىتاي ءتۋريزمى جىلى اياسىندا قازاقستان رەسپۋبليكاسى ينۆەستيتسيالار جانە دامۋ مينيسترلىگى تۋريزم يندۋسترياسى دەپارتامەنتىنىڭ ديرەكتورى مارات يگاليەۆ قىتايدىڭ شەنجەن ايماعى (گۋاندۋن پروۆينتسياسى) تۋروپەراتورلارى قاۋىمداستىعىنىڭ باسشىسى, Shenzhen Top Tour int'l Travel Service كومپانياسىنىڭ باس ديرەكتورى جانە شەنجەن اەا ىشكى-ساۋدا پالاتاسى توراعاسىنىڭ ورىنباسارى دجونسون چەنمەن كەزدەستى», - دەلىنگەن حابارلامادا. وڭتۇستىك قىتاي قازاقستانعا كەلۋشىلەر ءتۋريزمىن دامىتۋدا پەرسپەكتيۆالى ايماق بولىپ تابىلادى. ويتكەنى, قىتايداعى ەڭ  بەلسەندى تۋريستەر ەلدىڭ وڭتۇستىك ايماعىنىڭ تۇرعىندارى.  جىل سايىن گۋانچجوۋدىڭ 2 ميلليوننان استام تۇرعىنى شەت ەلگە شىعادى. ايتا كەتەيىك, قىتاي تاراپى ءبىزدىڭ تۋركومپانيالاردى 2017 جىلدىڭ 23-25 اقپانىندا گۋانچجوۋدا وتەتىن حالىقارالىق GITF تۋريستىك كورمەسىنە قاتىسۋعا شاقىرادى. بۇل ايماق قحر-نىڭ جىلدام دامىپ كەلە جاتقان جانە باي پروۆينتسياسى.  2016 جىلى كورمەگە 29 مىڭ ادام قاتىستى. وندا 23 مىڭ بيزنەس كەزدەسۋلەر ءوتىپ, كەلىسسوزدەر جاسالدى. سونىمەن قاتار, الەمنىڭ 45 ەلى وزدەرىنىڭ تۋريستىك الەۋەتتەرىن تانىستىردى.