زاڭ • 06 قاڭتار, 2017

قازاقستان رەسپۋبليكاسىنىڭ زاڭى: № 40-VI قرز

220 رەت

كورسەتىلدى

39 مين

وقۋ ءۇشىن

داكتيلوسكوپيالىق جانە گەنومدىق تىركەۋ تۋرالى

Egemen Qazaqstan

وسى زاڭ قازاقستان رەسپۋبليكاسىنداعى داكتيلوسكوپيالىق جانە گەنومدىق تىركەۋ سالاسىنداعى قوعامدىق قاتىناستاردى رەتتەيدى.

1-تاراۋ. جالپى ەرەجەلەر

1-باپ. وسى زاڭدا پايدالانىلاتىن نەگىزگى ۇعىمدار

وسى زاڭدا مىناداي نەگىزگى ۇعىمدار پايدالانىلادى:

1) بيولوگيالىق ماتەريال – ادامنىڭ نەمەسە قايتىس بولعان ادام دەنەسىنىڭ (سۇيەگىنىڭ) گەنومدىق اقپاراتى بار تىندەرى مەن شىعىندىلارى;

2) بيولوگيالىق تۋىستار – قانداس تۋىستىعى بار ادامدار: اتا-انالار (اتا-انا), بالالار, اتا, اجە, نەمەرەلەر, اتا-اناسى ءبىر جانە اتا-اناسى بولەك, نەمەرە, شوبەرە اعا-ىنىلەر مەن اپا-سىڭلىلەر (قارىنداستار), ناعاشى اعالار, ناعاشى اپالار, جيەندەر;

3) گەنومدىق اقپارات – ادامنىڭ نەمەسە تانىلماعان ءمايىتتىڭ جەكە باسىن انىقتاۋعا مۇمكىندىك بەرەتىن ونىڭ دەزوكسيريبونۋكلەين قىشقىلىنىڭ بەلگىلى ءبىر فراگمەنتتەرى تۋرالى كودتالعان اقپارات جانە وسى زاڭنىڭ تالاپتارىنا سايكەس دەربەس دەرەكتەر (ول بولعان كەزدە);

4) گەنومدىق تىركەۋ – داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگانداردىڭ بيولوگيالىق ماتەريال مەن گەنومدىق اقپاراتتى جيناۋ, وڭدەۋ, قورعاۋ, ادامنىڭ جەكە باسىن انىقتاۋ نەمەسە راستاۋ بويىنشا جۇزەگە اسىراتىن قىزمەتى;

5) داكتيلوسكوپيالىق اقپارات – ادامنىڭ نەمەسە تانىلماعان ءمايىتتىڭ جەكە باسىن انىقتاۋعا مۇمكىندىك بەرەتىن ونىڭ قولدارىنىڭ ساۋساقتارىنىڭ جانە (نەمەسە) الاقاندارىنىڭ پاپيلليارلىق بەدەرلەرى قۇرىلىمىنىڭ ەرەكشەلىكتەرى تۋرالى بيومەتريالىق دەرەكتەر جانە وسى زاڭنىڭ تالاپتارىنا سايكەس دەربەس دەرەكتەر;

6) داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگاندار – ءوز قۇزىرەتى شەگىندە قازاقستان رەسپۋبليكاسىنىڭ ازاماتتارىن, شەتەلدىكتەر مەن ازاماتتىعى جوق ادامداردى داكتيلوسكوپيالىق جانە (نەمەسە) گەنومدىق تىركەۋدى جۇزەگە اسىراتىن ىشكى ىستەر ورگاندارى, سىرتقى ساياسي قىزمەت سالاسىنداعى ۋاكىلەتتى مەملەكەتتىك ورگان, ۇلتتىق قاۋىپسىزدىك ورگاندارى, كولىك سالاسىنداعى ۋاكىلەتتى مەملەكەتتىك ورگان;

7) داكتيلوسكوپيالىق نەمەسە گەنومدىق اقپاراتتى بۇعاتتاۋ –داكتيلوسكوپيالىق نەمەسە گەنومدىق اقپاراتتى جيناۋدى, جيناقتاۋدى, وزگەرتۋدى, تولىقتىرۋدى, پايدالانۋدى, بەرۋدى, يەسىزدەندىرۋدى, جويۋدى ۋاقىتشا توقتاتۋ جونىندەگى ارەكەتتەر;

8) داكتيلوسكوپيالىق نەمەسە گەنومدىق اقپاراتتى جويۋ – جاسالۋى ناتيجەسىندە داكتيلوسكوپيالىق نەمەسە گەنومدىق اقپاراتتى قالپىنا كەلتىرۋ مۇمكىن بولمايتىن ارەكەتتەر;

9) داكتيلوسكوپيالىق نەمەسە گەنومدىق اقپاراتتى يەسىزدەندىرۋ – ناتيجەسىندە داكتيلوسكوپيالىق نەمەسە گەنومدىق اقپاراتتىڭ ناقتى ادامعا تيەسىلى ەكەنىن ايقىنداۋ قوسىمشا اقپاراتتى پايدالانباي مۇمكىن بولمايتىن ارەكەتتەر;

10) داكتيلوسكوپيالىق نەمەسە گەنومدىق اقپاراتتى وڭدەۋ –داكتيلوسكوپيالىق نەمەسە گەنومدىق اقپاراتتى جيناقتاۋعا, ساقتاۋعا, وزگەرتۋگە, تولىقتىرۋعا, پايدالانۋعا, بەرۋگە, يەسiزدەندiرۋگە, بۇعاتتاۋعا جانە جويۋعا باعىتتالعان ارەكەتتەر;

11) داكتيلوسكوپيالىق نەمەسە گەنومدىق اقپاراتتى پايدالانۋ – داكتيلوسكوپيالىق نەمەسە گەنومدىق تىركەۋ ماقساتىنا قول جەتكىزۋگە باعىتتالعان داكتيلوسكوپيالىق نەمەسە گەنومدىق اقپاراتپەن جاسالاتىن ارەكەتتەر;

12) داكتيلوسكوپيالىق تىركەۋ – داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگانداردىڭ داكتيلوسكوپيالىق اقپاراتتى جيناۋ, وڭدەۋ, قورعاۋ, ادامنىڭ جەكە باسىن انىقتاۋ نەمەسە راستاۋ بويىنشا جۇزەگە اسىراتىن قىزمەتى;

13) ماتەريالدىق جەتكىزگىشتەر – داكتيلوسكوپيالىق نەمەسە گەنومدىق اقپاراتى بار داكتيلوسكوپيالىق نەمەسە اقپاراتتىق كارتالار, ماگنيتتىك, ەلەكتروندىق نەمەسە وزگە دە جازبا تۇرلەرىن جەتكىزگىشتەر;

14) تانىلماعان ءمايىت – دەنەسى (سۇيەكتەرى) تابىلعان كەزدە جەكە باسى انىقتالماعان قايتىس بولعان ادامنىڭ دەنەسى (سۇيەكتەرى).

2-باپ. وسى زاڭنىڭ قولدانىلۋ اياسى

وسى زاڭدا كوزدەلگەن جاعدايلاردا قازاقستان رەسپۋبليكاسىنىڭ ازاماتتارىن, شەتەلدىكتەر مەن ازاماتتىعى جوق ادامداردى داكتيلوسكوپيالىق جانە گەنومدىق تىركەۋگە بايلانىستى قاتىناستار وسى زاڭمەن رەتتەلەدى.

3-باپ. قازاقستان رەسپۋبليكاسىنىڭ داكتيلوسكوپيالىق جانە گەنومدىق تىركەۋ تۋرالى زاڭناماسى

قازاقستان رەسپۋبليكاسىنىڭ داكتيلوسكوپيالىق جانە گەنومدىق تىركەۋ تۋرالى زاڭناماسى قازاقستان رەسپۋبليكاسىنىڭ كونستيتۋتسياسىنا نەگىزدەلەدى جانە وسى زاڭ مەن قازاقستان رەسپۋبليكاسىنىڭ وزگە دە نورماتيۆتiك قۇقىقتىق اكتiلەرiنەن تۇرادى.
ەگەر قازاقستان رەسپۋبليكاسى راتيفيكاتسيالاعان حالىقارالىق شارتتا وسى زاڭدا قامتىلعاننان وزگەشە قاعيدالار بەلگiلەنسە, وندا حالىقارالىق شارتتىڭ قاعيدالارى قولدانىلادى.

4-باپ. داكتيلوسكوپيالىق جانە گەنومدىق تىركەۋ قاعيداتتارى

داكتيلوسكوپيالىق جانە گەنومدىق تىركەۋ:

1) ادام مەن ازاماتتىڭ كونستيتۋتسيالىق قۇقىقتارىن جانە بوستاندىقتارىن ساقتاۋ;

2) زاڭدىلىق;

3) مىندەتتىلىك;

4) ىزگىلىك;

5) قۇپيالىلىق;

6) ادام دەنساۋلىعى ءۇشىن قاۋىپسىزدىك;

7) جەكە ادامنىڭ ار-نامىسى مەن قادىر-قاسيەتىن قۇرمەتتەۋ قاعيداتتارىنا سايكەس جۇرگىزىلەدى.

5-باپ. داكتيلوسكوپيالىق جانە گەنومدىق تىركەۋدىڭ ماقساتى

داكتيلوسكوپيالىق جانە گەنومدىق تىركەۋ داكتيلوسكوپيالىق نەمەسە گەنومدىق اقپارات نەگىزىندە جەكە باسىن انىقتاۋ جانە (نەمەسە) راستاۋ ماقساتىندا جۇرگىزىلەدى.

6-باپ. داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگانداردىڭ قۇقىقتارى مەن مىندەتتەرى

داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگانداردىڭ ءوز قۇزىرەتى شەگىندە داكتيلوسكوپيالىق نەمەسە گەنومدىق اقپاراتتى جيناۋعا, وڭدەۋگە, بيولوگيالىق ماتەريالدى ىرىكتەۋگە جانە پايدالانۋعا قۇقىعى بار.
داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگاندار ءوز قۇزىرەتى شەگىندە:

1) قازاقستان رەسپۋبليكاسى راتيفيكاتسيالاعان حالىقارالىق شارتتارعا جانە وسى زاڭعا سايكەس داكتيلوسكوپيالىق نەمەسە گەنومدىق اقپاراتتى قورعاۋ ءۇشىن قاجەتتى شارالاردى, ونىڭ ىشىندە قۇقىقتىق, ۇيىمداستىرۋشىلىق جانە تەحنيكالىق شارالاردى قولدانۋعا جانە ساقتاۋعا;

2) وسى زاڭدا بەلگىلەنگەن جاعدايلاردا داكتيلوسكوپيالىق نەمەسە گەنومدىق اقپاراتتى جيناۋ, جيناقتاۋ, ساقتاۋ, بەرۋ, بۇعاتتاۋ, يەسىزدەندىرۋ, وزگەرتۋ, تولىقتىرۋ, پايدالانۋ, جويۋ جونىندە شارالار قولدانۋعا مىندەتتى.

7-باپ. داكتيلوسكوپيالىق جانە (نەمەسە) گەنومدىق تىركەۋدى جۇزەگە اسىرۋ كەزىندەگى قازاقستان رەسپۋبليكاسى ازاماتتارىنىڭ, شەتەلدىكتەر مەن ازاماتتىعى جوق ادامداردىڭ قۇقىقتارى مەن مىندەتتەرى

قازاقستان رەسپۋبليكاسى ازاماتتارىنىڭ, شەتەلدىكتەر مەن ازاماتتىعى جوق ادامداردىڭ, كامەلەتكە تولماعانداردىڭ زاڭدى وكىلدەرىنىڭ, سوت شەشىمى بويىنشا ارەكەتكە قابىلەتسىز دەپ تانىلعان ادامدار قورعانشىلارىنىڭ داكتيلوسكوپيالىق جانە (نەمەسە) گەنومدىق تىركەۋدى جۇزەگە اسىرۋ كەزىندە:

1) ءوزىنىڭ داكتيلوسكوپيالىق جانە (نەمەسە) گەنومدىق اقپاراتىمەن نەمەسە وزدەرى زاڭدى مۇددەلەرىن بىلدىرەتىن ادامنىڭ داكتيلوسكوپيالىق جانە (نەمەسە) گەنومدىق اقپاراتىمەن تانىسۋعا;

2) وزدەرىنىڭ داكتيلوسكوپيالىق جانە (نەمەسە) گەنومدىق اقپاراتىن نەمەسە وزدەرى زاڭدى مۇددەلەرىن بىلدىرەتىن ادامنىڭ داكتيلوسكوپيالىق جانە (نەمەسە) گەنومدىق اقپاراتىن جيناۋعا جانە (نەمەسە) وڭدەۋگە, قورعاۋعا بايلانىستى مەملەكەتتىك ورگانداردىڭ جانە ولاردىڭ لاۋازىمدى ادامدارىنىڭ ارەكەتتەرىنە (ارەكەتسىزدىگىنە) جوعارى تۇرعان ورگانعا (جوعارى تۇرعان لاۋازىمدى ادامعا) نەمەسە سوتقا شاعىم جاساۋعا قۇقىعى بار.

داكتيلوسكوپيالىق جانە (نەمەسە) گەنومدىق تىركەۋگە جاتاتىن قازاقستان رەسپۋبليكاسىنىڭ ازاماتتارى, شەتەلدىكتەر مەن ازاماتتىعى جوق ادامدار وسى زاڭدا بەلگىلەنگەن جاعدايلاردا داكتيلوسكوپيالاۋ جانە (نەمەسە) بيولوگيالىق ماتەريالدى ىرىكتەۋ راسىمىنەن وتۋگە مىندەتتى.

8-باپ. داكتيلوسكوپيالىق جانە گەنومدىق اقپاراتتى جيناۋعا, وڭدەۋگە جانە قورعاۋعا قويىلاتىن نەگىزگى تالاپتار

داكتيلوسكوپيالىق جانە گەنومدىق اقپارات قولجەتىمدىلىگى شەكتەۋلى دەربەس دەرەكتەرگە جاتادى.
داكتيلوسكوپيالىق جانە گەنومدىق اقپاراتتى جيناۋ جانە وڭدەۋ شارتتارى ونى جوعالتۋ, بۇرمالاۋ جانە وعان سانكتسيالانباعان قول جەتكىزۋ, سول سياقتى داكتيلوسكوپيالىق نەمەسە گەنومدىق اقپاراتى بار ەلەكتروندىق اقپاراتتىق رەسۋرستارعا قۇقىققا سىيىمسىز جانە (نەمەسە) ادەيى جاسالماعان قول جەتكىزۋ جانە (نەمەسە) ىقپال ەتۋ مۇمكىندىگىن بولعىزباۋعا ءتيىس.
داكتيلوسكوپيالىق جانە گەنومدىق اقپارات مەملەكەت كەپىلدىك بەرەتىن قورعاۋعا جاتادى. داكتيلوسكوپيالىق جانە گەنومدىق اقپاراتتى جيناۋ جانە وڭدەۋ ونى قورعاۋ قامتاماسىز ەتىلگەن جاعدايلاردا عانا جۇزەگە اسىرىلادى.

داكتيلوسكوپيالىق جانە گەنومدىق اقپاراتتى قورعاۋ قازاقستان رەسپۋبليكاسىنىڭ اقپاراتتاندىرۋ تۋرالى, دەربەس دەرەكتەر جانە ولاردى قورعاۋ, مەملەكەتتىك قۇپيالار تۋرالى زاڭناماسىنا سايكەس جۇزەگە اسىرىلادى.

داكتيلوسكوپيالىق جانە (نەمەسە) گەنومدىق اقپاراتتى جيناۋدى جانە (نەمەسە) وڭدەۋدى جۇزەگە اسىراتىن مەملەكەتتىك ورگاندار داكتيلوسكوپيالىق جانە (نەمەسە) گەنومدىق اقپاراتتىڭ قۇپيالىلىعىن ساقتاۋعا جانە ونىڭ قورعالۋىن قامتاماسىز ەتۋگە مىندەتتى.
داكتيلوسكوپيالىق جانە (نەمەسە) گەنومدىق اقپاراتتى جيناۋ, وڭدەۋ, قورعاۋ, بيولوگيالىق ماتەريالدى ىرىكتەۋ جانە پايدالانۋ داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىنا سايكەس جۇزەگە اسىرىلادى.

9-باپ. داكتيلوسكوپيالىق نەمەسە گەنومدىق اقپاراتتى بۇعاتتاۋ, يەسىزدەندىرۋ, بەرۋ

داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگاندار داكتيلوسكوپيالىق نەمەسە گەنومدىق اقپاراتتى يەسىزدەندىرۋدى, سونداي-اق يەسىزدەندىرۋدى الىپ تاستاۋدى جۇزەگە اسىرادى.
داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگاندار داكتيلوسكوپيالىق نەمەسە گەنومدىق اقپاراتتى جيناۋ, وڭدەۋ شارتتارىنىڭ بۇزىلۋى تۋرالى اقپارات بولعان جاعدايدا ونى بۇعاتتاۋدى, سونداي-اق تەكسەرۋ ءىس-شارالارى جۇرگىزىلگەننەن جانە بۇزۋشىلىقتار جويىلعاننان كەيىن بۇعاتتاۋدى الىپ تاستاۋدى جۇزەگە اسىرادى.
داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگاندار جەدەل-ىزدەستىرۋ, بارلاۋ, قارسى بارلاۋ قىزمەتىن جۇزەگە اسىراتىن مەملەكەتتىك ورگاندارمەن بىرلەسكەن نورماتيۆتىك قۇقىقتىق اكتىلەردىڭ نەگىزىندە داكتيلوسكوپيالىق نەمەسە گەنومدىق اقپاراتتى بۇعاتتاۋدى جانە (نەمەسە) يەسىزدەندىرۋدى, سونداي-اق بۇعاتتاۋدى جانە (نەمەسە) يەسىزدەندىرۋدى الىپ تاستاۋدى جۇزەگە اسىرادى.
داكتيلوسكوپيالىق نەمەسە گەنومدىق اقپاراتتى سوتتارعا, قۇقىق قورعاۋ ورگاندارىنا, ارناۋلى مەملەكەتتىك ورگاندارعا, اتقارۋشىلىق ءىس جۇرگىزۋ, انىقتاۋ, تەرگەۋ ورگاندارىنا بەرۋ داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىنا سايكەس قازاقستان رەسپۋبليكاسىنىڭ زاڭدارى نەگىزىندە جۇزەگە اسىرىلادى.
داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگاندار قازاقستان رەسپۋبليكاسى راتيفيكاتسيالاعان حالىقارالىق شارتتارعا جانە قازاقستان رەسپۋبليكاسىنىڭ زاڭدارىنا سايكەس داكتيلوسكوپيالىق نەمەسە گەنومدىق اقپاراتتى شەت مەملەكەتتەرگە بەرۋى مۇمكىن.

2-تاراۋ. داكتيلوسكوپيالىق تىركەۋدى جۇرگىزۋ

10-باپ. داكتيلوسكوپيالىق تىركەۋگە جاتاتىن ادامدار

مىندەتتى داكتيلوسكوپيالىق تىركەۋگە ون التى جاسقا تولعان:

1) ءبىرىنشى رەت قازاقستان رەسپۋبليكاسى ازاماتىنىڭ پاسپورتىن نەمەسە جەكە كۋالىگىن الۋعا, سونداي-اق ونى قالپىنا كەلتىرۋ, اۋىستىرۋ جاعدايلارىندا ءوتىنىش جاساعان قازاقستان رەسپۋبليكاسىنىڭ ازاماتتارى;

2) قازاقستان رەسپۋبليكاسى تەڭىزشىسىنىڭ جەكە كۋالىگىن بەرۋ تۋرالى وزدەرىنە قاتىستى شەشىم قابىلدانعان قازاقستان رەسپۋبليكاسىنىڭ ازاماتتارى, شەتەلدىكتەر مەن ازاماتتىعى جوق ادامدار;

3) قازاقستان رەسپۋبليكاسىندا تۇراقتى تۇراتىن شەتەلدىكتەر مەن ازاماتتىعى جوق ادامدار;

4) ءبىرىنشى رەت شەتەلدىكتىڭ قازاقستان رەسپۋبليكاسىندا تۇرۋعا ىقتيارحاتىن, ازاماتتىعى جوق ادامنىڭ كۋالىگىن, بوسقىن كۋالىگىن الۋعا نەمەسە ونى قالپىنا كەلتىرۋگە, اۋىستىرۋعا ءوتىنىش جاساعان شەتەلدىكتەر مەن ازاماتتىعى جوق ادامدار;

5) جۇمىس بەرۋشى – جەكە تۇلعالاردا ءۇي شارۋاشىلىعىنداعى جۇمىستاردى ورىنداۋ (قىزمەتتەردى كورسەتۋ) ماقساتىندا ءۇي جۇمىسكەرلەرى رەتىندە قازاقستان رەسپۋبليكاسىنا كەلگەن كوشىپ كەلۋشىلەر;

6) قازاقستان رەسپۋبليكاسى شەگىنەن شىعارىپ جىبەرۋگە جاتاتىن نە قازاقستان رەسپۋبليكاسى راتيفيكاتسيالاعان رەادميسسيا تۋرالى حالىقارالىق شارتتاردىڭ كۇشى قولدانىلاتىن شەتەلدىكتەر مەن ازاماتتىعى جوق ادامدار;

7) قازاقستان رەسپۋبليكاسىنىڭ ۆيزالارىن الۋ كەزىندە شەتەلدىكتەر مەن ازاماتتىعى جوق ادامدار جاتادى.

ون ەكى جاستان ون التى جاسقا دەيىنگى بالالار قازاقستان رەسپۋبليكاسى ازاماتىنىڭ پاسپورتىن الۋ كەزىندە وسى زاڭنىڭ 11-بابىنىڭ 2-تارماعىندا كوزدەلگەن تارتىپپەن ەرىكتى نەگىزدە داكتيلوسكوپيالىق تىركەۋگە جاتادى. ون ەكى جاسقا تولماعان بالالار داكتيلوسكوپيالىق تىركەۋگە جاتپايدى.
داكتيلوسكوپيالاۋعا مۇمكىندىك بەرمەيتىن دەنە كەمىستىكتەرى بار (ەكى قولىنىڭ بارلىق ساۋساقتارىنىڭ بولماۋى نەمەسە ەكى قولىنىڭ بارلىق ساۋساقتارىنىڭ تىرناق فالانگالارىندا پاپيلليارلىق بەدەرلەرىنىڭ بولماۋى) ادامدار قازاقستان رەسپۋبليكاسىنىڭ مەملەكەتتىك شەكاراسىن كەسىپ ءوتۋ كەزىندە داكتيلوسكوپيالىق تىركەۋدەن, داكتيلوسكوپيالىق اقپارات بويىنشا جەكە باسىن راستاۋ راسىمىنەن وتۋدەن بوساتىلادى.

قازاقستان رەسپۋبليكاسىنىڭ شەگىنەن شىعارىپ جىبەرۋگە جاتاتىن نە قازاقستان رەسپۋبليكاسى راتيفيكاتسيالاعان رەادميسسيا تۋرالى حالىقارالىق شارتتاردىڭ كۇشى قولدانىلاتىن, دەنە كەمىستىكتەرى بار (ەكى قولىنىڭ بارلىق ساۋساقتارىنىڭ بولماۋى نەمەسە ەكى قولىنىڭ بارلىق ساۋساقتارىنىڭ تىرناق فالانگالارىندا پاپيلليارلىق بەدەرلەرىنىڭ بولماۋى) شەتەلدىكتەر مەن ازاماتتىعى جوق ادامداردىڭ قولدارىنىڭ الاقاندارى بويىنشا داكتيلوسكوپيالىق تىركەۋگە جاتادى.

11-باپ. داكتيلوسكوپيالىق اقپاراتتى جيناۋ ءتارتىبى

داكتيلوسكوپيالىق تىركەۋدى:

1) وسى زاڭنىڭ 10-بابى 1-تارماعىنىڭ 1) تارماقشاسىندا اتالعان ادامدارعا قاتىستى – ىشكى ىستەر ورگاندارى, قازاقستان رەسپۋبليكاسى ازاماتىنىڭ پاسپورتىن قازاقستان رەسپۋبليكاسىنىڭ شەتەلدەردەگى مەكەمەلەرىندە رەسىمدەگەن جاعدايدا – سىرتقى ساياسي قىزمەت سالاسىنداعى ۋاكىلەتتى مەملەكەتتىك ورگان;

2) وسى زاڭنىڭ 10-بابى 1-تارماعىنىڭ 2) تارماقشاسىندا اتالعان ادامدارعا قاتىستى – كولىك سالاسىنداعى ۋاكىلەتتى مەملەكەتتىك ورگان;

3) وسى زاڭنىڭ 10-بابى 1-تارماعىنىڭ 3) – 5) تارماقشالارىندا اتالعان ادامدارعا قاتىستى – ىشكى ىستەر ورگاندارى;

4) وسى زاڭنىڭ 10-بابى 1-تارماعىنىڭ 6) تارماقشاسىندا اتالعان ادامدارعا قاتىستى – ءوز قۇزىرەتىنە سايكەس ىشكى ىستەر ورگاندارى, ۇلتتىق قاۋىپسىزدىك ورگاندارى;

5) وسى زاڭنىڭ 10-بابى 1-تارماعىنىڭ 7) تارماقشاسىندا اتالعان ادامدارعا قاتىستى – ءوز قۇزىرەتىنە سايكەس سىرتقى ساياسي قىزمەت سالاسىنداعى ۋاكىلەتتى مەملەكەتتىك ورگان, ىشكى ىستەر ورگاندارى جۇرگىزەدى.

ون ەكى جاستان ون التى جاسقا دەيىنگى بالالارعا قاتىستى داكتيلوسكوپيالىق تىركەۋ ولاردىڭ كەلىسىمىمەن بالانىڭ زاڭدى وكىلىنىڭ قاتىسۋىمەن جانە جازباشا ءوتىنىشى نەگىزىندە جۇرگىزىلەدى.
سوت ارەكەتكە قابىلەتسىز دەپ انىقتاعان قازاقستان رەسپۋبليكاسىنىڭ ازاماتىن, شەتەلدىكتى نەمەسە ازاماتتىعى جوق ادامدى داكتيلوسكوپيالىق تىركەۋ ونىڭ قورعانشىسىنىڭ قاتىسۋىمەن جانە جازباشا ءوتىنىشى نەگىزىندە جۇرگىزىلەدى.
داكتيلوسكوپيالىق اقپاراتتى جيناۋ داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىنا سايكەس جۇزەگە اسىرىلادى.

12-باپ. داكتيلوسكوپيالىق اقپاراتى بار ماتەريالدىق جەتكىزگىشتەردە قامتىلاتىن مالىمەتتەر

جەكە باسىن كۋالاندىراتىن قۇجاتتاردى رەسىمدەۋ كەزىندە داكتيلوسكوپيالىق اقپاراتى بار ماتەريالدىق جەتكىزگىش مىناداي دەرەكتەردى:

1) تەگىن, اتىن, اكەسىنىڭ اتىن (ول بولعان كەزدە);

2) تۋعان كۇنىن جانە جەرىن;

3) جىنىسىن;

4) قاي ۇلتقا جاتاتىنىن (يەسىنىڭ قالاۋى بويىنشا);

5) ازاماتتىعىن;

6) فوتوسۋرەتىن;

7) قولدارىنىڭ ساۋساقتارىنىڭ جانە (نەمەسە) الاقاندارىنىڭ پاپيلليارلىق بەدەرلەرى قۇرىلىمىنىڭ ەرەكشەلىكتەرى تۋرالى اقپاراتتى;

8) قۇجاتتىڭ بەرىلگەن كۇنىن, ءنومىرىن, قولدانىلۋ مەرزىمىن;

9) قۇجاتتار يەسىنىڭ قولتاڭباسىن;

10) جەكە سايكەستەندىرۋ ءنومىرىن (ول بولعان كەزدە);

11) داكتيلوسكوپيالىق تىركەۋدى جۇرگىزۋ كۇنىن جانە نەگىزىن;

12) قۇجاتتى بەرگەن ورگاننىڭ اتاۋىن;

13) داكتيلوسكوپيالىق تىركەۋدى جۇزەگە اسىرعان ادامنىڭ تەگىن, اتىن, اكەسىنىڭ اتىن (ول بولعان كەزدە) قامتيدى.

قازاقستان رەسپۋبليكاسىنىڭ ۆيزالارىن رەسىمدەۋ كەزىندە داكتيلوسكوپيالىق اقپاراتى بار ماتەريالدىق جەتكىزگىش مىناداي دەرەكتەردى:

1) تەگىن, اتىن, اكەسىنىڭ اتىن (ول بولعان كەزدە);

2) تۋعان كۇنىن;

3) جىنىسىن;

4) قولدارىنىڭ ساۋساقتارىنىڭ جانە (نەمەسە) الاقاندارىنىڭ پاپيلليارلىق بەدەرلەرى قۇرىلىمىنىڭ ەرەكشەلىكتەرى تۋرالى اقپاراتتى;

5) ازاماتتىعىن;

6) فوتوسۋرەتىن;

7) قۇجاتتىڭ بەرىلگەن كۇنىن, ءنومىرىن, قولدانىلۋ مەرزىمىن;

8) ۆيزانىڭ بەرىلگەن كۇنىن, قولدانىلۋ مەرزىمىن;

9) داكتيلوسكوپيالىق تىركەۋدى جۇرگىزۋ كۇنىن جانە نەگىزىن;

10) ۆيزانى بەرگەن ورگاننىڭ اتاۋىن;

11) داكتيلوسكوپيالىق تىركەۋدى جۇزەگە اسىرعان ادامنىڭ تەگىن, اتىن, اكەسىنىڭ اتىن (ول بولعان كەزدە) قامتيدى.

13-باپ. داكتيلوسكوپيالىق اقپاراتتى وزگەرتۋ جانە (نەمەسە) تولىقتىرۋ

داكتيلوسكوپيالىق تىركەۋدەن وتكەن ادامداردىڭ داكتيلوسكوپيالىق اقپاراتىن وزگەرتۋ جانە (نەمەسە) تولىقتىرۋ داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىنا سايكەس جۇزەگە اسىرىلادى.

14-باپ. داكتيلوسكوپيالىق اقپاراتتى جيناقتاۋ جانە ساقتاۋ

داكتيلوسكوپيالىق تىركەۋدى جۇرگىزۋ كەزىندە الىنعان داكتيلوسكوپيالىق اقپاراتتى جيناقتاۋدى جانە ساقتاۋدى قازاقستان رەسپۋبليكاسىنىڭ زاڭناماسىنا سايكەس ەلەكتروندىق اقپاراتتىق رەسۋرستى قالىپتاستىرۋ ارقىلى ىشكى ىستەر ورگاندارى جۇزەگە اسىرادى.

قازاقستان رەسپۋبليكاسى تەڭىزشىسىنىڭ جەكە كۋالىگىن بەرۋ تۋرالى وزدەرىنە قاتىستى شەشىم قابىلدانعان ادامداردىڭ داكتيلوسكوپيالىق اقپاراتىن جيناقتاۋدى جانە ساقتاۋدى قازاقستان رەسپۋبليكاسىنىڭ زاڭناماسىنا سايكەس ەلەكتروندىق اقپاراتتىق رەسۋرستى قالىپتاستىرۋ ارقىلى كولىك سالاسىنداعى ۋاكىلەتتى مەملەكەتتىك ورگان جۇزەگە اسىرادى.

15-باپ. داكتيلوسكوپيالىق اقپاراتتى ساقتاۋ مەرزىمدەرى

ىشكى ىستەر ورگاندارى, كولىك سالاسىنداعى ۋاكىلەتتى مەملەكەتتىك ورگان داكتيلوسكوپيالىق اقپاراتتى:

وسى زاڭنىڭ 10-بابى 1-تارماعىنىڭ 1) تارماقشاسىندا اتالعان ادامدار تۋرالى دەرەكقوردا – ولاردىڭ قايتىس بولۋ فاكتىسى انىقتالعانعا دەيىن, سوت ازاماتتى حابارسىز كەتكەن دەپ تانىعان نەمەسە ازاماتتى قايتىس بولدى دەپ جاريالاعان, قازاقستان رەسپۋبليكاسىنىڭ ازاماتتىعىنان ايىرىلعان نەمەسە ودان شىققان جاعدايلاردا, ولار ءجۇز جاسقا تولعان كۇنگە دەيىن;

وسى زاڭنىڭ 10-بابى 1-تارماعىنىڭ 2) – 7) تارماقشالارىندا, 2-تارماعىندا اتالعان ادامدار تۋرالى دەرەكقوردا – تىركەلگەن كۇنىنەن باستاپ ون جىل ساقتايدى.

وسى باپتىڭ 1-تارماعىندا كورسەتىلگەن مەرزىمدەر وتكەننەن كەيىن ىشكى ىستەر ورگاندارى, كولىك سالاسىنداعى ۋاكىلەتتى مەملەكەتتىك ورگان وسى زاڭنىڭ 10-بابى 1-تارماعىنىڭ 2) – 7) تارماقشالارى, 2-تارماعى نەگىزىندە داكتيلوسكوپيالىق تىركەۋدەن وتكەن ادامدار تۋرالى داكتيلوسكوپيالىق اقپاراتتى ارحيۆتەردە ماتەريالدىق جەتكىزگىشتەردە قىرىق جىل ساقتايدى.

16-باپ. داكتيلوسكوپيالىق اقپاراتتى پايدالانۋ

قازاقستان رەسپۋبليكاسى ازاماتتارىنىڭ, شەتەلدىكتەر مەن ازاماتتىعى جوق ادامداردىڭ داكتيلوسكوپيالىق تىركەۋ كەزىندە الىنعان داكتيلوسكوپيالىق اقپاراتى:

1) قازاقستان رەسپۋبليكاسى ازاماتتارىنىڭ, شەتەلدىكتەر مەن ازاماتتىعى جوق ادامداردىڭ جەكە باسىن راستاۋ جانە (نەمەسە) انىقتاۋ;

2) قازاقستان رەسپۋبليكاسىنىڭ اۋماعىندا شەتەلدىكتەر مەن ازاماتتىعى جوق ادامداردى ەسەپكە الۋ جانە باقىلاۋ;

3) جەكە ادامنىڭ, قوعام مەن مەملەكەتتىڭ قاۋىپسىزدىگىن قامتاماسىز ەتۋ;

4) قازاقستان رەسپۋبليكاسىنىڭ مەملەكەتتىك شەكاراسىن كەسىپ وتەتىن ادامداردى داكتيلوسكوپيالىق اقپارات بويىنشا ادامنىڭ جەكە باسىن راستاۋ ءراسىمى ارقىلى ەسەپكە الۋ جانە باقىلاۋ ءۇشىن پايدالانىلادى.

قازاقستان رەسپۋبليكاسىنىڭ مەملەكەتتىك شەكاراسىن كەسىپ ءوتۋ كەزىندە داكتيلوسكوپيالىق اقپارات بويىنشا ادامنىڭ جەكە باسىن راستاۋ راسىمىنەن قازاقستان رەسپۋبليكاسىنىڭ ازاماتتارى, شەتەلدىكتەر مەن ازاماتتىعى جوق ادامدار ارناۋلى مەملەكەتتىك ورگانداردىڭ, قازاقستان رەسپۋبليكاسى قورعانىس مينيسترلىگىنىڭ, سىرتقى ساياسي قىزمەت سالاسىنداعى ۋاكىلەتتى مەملەكەتتىك ورگاننىڭ جازباشا ءوتىنىشى بويىنشا, سونداي-اق وسى زاڭنىڭ 10-بابىنىڭ 3-تارماعىندا كوزدەلگەن جاعدايلاردا بوساتىلادى.

17-باپ. داكتيلوسكوپيالىق اقپاراتتى جويۋ

داكتيلوسكوپيالىق اقپاراتتى ونى جيناقتاۋدى جانە ساقتاۋدى جۇزەگە اسىراتىن ىشكى ىستەر ورگاندارى, كولىك سالاسىنداعى ۋاكىلەتتى مەملەكەتتىك ورگان جويادى.
داكتيلوسكوپيالىق اقپارات وسى زاڭنىڭ 15-بابىندا كوزدەلگەن ونىڭ ساقتالۋ مەرزىمدەرى وتكەن سوڭ جويىلادى.
داكتيلوسكوپيالىق اقپاراتتى جويۋ ىشكى ىستەر ورگاندارىنىڭ, كولىك سالاسىنداعى ۋاكىلەتتى مەملەكەتتىك ورگاننىڭ ۋاكىلەتتى بولىمشەلەرىنىڭ باسشىلارى بەكىتەتىن اكتىلەر بويىنشا:

1) داكتيلوسكوپيالىق اقپاراتتى جويۋ كۇنى, نەگىزى;

2) تىركەلگەن ادامنىڭ تەگى, اتى, اكەسىنىڭ اتى (ول بولعان كەزدە), جىنىسى, تۋعان كۇنى جانە جەرى, جەكە سايكەستەندىرۋ ءنومىرى (ول بولعان كەزدە), جەكە باسىن كۋالاندىراتىن قۇجاتىنىڭ ءنومىرى;

3) جويۋ ءتاسىلى;

4) داكتيلوسكوپيالىق اقپاراتتى جويۋدى جۇزەگە اسىرعان ادامداردىڭ تەگى, اتى, اكەسىنىڭ اتى (ول بولعان كەزدە), لاۋازىمى مەن قولتاڭباسى كورسەتىلە وتىرىپ جۇرگىزىلەدى.

3-تاراۋ. گەنومدىق تىركەۋدى جۇرگىزۋ

18-باپ. گەنومدىق تىركەۋگە جاتاتىن ادامدار

مىندەتتى گەنومدىق تىركەۋگە:

1) اۋىر نەمەسە اسا اۋىر قىلمىستاردى, سونداي-اق قازاقستان رەسپۋبليكاسى قىلمىستىق كودەكسىنىڭ 120, 121, 122, 123 جانە 124-باپتارىندا كوزدەلگەن قىلمىستاردى جاساعانى ءۇشىن سوتتالعان ادامدار;

2) اشىلماعان اۋىر نەمەسە اسا اۋىر قىلمىستار, سونداي-اق قازاقستان رەسپۋبليكاسى قىلمىستىق كودەكسىنىڭ 120, 121, 122, 123 جانە 124-باپتارىندا كوزدەلگەن قىلمىستار بويىنشا قازاقستان رەسپۋبليكاسىنىڭ قىلمىستىق-پروتسەستىك زاڭىندا بەلگىلەنگەن تارتىپپەن سوتقا دەيىنگى تەرگەپ-تەكسەرۋ بارىسىندا بيولوگيالىق ماتەريالى الىنعان انىقتالماعان ادامدار;

3) تانىلماعان مايىتتەر جاتادى.

حابارسىز كەتكەن ازاماتتاردىڭ بيولوگيالىق تۋىستارى, ءبىرىنشى كەزەكتە, اتا-انالارى (اتا-اناسى) جانە (نەمەسە) بالالارى (بالاسى), ال ولار بولماعان كەزدە تۋىستىق دارەجەسىنە قاراي باسقا دا بيولوگيالىق تۋىستارى وسى زاڭدا كوزدەلگەن تارتىپپەن ولاردىڭ كەلىسىمىمەن گەنومدىق تىركەۋگە جاتادى.

19-باپ. گەنومدىق تىركەۋدى جۇرگىزۋ ءتارتىبى

گەنومدىق تىركەۋ مىناداي تارتىپپەن جۇرگىزىلەدى:

1) قازاقستان رەسپۋبليكاسىنىڭ زاڭناماسىنا سايكەس, گەنومدىق تىركەۋگە جاتاتىن ادامداردان, تانىلماعان مايىتتەردەن بيولوگيالىق ماتەريالدى ىرىكتەۋ, سونداي-اق اشىلماعان اۋىر نەمەسە اسا اۋىر قىلمىس ورىندارىنان انىقتالماعان ادامداردىڭ بيولوگيالىق ماتەريالىن سوتقا دەيىنگى تەرگەپ-تەكسەرۋ بارىسىندا الۋ جۇرگىزىلەدى;

2) وسى زاڭنىڭ 18-بابى 1-تارماعىنىڭ 1) تارماقشاسىندا اتالعان ادامداردىڭ بيولوگيالىق ماتەريالى گەنومدىق اقپارات الۋ جانە گەنومدىق تىركەۋدى جۇزەگە اسىرۋ ءۇشىن ىشكى ىستەر ورگاندارىنىڭ ۋاكىلەتتى بولىمشەسىنە جىبەرىلەدى;

3) وسى زاڭنىڭ 18-بابى 1-تارماعىنىڭ 2) تارماقشاسىندا, 2-تارماعىندا اتالعان ادامداردىڭ جانە تانىلماعان مايىتتەردىڭ بيولوگيالىق ماتەريالى زەرتتەۋ جۇرگىزۋ جانە گەنومدىق تىركەۋدى جۇزەگە اسىرۋ ءۇشىن ىشكى ىستەر ورگاندارىنىڭ ۋاكىلەتتى بولىمشەسىنە نەمەسە سوت ساراپتاماسىن جۇرگىزۋ ءۇشىن قازاقستان رەسپۋبليكاسى ادىلەت مينيسترلىگىنىڭ سوت ساراپتاماسى ورگاندارىنا (بۇدان ءارى – سوت ساراپتاماسى ورگاندارى) نەمەسە ليتسەنزيا نەگىزىندە سوت-ساراپتاما قىزمەتىن جۇزەگە اسىراتىن جەكە تۇلعاعا جىبەرىلەدى.

سوت ساراپتاماسى ورگاندارى نەمەسە ليتسەنزيا نەگىزىندە سوت-ساراپتاما قىزمەتىن جۇزەگە اسىراتىن جەكە تۇلعا سوت مولەكۋليارلىق-گەنەتيكالىق ساراپتامالار جۇرگىزۋ كەزىندە الىنعان گەنومدىق اقپاراتتىڭ كوشىرمەسىن گەنومدىق تىركەۋدى جۇزەگە اسىرۋ ءۇشىن ىشكى ىستەر ورگاندارىنىڭ ۋاكىلەتتى بولىمشەسىنە جىبەرەدى.

20-باپ. بيولوگيالىق ماتەريالدى ىرىكتەۋ كەزىندە الىناتىن مالىمەتتەر

گەنومدىق تىركەۋ ءۇشىن بيولوگيالىق ماتەريالدى ىرىكتەۋ كەزىندە جازانى ورىندايتىن مەكەمەنىڭ نەمەسە ورگاننىڭ قىزمەتكەرى ءاربىر سوتتالعان ادامعا اقپاراتتىق كارتا اشادى, وعان مىناداي مالىمەتتەر:

1) تەگى, اتى, اكەسىنىڭ اتى (ول بولعان كەزدە), ازاماتتىعى, جىنىسى, تۋعان كۇنى جانە جەرى, تۇرعىلىقتى جەرى نەمەسە بولاتىن جەرى بويىنشا تىركەۋ تۋرالى مالىمەتتەر, جەكە سايكەستەندىرۋ ءنومىرى (ول بولعان كەزدە) نەمەسە تىركەلەتىن ادام تۋرالى دەرەكتەر الىنعان ادامنىڭ جەكە باسىن كۋالاندىراتىن قۇجاتتىڭ اتاۋى مەن ءنومىرى;

2) گەنومدىق تىركەۋ ءۇشىن بيولوگيالىق ماتەريالدى ىرىكتەۋدى جۇزەگە اسىراتىن مەملەكەتتىك ورگان بولىمشەسىنىڭ اتاۋى;

3) گەنومدىق تىركەۋ ءۇشىن بيولوگيالىق ماتەريالدى ىرىكتەۋدى جۇرگىزۋ كۇنى جانە نەگىزى;

4) ادام سوتتالعان قازاقستان رەسپۋبليكاسى قىلمىستىق كودەكسىنىڭ بابى;

5) بيولوگيالىق ماتەريالدى ىرىكتەۋدى جۇزەگە اسىرعان لاۋازىمدى ادامنىڭ تەگى, اتى, اكەسىنىڭ اتى (ول بولعان كەزدە), لاۋازىمى جانە قولتاڭباسى;

6) كامەلەتكە تولماعان ادامدى قوسپاعاندا, گەنومدىق تىركەۋ ءۇشىن بيولوگيالىق ماتەريالىن ىرىكتەۋ جۇرگىزىلگەن ادامنىڭ قولتاڭباسى ەنگىزىلەدى. تىركەلەتىن ادام اقپاراتتىق كارتاعا قول قويۋدان باس تارتقان كەزدە كارتادا بۇل تۋرالى جازبا جاسالادى;

7) كامەلەتكە تولماعانداردىڭ زاڭدى وكىلدەرىنىڭ قولتاڭبالارى ەنگىزىلەدى.

قازاقستان رەسپۋبليكاسىنىڭ قىلمىستىق-پروتسەستىك زاڭىندا بەلگىلەنگەن تارتىپپەن حابارسىز كەتكەن ازاماتتاردىڭ بيولوگيالىق تۋىستارىنان گەنومدىق تىركەۋ ءۇشىن بيولوگيالىق ماتەريالدى ىرىكتەۋ كەزىندە انىقتاۋ, تەرگەۋ ورگاندارى اقپاراتتىق كارتاعا وسى باپتىڭ 1-تارماعىنىڭ 1) – 3), 5) – 7) تارماقشالارىندا كوزدەلگەن مالىمەتتەردى, سونداي-اق سوت شەشىمى بويىنشا ارەكەتكە قابىلەتسىز دەپ تانىلعان ادامنىڭ قورعانشىسىنىڭ قولتاڭباسىن ەنگىزەدى. اقپاراتتىق كارتاعا پروتسەستىك ارەكەت حاتتاماسىنىڭ كوشىرمەسى قوسا بەرىلەدى.
قازاقستان رەسپۋبليكاسىنىڭ قىلمىستىق-پروتسەستىك زاڭىندا بەلگىلەنگەن تارتىپپەن سوتقا دەيىنگى تەرگەپ-تەكسەرۋ بارىسىندا بيولوگيالىق ماتەريالى الىنعان انىقتالماعان ادامداردى گەنومدىق تىركەۋ ءۇشىن بيولوگيالىق ماتەريالدى ىرىكتەۋ كەزىندە انىقتاۋ, تەرگەۋ ورگاندارى اقپاراتتىق كارتاعا مىناداي مالىمەتتەردى ەنگىزەدى:

1) گەنومدىق تىركەۋ ءۇشىن بيولوگيالىق ماتەريالدى ىرىكتەۋدى جۇزەگە اسىراتىن مەملەكەتتىك ورگان بولىمشەسىنىڭ اتاۋى;

2) بيولوگيالىق ماتەريالدار الۋدى جۇرگىزۋ كۇنى جانە نەگىزى, قىلمىستىق ءىستىڭ ءنومىرى نەمەسە اقپاراتتى ەسەپكە الۋ كىتابىنداعى تىركەۋ ءنومىرى;

3) ارەكەتتىڭ سارالانۋى, قىلمىس جاسالعان كۇن جانە ورىن;

4) بيولوگيالىق ماتەريالدى العان لاۋازىمدى ادامنىڭ تەگى, اتى, اكەسىنىڭ اتى (ول بولعان كەزدە), لاۋازىمى جانە قولتاڭباسى.

اقپاراتتىق كارتاعا پروتسەستىك ارەكەت حاتتاماسىنىڭ كوشىرمەسى قوسا بەرىلەدى.

تانىلماعان مايىتتەردى گەنومدىق تىركەۋ ءۇشىن بيولوگيالىق ماتەريالدى ىرىكتەۋ كەزىندە اقپاراتتىق كارتالارعا وسى باپتىڭ 3-تارماعىندا كوزدەلگەن مالىمەتتەر, سونداي-اق تانىلماعان ءمايىت تابىلعان كۇن جانە ورىن, جىنىسى, ەرەكشە بەلگىلەرى جانە قايتىس بولۋ سەبەبىن كورسەتۋ (ول بولعان كەزدە) ەنگىزىلەدى. اقپاراتتىق كارتاعا پروتسەستىك ارەكەت حاتتاماسىنىڭ كوشىرمەسى قوسا بەرىلەدى.

21-باپ. بيولوگيالىق ماتەريالدى ىرىكتەۋ جانە پايدالانۋ

گەنومدىق تىركەۋدى جۇرگىزۋ ءۇشىن بيولوگيالىق ماتەريالدى ىرىكتەۋدى:

1) گەنومدىق تىركەۋگە جاتاتىن سوتتالعانداردان – ىشكى ىستەر ورگاندارى;

2) قازاقستان رەسپۋبليكاسىنىڭ قىلمىستىق-پروتسەستىك زاڭىندا بەلگىلەنگەن تارتىپپەن سوتقا دەيىنگى تەرگەپ-تەكسەرۋ بارىسىندا بيولوگيالىق ماتەريالى الىنعان انىقتالماعان ادامداردان – ىشكى ىستەر ورگاندارىنىڭ ۋاكىلەتتى بولىمشەسىنىڭ جانە (نەمەسە) سوت مەديتسينا ماماندارىن تارتا وتىرىپ جانە قازاقستان رەسپۋبليكاسىنىڭ قىلمىستىق-پروتسەستىك كودەكسىنىڭ تالاپتارىن ساقتاي وتىرىپ, قىلمىستىق iستەر بويىنشا ءىس جۇرگىزۋدى جۇزەگە اسىراتىن انىقتاۋ, تەرگەۋ ورگاندارى;

3) حابارسىز كەتكەن ازاماتتاردىڭ بيولوگيالىق تۋىستارىنان – ىشكى ىستەر ورگاندارى;

4) تانىلماعان مايىتتەردەن – سوت مەديتسيناسى سالاسىنداعى دارىگەر ماماندى تارتا وتىرىپ, ىشكى ىستەر ورگاندارى جۇزەگە اسىرادى.

حابارسىز كەتكەن ازاماتتاردىڭ بيولوگيالىق تۋىستارىنان گەنومدىق تىركەۋ ءۇشىن بيولوگيالىق ماتەريالدى ىرىكتەۋ ولاردىڭ جازباشا ءوتىنىشى نەگىزىندە جۇرگىزىلەدى.

حابارسىز كەتكەن ادامنىڭ بيولوگيالىق تۋىسى بولىپ تابىلاتىن كامەلەتكە تولماعان ادامنان بيولوگيالىق ماتەريالدى ىرىكتەۋ ونىڭ كەلىسىمىمەن زاڭدى وكىلىنىڭ قاتىسۋىمەن جانە جازباشا ءوتىنىشى نەگىزىندە جۇرگىزىلەدى.

سوت شەشىمى بويىنشا ارەكەتكە قابىلەتسىز دەپ تانىلعان جانە حابارسىز كەتكەن ادامنىڭ بيولوگيالىق تۋىسى بولىپ تابىلاتىن ادامنان بيولوگيالىق ماتەريالدى ىرىكتەۋ ونىڭ قورعانشىسىنىڭ قاتىسۋىمەن جانە جازباشا ءوتىنىشى نەگىزىندە جۇرگىزىلەدى.

باستاپقىدا بيولوگيالىق ماتەريال گەنومدىق اقپارات الۋدى بولعىزبايتىنداي ساپاسىز ىرىكتەلگەن جاعدايدا, گەنومدىق تىركەۋدى جۇزەگە اسىراتىن ىشكى ىستەر ورگاندارىنىڭ ۋاكىلەتتى بولىمشەسىنىڭ سۇراۋ سالۋى بويىنشا گەنومدىق تىركەۋگە جاتاتىن سوتتالعانداردىڭ, حابارسىز كەتكەن ازاماتتاردىڭ بيولوگيالىق تۋىستارىنىڭ بيولوگيالىق ماتەريالىن قايتا ىرىكتەۋ جۇرگىزىلەدى.
گەنومدىق تىركەۋدى جۇرگىزۋ ءۇشىن ىرىكتەلگەن بيولوگيالىق ماتەريال گەنومدىق اقپارات الۋ ءۇشىن پايدالانىلادى.
گەنومدىق تىركەۋ ءۇشىن بيولوگيالىق ماتەريال بۇرىن ودان وتكەن ادام قايتا سوتتالعان كەزدە ىرىكتەلمەيدى.

22-باپ. بيولوگيالىق ماتەريالدى ساقتاۋ مەرزىمدەرى

حابارسىز كەتكەن ازاماتتاردىڭ بيولوگيالىق تۋىستارىنىڭ, انىقتالماعان ادامداردىڭ, سونداي-اق تانىلماعان مايىتتەردىڭ سوتقا دەيىنگى تەرگەپ-تەكسەرۋ بارىسىندا الىنعان جانە قىلمىستىق ءىس بويىنشا زاتتاي دالەلدەمە دەپ تانىلعان بيولوگيالىق ماتەريالىن ساقتاۋ مەرزىمدەرى قازاقستان رەسپۋبليكاسىنىڭ قىلمىستىق-پروتسەستىك كودەكسىنىڭ 118-بابىنىڭ تالاپتارىنا سايكەس ايقىندالادى.
سوتتالعان ادامداردى گەنومدىق تىركەۋدى جۇرگىزۋ ءۇشىن ىرىكتەلگەن بيولوگيالىق ماتەريال ىرىكتەلگەن كۇنىنەن باستاپ ودان گەنومدىق اقپارات العانعا دەيىن ساقتالادى.

23-باپ. بيولوگيالىق ماتەريالدى جويۋ

حابارسىز كەتكەن ازاماتتاردىڭ بيولوگيالىق تۋىستارىنىڭ, انىقتالماعان ادامداردىڭ, تانىلماعان مايىتتەردىڭ سوتقا دەيىنگى تەرگەپ-تەكسەرۋ بارىسىندا الىنعان جانە قىلمىستىق ءىس بويىنشا زاتتاي دالەلدەمە دەپ تانىلعان بيولوگيالىق ماتەريالى گەنومدىق اقپارات الىنعاننان كەيىن انىقتاۋ, تەرگەۋ ورگاندارىنا قايتارىلادى.
سوتتالعان ادامداردى گەنومدىق تىركەۋدى جۇرگىزۋ كەزىندە الىنعان بيولوگيالىق ماتەريالدى وسى زاڭنىڭ 22-بابىنىڭ 2-تارماعىندا بەلگىلەنگەن ساقتالۋ مەرزىمدەرى وتكەننەن كەيىن ىشكى ىستەر ورگاندارىنىڭ ۋاكىلەتتى بولىمشەسى گەنومدىق اقپاراتتى العاننان كەيىن ونىڭ باسشىسى بەكىتەتىن اكتىلەر بويىنشا:

1) بيولوگيالىق ماتەريالدى جويۋ كۇنىن, نەگىزىن;

2) تىركەلگەن ادامنىڭ تەگىن, اتىن, اكەسىنىڭ اتىن (ول بولعان كەزدە), جىنىسىن, تۋعان كۇنىن جانە جەرىن, جەكە سايكەستەندىرۋ ءنومىرىن (ول بولعان كەزدە), جەكە باسىن كۋالاندىراتىن قۇجاتتىڭ ءنومىرىن;

3) جويۋ ءتاسىلىن;

4) بيولوگيالىق ماتەريالدى جويۋدى جۇزەگە اسىرعان لاۋازىمدى ادامداردىڭ تەگىن, اتىن, اكەسىنىڭ اتىن (ول بولعان كەزدە), لاۋازىمىن جانە قولتاڭباسىن, ۋاكىلەتتى بولىمشەنىڭ اتاۋىن كورسەتە وتىرىپ جويادى.

24-باپ. گەنومدىق اقپاراتى بار ماتەريالدىق جەتكىزگىشتەردە قامتىلاتىن مالىمەتتەر

گەنومدىق اقپاراتى بار ماتەريالدىق جەتكىزگىش اقپاراتتىق كارتادان وسى زاڭدا بەلگىلەنگەن مالىمەتتەردى, سونداي-اق:

1) گەنومدىق اقپارات الۋدى جۇزەگە اسىرعان مەملەكەتتىك ورگان بولىمشەسىنىڭ اتاۋىن;

2) قىلمىستىق ءىستىڭ ءنومىرىن;

3) سوت ساراپشىسى قورىتىندىسىنىڭ نەمەسە مامان قورىتىندىسىنىڭ ءنومىرىن جانە كۇنىن;

4) گەنومدىق اقپاراتتى;

5) بيولوگيالىق وبەكتىنىڭ اتاۋىن جانە گەنومدىق اقپاراتى سوت ساراپتاماسى نەمەسە زەرتتەۋ ناتيجەسىندە الىنعان ادامنىڭ پروتسەستىك مارتەبەسىن قامتۋعا ءتيىس.

25-باپ. گەنومدىق اقپاراتتى الۋ

گەنومدىق تىركەۋگە جاتاتىن ادامدار تۋرالى گەنومدىق اقپاراتتى:

1) گەنومدىق تىركەۋگە جاتاتىن سوتتالعانداردىڭ بيولوگيالىق ماتەريالىنان الۋدى – ىشكى ىستەر ورگاندارىنىڭ ۋاكىلەتتى بولىمشەسى;

2) انىقتالماعان ادامداردىڭ سوتقا دەيىنگى تەرگەپ-تەكسەرۋ بارىسىندا الىنعان, حابارسىز كەتكەن ازاماتتاردىڭ بيولوگيالىق تۋىستارىنىڭ, تانىلماعان مايىتتەردىڭ بيولوگيالىق ماتەريالىنان الۋدى – ىشكى ىستەر ورگاندارىنىڭ ۋاكىلەتتى بولىمشەسى نەمەسە انىقتاۋ, تەرگەۋ ورگاندارى سوت ساراپتاماسىن تاعايىنداعان جاعدايدا, سوت ساراپتاماسى ورگانى, ليتسەنزيا نەگىزىندە سوت-ساراپتاما قىزمەتىن جۇزەگە اسىراتىن جەكە تۇلعا جۇزەگە اسىرادى.

26-باپ. گەنومدىق اقپاراتتى وزگەرتۋ جانە (نەمەسە) تولىقتىرۋ

گەنومدىق تىركەۋدەن وتكەن ادامداردىڭ گەنومدىق اقپاراتىن وزگەرتۋ جانە (نەمەسە) تولىقتىرۋ داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىنا سايكەس جۇزەگە اسىرىلادى.

27-باپ. گەنومدىق اقپاراتتى جيناقتاۋ جانە ساقتاۋ

گەنومدىق تىركەۋدى جۇرگىزۋ كەزىندە الىنعان گەنومدىق اقپاراتتى جيناقتاۋدى جانە ساقتاۋدى قازاقستان رەسپۋبليكاسىنىڭ زاڭناماسىنا سايكەس ەلەكتروندىق اقپاراتتىق رەسۋرستاردا ىشكى ىستەر ورگاندارى جۇزەگە اسىرادى.

28-باپ. گەنومدىق اقپاراتتى پايدالانۋ

گەنومدىق تىركەۋدى جۇرگىزۋ ناتيجەسىندە الىنعان گەنومدىق اقپارات:

1) قىلمىستىق قۇقىق بۇزۋشىلىقتاردىڭ الدىن الۋ, ولاردى اشۋ جانە تەرگەپ-تەكسەرۋ, سونداي-اق ولاردى جاساعان ادامداردى انىقتاۋ جانە بەلگىلەۋ;

2) قازاقستان رەسپۋبليكاسىنىڭ حابارسىز كەتكەن ازاماتتارىن, قازاقستان رەسپۋبليكاسىندا تۇراقتى تۇراتىن نەمەسە ۋاقىتشا بولاتىن شەتەلدىكتەر مەن ازاماتتىعى جوق ادامداردى ىزدەستىرۋ;

3) تانىلماعان مايىتتەر بويىنشا قازاقستان رەسپۋبليكاسى ازاماتتارىنىڭ, شەتەلدىكتەر مەن ازاماتتىعى جوق ادامداردىڭ جەكە باسىن انىقتاۋ;

4) ىزدەستىرىلىپ جاتقان نەمەسە انىقتالىپ جاتقان ادامداردىڭ تۋىستىق قاتىناستارىن انىقتاۋ ماقساتىندا پايدالانىلادى.

حابارسىز كەتكەن ازاماتتاردىڭ بيولوگيالىق تۋىستارىنىڭ گەنومدىق اقپاراتى وسى باپتىڭ 1-تارماعىنىڭ 3) تارماقشاسىندا كوزدەلگەن ماقساتتا پايدالانىلادى.

29-باپ. گەنومدىق اقپاراتتى ساقتاۋ مەرزىمدەرى

گەنومدىق تىركەۋگە جاتاتىن سوتتالعان ادامنىڭ گەنومدىق اقپاراتى گەنومدىق تىركەلگەن كۇنىنەن باستاپ ونىڭ قايتىس بولۋ فاكتىسى انىقتالعاننان كەيىن جيىرما بەس جىل وتكەنگە دەيىن, ال ونىڭ قايتىس بولعانى تۋرالى مالىمەتتەر بولماعان نەمەسە سوت ونى قايتىس بولدى دەپ جاريالاعان كەزدە ول ءجۇز جاسقا تولعان كۇنگە دەيىن ساقتالادى.
بيولوگيالىق ماتەريالى سوتقا دەيىنگى تەرگەپ-تەكسەرۋ بارىسىندا الىنعان انىقتالماعان ادامداردى گەنومدىق تىركەۋدى جۇرگىزۋ كەزىندە الىنعان گەنومدىق اقپارات گەنومدىق تىركەلگەن كۇنىنەن باستاپ جيىرما بەس جىل ساقتالادى.
حابارسىز كەتكەن ازاماتتاردىڭ بيولوگيالىق تۋىستارىن گەنومدىق تىركەۋدى جۇرگىزۋ كەزىندە الىنعان گەنومدىق اقپارات حابارسىز كەتكەن ادامنىڭ جۇرگەن جەرى انىقتالعانعا نەمەسە وقيعانىڭ نەمەسە قىلمىس قۇرامىنىڭ بولماۋىنا بايلانىستى قىلمىستىق ءىس توقتاتىلعانعا دەيىن ساقتالادى.
تانىلماعان مايىتتەردى گەنومدىق تىركەۋدى جۇرگىزۋ كەزىندە الىنعان گەنومدىق اقپارات قايتىس بولعان ادامنىڭ جەكە باسىن انىقتاعانعا دەيىن, بىراق گەنومدىق تىركەلگەن كۇنىنەن باستاپ جيىرما بەس جىلدان اسپاي ساقتالادى.

30-باپ. گەنومدىق اقپاراتتى جويۋ

گەنومدىق تىركەۋدى جۇرگىزۋ ناتيجەسىندە الىنعان گەنومدىق اقپاراتتى وسى زاڭدا كوزدەلگەن ساقتاۋ مەرزىمدەرى وتكەننەن كەيىن, ونى ساقتاۋدى جۇزەگە اسىراتىن ىشكى ىستەر ورگاندارى جويادى.
سوتتالعاننان كەيىن گەنومدىق تىركەۋگە ۇشىراعان اقتالعان ادامنىڭ گەنومدىق اقپاراتى سوتتىڭ اقتاۋ ۇكىمى زاڭدى كۇشىنە ەنگەننەن كەيىن ءبىر جىلدان ەرتە جويىلمايدى.
گەنومدىق تىركەۋ كەزىندە الىنعان گەنومدىق اقپاراتتى جويۋدى ىشكى ىستەر ورگاندارىنىڭ ۋاكىلەتتى بولىمشەسى ونىڭ باسشىسى بەكىتەتىن اكتىلەر بويىنشا:

1) گەنومدىق اقپاراتتى جويۋ كۇنىن جانە نەگىزىن;

2) گەنومدىق اقپاراتتىڭ تىركەۋ ءنومىرىن;

3) تىركەلگەن ادامنىڭ تەگىن, اتىن, اكەسىنىڭ اتىن (ول بولعان كەزدە), جىنىسىن, تۋعان كۇنىن جانە جەرىن, جەكە سايكەستەندىرۋ ءنومىرىن (ول بولعان كەزدە), جەكە باسىن كۋالاندىراتىن قۇجاتىنىڭ ءنومىرىن;

4) جويۋ ءتاسىلىن;

5) گەنومدىق اقپاراتتى جويۋدى جۇزەگە اسىرعان لاۋازىمدى ادامداردىڭ تەگىن, اتىن, اكەسىنىڭ اتىن (ول بولعان كەزدە), لاۋازىمىن جانە قولتاڭباسىن, ۋاكىلەتتى بولىمشەنىڭ اتاۋىن كورسەتە وتىرىپ جۇزەگە اسىرادى.

تانىلماعان ءمايىتتىڭ گەنومدىق اقپاراتىن جويۋ اكتىسىندە انىقتاۋ, تەرگەۋ ورگانىنىڭ اتاۋى جانە گەنومدىق تىركەۋگە باستاماشى بولعان لاۋازىمدى ادام, قىلمىستىق ءىستىڭ ءنومىرى, ارەكەتتىڭ سارالانۋى, تانىلماعان ءمايىت تابىلعان كۇن جانە ورىن كورسەتىلەدى.

4-تاراۋ. داكتيلوسكوپيالىق جانە گەنومدىق تىركەۋ سالاسىنداعى مەملەكەتتىك رەتتەۋ

31-باپ. قازاقستان رەسپۋبليكاسى ۇكىمەتىنىڭ داكتيلوسكوپيالىق جانە گەنومدىق تىركەۋ

سالاسىنداعى قۇزىرەتى

قازاقستان رەسپۋبليكاسىنىڭ ۇكىمەتى داكتيلوسكوپيالىق جانە گەنومدىق تىركەۋ سالاسىندا:

1) داكتيلوسكوپيالىق جانە گەنومدىق تىركەۋ سالاسىنداعى مەملەكەتتىك ساياساتتىڭ نەگىزگى باعىتتارىن ازىرلەيدى جانە ولاردىڭ جۇزەگە اسىرىلۋىن ۇيىمداستىرادى;

2) داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىن بەكىتەدى;

3) وزىنە قازاقستان رەسپۋبليكاسىنىڭ كونستيتۋتسياسىمەن, زاڭدارىمەن جانە قازاقستان رەسپۋبليكاسى پرەزيدەنتىنىڭ اكتىلەرىمەن جۇكتەلگەن وزگە دە فۋنكتسيالاردى ورىندايدى.

32-باپ. قازاقستان رەسپۋبليكاسى ىشكى ىستەر ورگاندارىنىڭ داكتيلوسكوپيالىق جانە گەنومدىق تىركەۋ سالاسىنداعى قۇزىرەتى

قازاقستان رەسپۋبليكاسىنىڭ ىشكى ىستەر ورگاندارى داكتيلوسكوپيالىق جانە گەنومدىق تىركەۋ سالاسىندا:

1) داكتيلوسكوپيالىق جانە گەنومدىق تىركەۋدى جۇرگىزۋ قاعيدالارىن ازىرلەيدى;

2) داكتيلوسكوپيالىق جانە گەنومدىق اقپاراتتىڭ دەرەكقورىن قالىپتاستىرۋ, جۇرگىزۋ قاعيدالارىن ازىرلەيدى جانە بەكىتەدى;

3) قازاقستان رەسپۋبليكاسىنىڭ زاڭدارىندا, قازاقستان رەسپۋبليكاسى پرەزيدەنتىنىڭ جانە قازاقستان رەسپۋبليكاسى ۇكىمەتىنىڭ اكتىلەرىندە كوزدەلگەن وزگە دە وكىلەتتىكتەردى جۇزەگە اسىرادى.

33-باپ. سىرتقى ساياسي قىزمەت سالاسىنداعى ۋاكىلەتتى مەملەكەتتىك ورگاننىڭ داكتيلوسكوپيالىق تىركەۋ سالاسىنداعى قۇزىرەتى

سىرتقى ساياسي قىزمەت سالاسىنداعى ۋاكىلەتتى مەملەكەتتىك ورگان داكتيلوسكوپيالىق تىركەۋ سالاسىندا:

1) شەتەلدە قازاقستان رەسپۋبليكاسى ازاماتىنىڭ پاسپورتىن الۋعا ۇمىتكەر قازاقستان رەسپۋبليكاسىنىڭ ازاماتتارىنان, قازاقستان رەسپۋبليكاسىنىڭ ۆيزالارىن الۋ كەزىندە شەتەلدىكتەر مەن ازاماتتىعى جوق ادامداردان داكتيلوسكوپيالىق اقپارات جيناۋ جانە وڭدەۋ قاعيدالارىن ازىرلەيدى جانە بەكىتەدى;

2) قازاقستان رەسپۋبليكاسىنىڭ زاڭناماسىنا سايكەس داكتيلوسكوپيالىق تىركەۋدى جۇزەگە اسىرادى;

34-باپ. كولىك سالاسىنداعى ۋاكىلەتتى

مەملەكەتتىك ورگاننىڭ داكتيلوسكوپيالىق

تىركەۋ سالاسىنداعى قۇزىرەتى

كولىك سالاسىنداعى ۋاكىلەتتى مەملەكەتتىك ورگان داكتيلوسكوپيالىق تىركەۋ سالاسىندا:

1) قازاقستان رەسپۋبليكاسى تەڭىزشىسىنىڭ جەكە كۋالىگىن بەرۋ تۋرالى وزدەرىنە قاتىستى شەشىم قابىلدانعان ادامداردىڭ داكتيلوسكوپيالىق اقپارات دەرەكقورىن قالىپتاستىرۋ, جۇرگىزۋ قاعيدالارىن ازىرلەيدى جانە بەكىتەدى;

2) قازاقستان رەسپۋبليكاسىنىڭ زاڭناماسىنا سايكەس, قازاقستان رەسپۋبليكاسى تەڭىزشىسىنىڭ جەكە كۋالىگىن بەرۋ تۋرالى وزدەرىنە قاتىستى شەشىم قابىلدانعان ادامداردى داكتيلوسكوپيالىق تىركەۋدى جۇزەگە اسىرادى;

35-باپ. قازاقستان رەسپۋبليكاسى ۇلتتىق

قاۋىپسىزدىك ورگاندارىنىڭ داكتيلوسكوپيالىق

تىركەۋ سالاسىنداعى قۇزىرەتى

قازاقستان رەسپۋبليكاسىنىڭ ۇلتتىق قاۋىپسىزدىك ورگاندارى داكتيلوسكوپيالىق تىركەۋ سالاسىندا:

1) قازاقستان رەسپۋبليكاسىنىڭ مەملەكەتتىك شەكاراسىن كەسىپ ءوتۋ كەزىندە داكتيلوسكوپيالىق اقپارات بويىنشا جەكە باسىن راستاۋ ءراسىمىن جۇزەگە اسىرۋ جانە وسى ادامداردىڭ داكتيلوسكوپيالىق اقپارات دەرەكقورىن قالىپتاستىرۋ, جۇرگىزۋ قاعيدالارىن ازىرلەيدى جانە بەكىتەدى;

2) قازاقستان رەسپۋبليكاسىنىڭ زاڭدارىندا جانە قازاقستان رەسپۋبليكاسى پرەزيدەنتىنىڭ اكتىلەرىندە كوزدەلگەن وزگە دە وكىلەتتىكتەردى جۇزەگە اسىرادى.

36-باپ. داكتيلوسكوپيالىق جانە گەنومدىق تىركەۋ سالاسىنداعى قاداعالاۋ

پروكۋراتۋرا ورگاندارى مەملەكەت اتىنان وسى زاڭنىڭ جانە قازاقستان رەسپۋبليكاسىنىڭ داكتيلوسكوپيالىق جانە گەنومدىق تىركەۋ سالاسىنداعى وزگە دە نورماتيۆتىك قۇقىقتىق اكتىلەرىنىڭ دالمە-ءدال جانە بىركەلكى قولدانىلۋىنا جوعارى قاداعالاۋدى جۇزەگە اسىرادى.

5-تاراۋ. قورىتىندى ەرەجەلەر

37-باپ. داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگانداردىڭ ارەكەتتەرىنە (ارەكەتسىزدىگىنە) شاعىم جاساۋ ءتارتىبى

داكتيلوسكوپيالىق جانە (نەمەسە) گەنومدىق تىركەۋ سالاسىنداعى ۋاكىلەتتى مەملەكەتتىك ورگانداردىڭ جانە ولاردىڭ لاۋازىمدى ادامدارىنىڭ ارەكەتتەرىنە (ارەكەتسىزدىگىنە) قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن جوعارى تۇرعان ورگانعا (جوعارى تۇرعان لاۋازىمدى ادامعا) نەمەسە سوتقا شاعىم جاسالۋى مۇمكىن.

38-باپ. قازاقستان رەسپۋبليكاسىنىڭ داكتيلوسكوپيالىق جانە گەنومدىق تىركەۋ تۋرالى زاڭناماسىن بۇزعانى ءۇشىن جاۋاپتىلىق

قازاقستان رەسپۋبليكاسىنىڭ داكتيلوسكوپيالىق جانە گەنومدىق تىركەۋ تۋرالى زاڭناماسىن بۇزۋ قازاقستان رەسپۋبليكاسىنىڭ زاڭدارىنا سايكەس جاۋاپتىلىققا الىپ كەلەدى.

39-باپ. وسى زاڭدى قولدانىسقا ەنگىزۋ ءتارتىبى

وسى زاڭ 2021 جىلعى 1 قاڭتاردان باستاپ قولدانىسقا ەنگىزىلەدى.

قازاقستان رەسپۋبليكاسىنىڭ پرەزيدەنتى ن.نازارباەۆ

استانا, اقوردا, 2016 جىلعى 30 جەلتوقسان

№ 40-VI قرز