قازاقستان رەسپۋبليكاسىنىڭ زاڭى: №38-VI قرز

وسى زاڭ پروباتسيانى ۇيىمداستىرۋ جانە ونىڭ جۇمىس ىستەۋى سالاسىنداعى قوعامدىق قاتىناستاردى رەتتەيدى جانە پروباتسيا ۇعىمىن, ماقساتىن, مىندەتتەرىن, قاعيداتتارىن, تۇرلەرىن جانە جۇزەگە اسىرۋ نىساندارىن, سونداي-اق وزدەرىنە قاتىستى پروباتسيا قولدانىلاتىن ادامداردىڭ جانە ونى جۇزەگە اسىراتىن سۋبەكتىلەردىڭ قۇقىقتىق مارتەبەسىن بەلگىلەيدى.

1-تاراۋ. جالپى ەرەجەلەر

1-باپ. پروباتسيا ۇعىمى, ماقساتى جانە مىندەتتەرى

1. پروباتسيا – ساناتتارى زاڭمەن ايقىندالعان ادامداردىڭ قىلمىستىق قۇقىق بۇزۋشىلىقتار جاساۋىنىڭ الدىن الۋ ءۇشىن ولاردىڭ مىنەز-قۇلقىن تۇزەۋگە باعىتتالعان باقىلاۋ جانە الەۋمەتتىك-قۇقىقتىق سيپاتتاعى قىزمەت تۇرلەرى مەن جەكە ايقىندالاتىن شارالار جۇيەسى.
2. پروباتسيانىڭ ماقساتى:

1) كۇدىكتىنىڭ, ايىپتالۋشىنىڭ مىنەز-قۇلقىن تۇزەۋ;

2) سوتتالعان ادامدى الەۋمەتكە قوسۋ;

3) قىلمىستىق-اتقارۋ (پەنيتەنتسيارلىق) جۇيەسىنىڭ مەكەمەسىنەن بوساتىلعان ادامدى الەۋمەتتىك بەيىمدەۋ جانە وڭالتۋ ارقىلى قوعامنىڭ قاۋىپسىزدىگىن قامتاماسىز ەتۋگە جاردەمدەسۋ بولىپ تابىلادى.

3. كورسەتىلگەن ماقساتقا سايكەس مىنالار پروباتسيانىڭ مىندەتتەرى بولىپ تابىلادى:

1) پروباتسيا قىزمەتىنىڭ ەسەبىندە تۇراتىن ادامدارعا
الەۋمەتتىك-قۇقىقتىق كومەك كورسەتۋ;

2) باس بوستاندىعىنان ايىرۋمەن بايلانىستى ەمەس جازالاردىڭ زاڭمەن ايقىندالعان تۇرلەرىن ورىنداۋ;

3) باس بوستاندىعىن شەكتەۋ تۇرىندەگى جازاسىن وتەپ جۇرگەن سوتتالعاندارعا, شارتتى تۇردە سوتتالعاندارعا, باس بوستاندىعىنان ايىرۋ تۇرىندەگى جازاسىن وتەۋدەن شارتتى تۇردە مەرزىمىنەن بۇرىن بوساتىلعاندارعا باقىلاۋ جاساۋدى جۇزەگە اسىرۋ;

4) قىلمىستىق-اتقارۋ (پەنيتەنتسيارلىق) جۇيەسىنىڭ مەكەمەسىندە جازاسىن وتەپ جۇرگەن سوتتالعان ادامدى بوساتۋعا دايىنداۋعا قاتىسۋ.

2-باپ. قازاقستان رەسپۋبليكاسىنىڭ پروباتسيا تۋرالى زاڭناماسى

1. قازاقستان رەسپۋبليكاسىنىڭ پروباتسيا تۋرالى زاڭناماسى قازاقستان رەسپۋبليكاسىنىڭ كونستيتۋتسياسىنا نەگىزدەلەدى, قازاقستان رەسپۋبليكاسىنىڭ قىلمىستىق, قىلمىستىق-پروتسەستىك جانە قىلمىستىق-اتقارۋ كودەكستەرىنەن, وسى زاڭنان جانە قازاقستان رەسپۋبليكاسىنىڭ وزگە دە نورماتيۆتىك قۇقىقتىق اكتىلەرىنەن تۇرادى.
2. قازاقستان رەسپۋبليكاسى راتيفيكاتسيالاعان حالىقارالىق شارتتار وسى زاڭنىڭ الدىندا باسىم بولادى جانە حالىقارالىق شارتتان ونى قولدانۋ ءۇشىن زاڭ شىعارۋ تالاپ ەتىلەتىن جاعدايلاردى قوسپاعاندا, تىكەلەي قولدانىلادى.

3-باپ. پروباتسيانىڭ نەگىزگى قاعيداتتارى

پروباتسيا:

1) ادام مەن ازاماتتىڭ قۇقىقتارىن, بوستاندىقتارىن جانە زاڭدى مۇددەلەرىن ساقتاۋ;

2) زاڭدىلىق;

3) ىزگىلىك;

4) مەملەكەتتىك قۇپيالاردى جانە زاڭمەن قورعالاتىن وزگە قۇپيانى قۇرايتىن مالىمەتتەردى قوسپاعاندا, جاريالىلىق;

5) پروباتسيا قىزمەتىنىڭ ەسەبىندە تۇراتىن ادامدارعا قاتىستى الەۋمەتتىك-قۇقىقتىق كومەك كولەمىن ايقىنداۋ جانە پروباتسيالىق باقىلاۋدى جۇزەگە اسىرۋ كەزىندە سارالانعان جانە جەكە-دارا ءادىس;

6) پروباتسيا قىزمەتىنىڭ ەسەبىندە تۇراتىن ادامداردىڭ قۇقىققا باعىنۋشىلىق جانە قوعامعا پايدالى بەلسەندى مىنەز-قۇلقىن ىنتالاندىرۋ;

7) پروباتسيانى جۇزەگە اسىراتىن سۋبەكتىلەردىڭ ءوزارا ءىس-قيمىلى قاعيداتتارىنا نەگىزدەلەدى.

4-باپ. وزدەرىنە قاتىستى پروباتسيا قولدانىلاتىن ادامدار. پروباتسيا قىزمەتىنىڭ ەسەبىندە تۇراتىن ادامداردىڭ قۇقىقتارى مەن مىندەتتەرى

1. وزدەرىنە قاتىستى پروباتسيا قولدانىلاتىن ادامدار ساناتتارى قازاقستان رەسپۋبليكاسىنىڭ قىلمىستىق جانە قىلمىستىق-اتقارۋ كودەكستەرىمەن, سونداي-اق وسى زاڭمەن ايقىندالادى.
2. پروباتسيا قىزمەتىنىڭ ەسەبىندە تۇراتىن ادامداردىڭ:

1) انا تىلىندە نەمەسە وزدەرى مەڭگەرگەن باسقا تىلدە ءوتىنىش جاساۋعا, وزدەرىنىڭ قۇقىقتارى مەن مىندەتتەرى, سوتتىڭ قولدانعان جازاسى, قىلمىستىق-قۇقىقتىق ىقپال ەتۋدىڭ وزگە دە شارالارىن ورىنداۋدىڭ ءتارتىبى مەن شارتتارى, ولاردىڭ وزگەرىستەرى, سونداي-اق ۇسىنىستار, ارىزدار مەن شاعىمدار بەرۋدىڭ ءتارتىبى تۋرالى مالىمەتتەردى الۋعا;

2) پروباتسيانى جۇزەگە اسىراتىن سۋبەكتىلەردىڭ ارەكەتتەرىنە نەمەسە ارەكەتسىزدىگىنە قازاقستان رەسپۋبليكاسىنىڭ زاڭناما­سىندا بەلگىلەنگەن تارتىپپەن شاعىم جاساۋعا;

3) قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن الەۋمەتكە قوسۋ, الەۋمەتتىك بەيىمدەۋ جانە وڭالتۋ جونىندەگى ءىس-شارالارعا قاتىسۋعا قۇقىعى بار.

وسى باپتىڭ 1-تارماعىندا اتالعان ادامداردىڭ قازاقستان رەسپۋبليكاسىنىڭ زاڭناماسىندا كوزدەلگەن باسقا دا قۇقىقتارى بار.

3. پروباتسيا قىزمەتىنىڭ ەسەبىندە تۇراتىن ادامدار:

1) زاڭ مەن سوت جۇكتەگەن مىندەتتەردى ورىنداۋعا;

2) جازانى جانە قىلمىستىق-قۇقىقتىق ىقپال ەتۋدىڭ وزگە دە شارالارىن وتەۋ ءتارتىبى مەن شارتتارىن ورىنداۋعا جانە ساقتاۋعا;

3) پروباتسيانى جۇزەگە اسىراتىن سۋبەكتىلەردىڭ زاڭدى تالاپتارىن ورىنداۋعا;

4) پروباتسيانى جۇزەگە اسىراتىن سۋبەكتىلەرگە انىق مالىمەتتەر ۇسىنۋعا مىندەتتى.

وسى باپتىڭ 1-تارماعىندا اتالعان ادامداردىڭ زاڭدا كوزدەلگەن باسقا دا مىندەتتەرى بار.

5-باپ. پروباتسيانى جۇزەگە اسىرۋ نىساندارى

1. پروباتسيا قىزمەتىنىڭ ەسەبىندە تۇراتىن ادامدارعا پروباتسيالىق باقىلاۋ جانە الەۋمەتتىك-قۇقىقتىق كومەك كورسەتۋ نىساندارىندا پروباتسيا جۇزەگە اسىرىلادى.
2. پروباتسيالىق باقىلاۋ پروباتسيا قىزمەتىنىڭ ەسەبىندە تۇراتىن ادامداردىڭ وزدەرىنە زاڭ مەن سوت جۇكتەگەن مىندەتتەردى ورىنداۋىنا باقىلاۋدى جۇزەگە اسىرۋ بويىنشا پروباتسيا قىزمەتىنىڭ جانە پوليتسيانىڭ جۇمىسىن بىلدىرەدى.
3. الەۋمەتتىك-قۇقىقتىق كومەك – پروباتسيانى جۇزەگە اسىرا­تىن سۋبەكتىلەر الەۋمەتتىك-قۇقىقتىق كومەك كورسەتۋدىڭ جەكە باعدار­لاماسى نەگىزىندە ىسكە اسىراتىن, وزدەرىنە قاتىستى پروبا­تسيا قولدانىلاتىن ادامداردى الەۋمەتكە قوسۋعا, الەۋمەتتىك بەيىمدەۋگە جانە وڭالتۋعا باعىتتالعان شارالار كەشەنى.

6-باپ. وزدەرىنە قاتىستى پروباتسيا قولدانىلاتىن ادامداردى الەۋمەتكە قوسۋ, الەۋمەتتىك بەيىمدەۋ جانە وڭالتۋ شارالارى

1. وزدەرىنە قاتىستى پروباتسيا قولدانىلاتىن ادامداردى الەۋمەتكە قوسۋ, الەۋمەتتىك بەيىمدەۋ جانە وڭالتۋ:

1) مىنا ماسەلەلەر بويىنشا الەۋمەتتىك-قۇقىقتىق كومەك كورسەتۋ:

مەديتسينالىق كومەك الۋ;

ورتا ءبىلىم الۋ;

كاسىپتى مەڭگەرۋ (كاسىپتىك دايارلاۋ, قايتا دايارلاۋ جانە بىلىكتىلىكتى ارتتىرۋ);

جۇمىسقا ورنالاسۋعا جاردەمدەسۋ;

پسيحولوگيالىق دەمەۋدى قامتاماسىز ەتۋ;

قازاقستان رەسپۋبليكاسىنىڭ زاڭناماسىندا بەلگىلەنگەن جەڭىلدىكتەر مەن الەۋمەتتىك تولەمدەردى الۋ;

2) مىنالاردى:

الەۋمەتتىك-پسيحولوگيالىق جانە پسيحولوگيالىق كونسۋلتاتسيا بەرۋدى;

الەۋمەتتىك پاتروناجدى;

تاراپتاردىڭ ءوزارا كەلىسۋى جاعدايىندا وتباسىلىق جانە وزگە دە الەۋمەتتىك-جاعىمدى بايلانىستاردى قالپىنا كەلتىرۋگە كومەكتەسۋدى قامتيتىن الەۋمەتتىك بايلانىستاردى قولداۋ جۇيەسىن قالپىنا كەلتىرۋ جانە قالىپتاستىرۋ;

3) مىنالاردى:

كەلۋ ورنىمەن قامتاماسىز ەتۋدى;

وڭالتۋ ءىس-شارالارىن ۇيىمداستىرۋدى;

مادەني ءىس-شارالارعا قاتىسۋعا تارتۋدى;

4) الەۋمەتتىك-قۇقىقتىق ماسەلەلەر بويىنشا كونسۋلتاتسيالار ۇسىنۋدى قامتيتىن الەۋمەتتىك-تۇرمىستىق بەيىمدەۋ ارقىلى قامتاماسىز ەتىلەدى.

2. وسى باپتىڭ 1-تارماعىندا كوزدەلگەن شارالاردى پروباتسيا­نى جۇزەگە اسىراتىن سۋبەكتىلەر الەۋمەتتىك-قۇقىقتىق كومەك كورسەتۋدىڭ جەكە باعدارلاماسى نەگىزىندە ىسكە اسىرادى.

الەۋ­مەتتىك-قۇقىقتىق كومەك كورسەتۋدىڭ جەكە باعدارلاماسى –پروبا­تسيانى جۇزەگە اسىراتىن سۋبەكتىلەردىڭ پروباتسيا قىزمەتىنىڭ ەسەبىندە تۇراتىن ادامنىڭ جەكە باسىن كەشەندى زەردەلەۋ مەن ونىڭ ناقتى ومىرلىك جاعدايى نەگىزىندە تۇجىرىم­دالعان, وعان الەۋمەتتىك-قۇقىقتىق كومەك كورسەتۋ جونىندەگى ءىس-شارالار جيىنتىعى.

2-تاراۋ. پروباتسيانى جۇزەگە اسىراتىن سۋبەكتىلەر جانە ولاردىڭ قۇزىرەتى

7-باپ. پروباتسيانى جۇزەگە اسىراتىن سۋبەكتىلەر

قازاقستان رەسپۋبليكاسىنىڭ پروباتسيا تۋرالى زاڭناماسىندا بەلگىلەنگەن تارتىپپەن ءوز قۇزىرەتى شەگىندە ارەكەت ەتەتىن مەملەكەتتىك ورگاندار, سونداي-اق وسى زاڭنىڭ 11-بابىنا سايكەس ازاماتتار, قوعامدىق بىرلەستىكتەر جانە وزگە دە زاڭدى تۇلعالار پروباتسيانى جۇزەگە اسىراتىن سۋبەكتىلەر بولىپ تابىلادى.

8-باپ. ىشكى ىستەر ورگاندارىنىڭ قۇزىرەتى

1. قازاقستان رەسپۋبليكاسى ىشكى ىستەر مينيسترلىگىنىڭ قۇزىرەتىنە:

1) پروباتسيا سالاسىنداعى مەملەكەتتىك ساياساتتى ىسكە اسىرۋ;

2) پروباتسيا سالاسىنداعى مەملەكەتتىك باقىلاۋدى جۇزەگە اسىرۋ;

3) مىنالاردى:

سوتقا دەيىنگى پروباتسيا ساتىسىندا كۇدىكتىنىڭ, ايىپتالۋ­شىنىڭ جەكە باسىن پسيحولوگيالىق-الەۋمەتتىك تەستەن وتكىزۋ ادىستەمەسىن;

سوتقا دەيىنگى باياندامانى دايىنداۋ ادىستەمەسىن بەكىتۋ;

4) وزىنە وسى زاڭمەن, قازاقستان رەسپۋبليكاسىنىڭ وزگە دە زاڭدارىمەن, قازاقستان رەسپۋبليكاسى پرەزيدەنتىنىڭ جانە ۇكىمەتىنىڭ اكتىلەرىمەن جۇكتەلگەن وزگە دە فۋنكتسيالاردى ورىنداۋ جاتادى.

2. قىلمىستىق-اتقارۋ (پەنيتەنتسيارلىق) جۇيەسى ۋاكىلەتتى ورگانىنىڭ قۇزىرەتىنە:

1) پروباتسيانى جۇزەگە اسىراتىن سۋبەكتىلەردىڭ ءوزارا ءىس-قيمىلىن قامتاماسىز ەتۋ;

2) قىلمىستىق-اتقارۋ (پەنيتەنتسيارلىق) جۇيەسى مەكە­مەلەرىنىڭ جانە پروباتسيا قىزمەتتەرىنىڭ جۇمىسىن ۇيلەستىرۋ;

3) مىنالاردى:

سوتقا دەيىنگى پروباتسيا ساتىسىندا كۇدىكتىنىڭ, ايىپتالۋ­شىنىڭ جەكە باسىن پسيحولوگيالىق-الەۋمەتتىك تەستەن وتكىزۋ ادىستەمەسىن;

سوتقا دەيىنگى باياندامانى دايىنداۋ ادىستەمەسىن ازىرلەۋ;

4) قازاقستان رەسپۋبليكاسىنىڭ زاڭناماسىندا كوزدەلگەن وزگە دە وكىلەتتىكتەردى جۇزەگە اسىرۋ جاتادى.

3. پوليتسيا قازاقستان رەسپۋبليكاسىنىڭ زاڭناماسىندا بەلگىلەنگەن ءوز قۇزىرەتى شەگىندە:

1) پروباتسيالىق باقىلاۋدا تۇراتىن ادامدار تاراپىنان قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردىڭ پروفيلاكتيكاسى, ولاردى انىقتاۋ, زەردەلەۋ, جويۋ جونىندەگى شارالار كەشەنى;

2) كامەلەتكە تولماعاندارعا قاتىستى پروباتسيالىق باقىلاۋدى;

3) قازاقستان رەسپۋبليكاسىنىڭ زاڭناماسىندا كوزدەلگەن وزگە دە وكىلەتتىكتەردى جۇزەگە اسىرادى.

9-باپ. پروباتسيا قىزمەتىنىڭ وكىلەتتىكتەرى

1. پروباتسيا قىزمەتى – قىلمىستىق جازالاردىڭ قوعامنان وقشاۋلاماي ورىندالۋىن قامتاماسىز ەتۋ, سونداي-اق پروباتسيانى ۇيىمداستىرۋ جانە ونىڭ جۇمىس ىستەۋى جونىندەگى اتقارۋشىلىق جانە وكىمدىك فۋنكتسيالاردى جۇزەگە اسىراتىن قىلمىستىق-اتقارۋ (پەنيتەنتسيارلىق) جۇيەسىنىڭ ورگانى.
2. پروباتسيا قىزمەتى:

1) وزدەرىنە قاتىستى پروباتسيا قولدانىلاتىن ادامداردىڭ ەسەبىن جۇرگىزەدى;

2) وزىنە قاتىستى پروباتسيا قولدانىلاتىن ادامنىڭ تۇرعىلىقتى جەرىن, ونىڭ دەنساۋلىق جاعدايىن, ءبىلىم دەڭگەيىن جانە جۇمىسپەن قامتىلۋىن, سونداي-اق وعان الەۋمەتتىك-قۇقىقتىق كومەك ۇسىنۋدىڭ كولەمىن ايقىنداۋ ءۇشىن قاجەتتى وزگە دە مالىمەتتەردى انىقتايدى;

3) پروباتسيا قىزمەتىنىڭ ەسەبىندە تۇراتىن ادامدارعا الەۋمەتتىك-قۇقىقتىق كومەك كورسەتۋدىڭ جەكە باعدارلاماسىن جاسايدى;

4) الەۋمەتتىك-قۇقىقتىق كومەك الۋدى ۇسىنۋ جانە ودان باس تارتۋ ءتارتىبىن تۇسىندىرەدى, ونى الۋعا جاردەمدەسەدى;

5) كۇدىكتىگە, ايىپتالۋشىعا قاتىستى سوتقا دەيىنگى باياندامانى دايىنداۋدى جۇزەگە اسىرادى;

6) باس بوستاندىعىنان ايىرۋمەن بايلانىستى ەمەس جازا قولدانىلعان ادامدارعا وزدەرىنە سوت جۇكتەگەن مىندەتتەردى ورىنداۋ ءتارتىبىن جانە ولاردى ورىنداماۋدىڭ سالدارلارىن تۇسىندىرەدى;

7) وزدەرىنە قاتىستى پروباتسيالىق باقىلاۋ بەلگىلەنگەن ادامدارعا ونىڭ جۇزەگە اسىرىلۋ جانە توقتاتىلۋ ءتارتىبى مەن شارتتارىن, سونداي-اق پروباتسيالىق باقىلاۋ شارتتارىن ساقتاماۋدىڭ سالدارلارىن تۇسىندىرەدى;

8) پروباتسيالىق باقىلاۋدى جۇزەگە اسىرادى;

9) قازاقستان رەسپۋبليكاسىنىڭ مەملەكەتتىك قۇپيالار جانە زاڭمەن قورعالاتىن وزگە دە قۇپيالار تۋرالى زاڭناماسىنىڭ تالاپتارىن ساقتاي وتىرىپ, زاڭدى تۇلعالاردان ءوز وكىلەتتىكتەرىن جۇزەگە اسىرۋ ءۇشىن قاجەتتى مالىمەتتەر, انىقتامالار, مىنەزدەمەلەر, وزگە دە اقپارات سۇراتادى;

10) مىنالاردى:

كامەلەتكە تولماعاندار مەن وتباسى قۇقىقتارىن قورعاۋ سالاسىنداعى باعدارلامالاردى;

كامەلەتكە تولماعاندار مەن وتباسى قۇقىقتارىن قورعاۋ جونىندەگى قىزمەتكە پروباتسيانى جۇزەگە اسىراتىن سۋبەكتىلەردى تارتۋ تەتىكتەرىن ازىرلەۋگە جانە ىسكە اسىرۋعا قاتىسادى;

11) كامەلەتكە تولماعاندار مەن وتباسى قۇقىقتارىن قورعاۋ جونىندەگى كورسەتىلەتىن قىزمەتتەردىڭ ساپاسىنا مونيتورينگ جۇرگىزۋگە قاتىسادى;

12) قازاقستان رەسپۋبليكاسىنىڭ زاڭناماسىندا كوزدەلگەن وزگە دە وكىلەتتىكتەردى جۇزەگە اسىرادى.

3. پروباتسيا قىزمەتى مەملەكەتتىك ورگاندارمەن, ازاماتتارمەن, قوعامدىق بىرلەستىكتەرمەن جانە وزگە دە زاڭدى تۇلعالارمەن پروباتسيا قىزمەتىنىڭ ەسەبىندە تۇراتىن ادامدارعا قازاقستان رەسپۋبليكاسىنىڭ زاڭناماسىنا سايكەس الەۋمەتتىك-قۇقىقتىق كومەك كورسەتۋ ماسەلەلەرى بويىنشا ءوزارا ءىس-قيمىلدى جۇزەگە اسىرادى.

10-باپ. جەرگىلىكتى اتقارۋشى ورگانداردىڭ قۇزىرەتى

وبلىستىڭ, رەسپۋبليكالىق ماڭىزى بار قالانىڭ, استانانىڭ, اۋداننىڭ, وبلىستىق ماڭىزى بار قالانىڭ جەرگىلىكتى اتقارۋشى ورگاندارى پروباتسيا قىزمەتىنىڭ ەسەبىندە تۇراتىن ادامدارعا قازاقستان رەسپۋبليكاسىنىڭ زاڭناماسىنا سايكەس ولاردى الەۋمەتتىك بەيىمدەۋ جانە وڭالتۋ ارقىلى الەۋمەتتىك-قۇقىقتىق كومەك كورسەتۋ سالاسىنداعى وكىلەتتىكتەردى اتقارادى.

11-باپ. ازاماتتاردىڭ, قوعامدىق بىرلەستىكتەردىڭ جانە وزگە دە زاڭدى تۇلعالاردىڭ پروباتسيانى جۇزەگە اسىرۋعا قاتىسۋى

1. ازاماتتاردىڭ, قوعامدىق بىرلەستىكتەردىڭ جانە وزگە دە زاڭدى تۇلعالاردىڭ پروباتسيانى جۇزەگە اسىرۋعا قاتىسۋى وزدەرىنە قاتىستى پروباتسيا قولدانىلاتىن ادامدارعا الەۋمەتتىك-قۇقىقتىق كومەكتى ۇسىنۋعا ەرىكتى تۇردە جاردەمدەسۋ ارقىلى مىناداي نىسانداردا ىسكە اسىرىلادى:

1) پروباتسيا قىزمەتىنىڭ جۇمىسىن جانە پروباتسيا قىزمەتىنىڭ ەسەبىندە تۇراتىن ادامدارعا الەۋمەتتىك-قۇقىقتىق كومەكتى جەتىلدىرۋگە باعىتتالعان باعدارلامالار مەن جوبالاردى ازىرلەۋ جانە ىسكە اسىرۋ;

2) سوتسيولوگيالىق جانە وزگە دە مونيتورينگتەر جۇرگىزۋ;

3) پروباتسيانى رەتتەيتىن نورماتيۆتىك قۇقىقتىق اكتىلەردىڭ جوبالارىن ازىرلەۋگە جانە قوعامدىق تالقىلاۋعا قاتىسۋ;

4) پروباتسيا ماسەلەلەرى بويىنشا كونسۋلتاتيۆتىك-كەڭەسشى جانە ساراپشى ورگانداردىڭ جۇمىسىنا قاتىسۋ;

5) قازاقستان رەسپۋبليكاسىنىڭ زاڭناماسىنا قايشى كەلمەيتىن نىسانداردا وزگە دە جاردەم كورسەتۋ.

2. پروباتسيانى جۇزەگە اسىرۋعا قاتىساتىن ادامدار وزدەرىنە قاتىستى پروباتسيا قولدانىلاتىن ادامداردىڭ دەربەس دەرەكتەرىن, سونداي-اق جەكە ءومىرى تۋرالى مالىمەتتەردى ولاردىڭ جازباشا كەلىسىمىنسىز جاريالاۋعا قۇقىلى ەمەس.
3. حالىقارالىق ۇكىمەتتىك ەمەس ۇيىمدار پروباتسيا قىزمەتىنە قازاقستان رەسپۋبليكاسىنىڭ زاڭناماسىنا, قازاقستان رەسپۋبليكاسىنىڭ حالىقارالىق شارتتارىنا جانە وزگە دە مىندەتتەمەلەرىنە سايكەس كومەك كورسەتە الادى.

3-تاراۋ. پروباتسيا تۇرلەرى جانە ونى جۇزەگە اسىرۋ ەرەكشەلىكتەرى

12-باپ. پروباتسيا تۇرلەرى

پروباتسيا تۇرلەرىنە مىنالار جاتادى:

1) سوتقا دەيىنگى پروباتسيا – كۇدىكتىنىڭ, ايىپتالۋشىنىڭ مىنەز-قۇلقىن تۇزەۋگە باعىتتالعان, ولارعا الەۋمەتتىك-قۇقىقتىق كومەك كورسەتۋ جونىندەگى قىزمەت پەن شارالار جيىنتىعى;

2) ۇكىمدىك پروباتسيا – باس بوستاندىعىن شەكتەۋگە سوتتالعان, سونداي-اق شارتتى تۇردە سوتتالعان ادامدارعا قاتىستى پروباتسيالىق باقىلاۋ بەلگىلەۋ مەن ونى جۇزەگە اسىرۋ جانە ولارعا الەۋمەتتىك-قۇقىقتىق كومەك كورسەتۋ جونىندەگى قىزمەت پەن شارالار جيىنتىعى;

3) پەنيتەنتسيارلىق پروباتسيا – قىلمىستىق-اتقارۋ (پەنيتەنتسيارلىق) جۇيەسىنىڭ مەكەمەلەرىندە باس بوستاندىعىنان ايىرۋ تۇرىندەگى جازاسىن وتەپ جۇرگەن ادامداردى الەۋمەتكە قوسۋ جونىندەگى قىزمەت پەن شارالار جيىنتىعى;

4) پەنيتەنتسيارلىقتان كەيىنگى پروباتسيا – قىلمىستىق-اتقارۋ (پەنيتەنتسيارلىق) جۇيەسىنىڭ مەكەمەلەرىنەن بوساتىلعان ادامدارعا قاتىستى پروباتسيالىق باقىلاۋ بەلگىلەۋ مەن ونى جۇزەگە اسىرۋ جانە ولارعا الەۋمەتتىك-قۇقىقتىق كومەك كورسەتۋ جونىندەگى قىزمەت پەن شارالار جيىنتىعى.

13-باپ. سوتقا دەيىنگى پروباتسيا

1. سوتقا دەيىنگى پروباتسيا مىناداي كۇدىكتىلەرگە, ايىپتالۋشىلارعا:

1) كامەلەتكە تولماعاندارعا;

2) مۇگەدەكتەرگە;

3) ايەلدەرگە:

ەلۋ سەگىز جاستاعى جانە ودان اسقان ايەلدەرگە;

جۇكتى ايەلدەرگە;

ءۇش جاسقا دەيىنگى جاس بالالارى بار ايەلدەرگە;

4) ەرلەرگە:

الپىس ءۇش جاستاعى جانە ودان اسقان ەرلەرگە;

ءۇش جاسقا دەيىنگى جاس بالالاردى جالعىز ءوزى تاربيەلەيتiن ەرلەرگە قاتىستى ەرىكتى نەگىزدە قولدانىلادى.

سوتقا دەيىنگى پروباتسيا وزدەرىنە ۇيقاماق نەمەسە كۇزەتپەن قاماۋدا ۇستاۋ تۇرىندەگى بۇلتارتپاۋ شاراسى قولدانىلعان ادامدارعا قاتىستى قولدانىلمايدى.

2. سوتقا دەيىنگى پروباتسيا وسى باپتىڭ 1-تارماعىندا اتالعان ادامنىڭ جازباشا ءوتىنىشى بويىنشا ول ءوتىنىش جاساعان كەزدەن باستاپ جۇزەگە اسىرىلادى.
3. سوتقا دەيىنگى پروباتسيا كەزىندەگى الەۋمەتتىك-قۇقىقتىق كومەك وسى زاڭنىڭ 6-بابىندا سانامالانعان شارالاردان تۇرادى.
4. پروباتسيا قىزمەتى ادامعا قاتىستى الەۋمەتتىك-قۇقىقتىق كومەك كورسەتۋدىڭ جەكە باعدارلاماسىن جاسايدى جانە ونىڭ ىسكە اسىرىلۋىن قامتاماسىز ەتەدى.

كورسەتىلگەن باعدارلامانى ىسكە اسىرۋ ناتيجەلەرى بويىنشا, سونداي-اق وسى زاڭنىڭ 9-بابى 2-تارماعىنىڭ 9) تارماقشاسىندا كوزدەلگەن تارتىپپەن الىنعان مالىمەتتەر نەگىزىندە پروباتسيا قىزمەتى سوت تالقىلاۋى باستالعانعا دەيىن سوتقا دەيىنگى پروباتسيا قولدانىلاتىن ادامعا ۇسىنىلاتىن سوتقا دەيىنگى باياندامانى جاسايدى.

اتالعان ادام سوتقا دەيىنگى باياندامانى دايىنداۋعا قاتىسا الادى جانە ونىڭ مازمۇنى بويىنشا سوتقا دەيىنگى باياندامادا كورسەتىلۋگە ءتيىس ءوز پىكىرىن ايتا الادى.

5. سوتقا دەيىنگى تەرگەپ-تەكسەرۋ ساتىسىندا قىلمىستىق ءىس توقتاتىلعان جاعدايدا, پروباتسيا قىزمەتى سوتقا دەيىنگى پروباتسيانى توقتاتادى. بۇل رەتتە ادامعا الەۋمەتتىك-قۇقىقتىق كومەك كورسەتۋ الەۋمەتتىك-قۇقىقتىق كومەك كورسەتۋدىڭ جەكە باعدارلاماسىنا سايكەس جالعاسادى.

14-باپ. سوتقا دەيىنگى بايانداما

1. سوتقا دەيىنگى بايانداما – كۇدىكتىنىڭ, ايىپتالۋشىنىڭ جەكە باسىنىڭ ەرەكشەلىكتەرى, ولاردىڭ الەۋمەتتىك-قۇقىقتىق كومەك كورسەتۋدىڭ جەكە باعدارلاماسىندا كوزدەلگەن ءىس-شارالاردى ورىنداۋى, پروباتسيا قىزمەتىنىڭ ۇسىنىمدارىن ۇستانۋى جانە ونىڭ كومەگىن قابىلداۋى تۋرالى اقپارات.
2. سوتقا دەيىنگى باياندامانىڭ مازمۇنى كىرىسپە, سيپاتتامالىق جانە ۇسىنىمدىق بولىكتەردى قامتيدى.

كىرىسپە بولىگىندە:

1) سوتقا دەيىنگى باياندامانىڭ جاسالۋ ۋاقىتى, كۇنى جانە ورنى;

2) سوتقا دەيىنگى باياندامانى جاساعان ادامنىڭ لاۋازىمى, تەگى جانە ينيتسيالدارى;

3) كۇدىكتىنىڭ, ايىپتالۋشىنىڭ تەگى, اتى جانە اكەسىنىڭ اتى (بار بولعان جاعدايدا), تۋعان كۇنى, ايى, جىلى جانە تۋعان جەرى كورسەتىلەدى.

سيپاتتامالىق بولىكتە كۇدىكتى, ايىپتالۋشى تۋرالى مىناداي مالىمەتتەر:

1) ازاماتتىعى, وتباسىلىق جاعدايى, اينالىساتىن كاسىبى, ءبىلىمى, تۇرعىلىقتى جەرى, سوتتالعاندىعىنىڭ بار-جوعى, ولاردى سيپاتتايتىن وزگە دە دەرەكتەر;

2) الەۋمەتتىك-قۇقىقتىق كومەك كورسەتۋدىڭ جەكە باعدارلاماسىندا كوزدەلگەن ءىس-شارالاردى ورىنداۋى;

3) الەۋمەتتىك مىنەزدەمەسى;

4) جەكە باسىنىڭ پسيحولوگيالىق-الەۋمەتتىك تەست ناتيجەلەرى;

5) ولاردىڭ قىلمىستىق قۇقىق بۇزۋشىلىقتار جاساۋىنىڭ تاۋەكەلدەرىن باعالاۋ;

6) پروباتسيا قىزمەتىنىڭ ۇسىنىمدارىن ۇستانۋى جانە ونىڭ كومەگىن الۋى جازىلادى.

ۇسىنىمدىق بولىكتە ادامعا جازانى تاعايىنداۋ جانە ونى ورىنداۋ كەزىندە پايدالانۋعا ۇسىنىلاتىن مىندەتتەر مەن شەكتەۋلەردىڭ ۇلگى تىزبەسى كورسەتىلەدى.

سوتقا دەيىنگى باياندامادا جازىلعان اقپارات پروباتسيانىڭ بارلىق تۇرلەرىن جۇزەگە اسىرۋ كەزىندە, ونىڭ جاڭارتىلعانى ەسكەرىلە وتىرىپ, پايدالانىلادى.

15-باپ. ۇكىمدىك پروباتسيا

1. ۇكىمدىك پروباتسيا:

1) باس بوستاندىعىن شەكتەۋگە سوتتالعان ادامعا;

2) شارتتى تۇردە سوتتالعان ادامعا قاتىستى قولدانىلادى.

2. وسى باپتىڭ 1-تارماعىندا اتالعان ادامدارعا قاتىستى ۇكىمدىك پروباتسيا قازاقستان رەسپۋبليكاسى قىلمىستىق كودەكسىنىڭ 44-بابىنىڭ قاعيدالارى بويىنشا پروباتسيالىق باقىلاۋ نىسانىندا جۇزەگە اسىرىلادى, ونىڭ ۇزاقتىعى سوت ۇكىمىمەن نەمەسە قاۋلىسىمەن ايقىندالادى.
3. وزىنە قاتىستى پروباتسيالىق باقىلاۋ بەلگىلەنگەن ادام:

1) سوت ۇكىمى نەمەسە قاۋلىسى زاڭدى كۇشىنە ەنگەن كۇننەن باستاپ ون تاۋلىك ىشىندە ەسەپكە قويۋ ءۇشىن پروباتسيا قىزمەتىنە كەلۋگە;

2) جازانى جانە وزگە دە قىلمىستىق-قۇقىقتىق ىقپال ەتۋ شارالارىن وتەۋ شارتتارى مەن ءتارتىبىن ساقتاۋعا;

3) تىركەلۋ جانە وزىمەن پروفيلاكتيكالىق اڭگىمەلەسۋ جۇرگىزۋ ءۇشىن بەلگىلەنگەن كۇندەرى پروباتسيا قىزمەتىنە كەلىپ تۇرۋعا;

4) تۇرعىلىقتى جەرىنىڭ, جۇمىس نەمەسە وقۋ ورنىنىڭ وزگەرگەنى تۋرالى پروباتسيا قىزمەتىن جازباشا حاباردار ەتۋگە;

5) وزىنە زاڭ مەن سوت جۇكتەگەن وزگە دە مىندەتتەردى ورىنداۋعا مىندەتتى.

4. ادام پروباتسيالىق باقىلاۋ شارتتارىن ساقتاماعان جاعدايدا پروباتسيا قىزمەتى:

1) باس بوستاندىعىن شەكتەۋگە سوتتالعان ادامعا قاتىستى جازباشا ەسكەرتۋ تۇرىندە جازالاۋ قولدانادى, ال جازاسىن وتەۋدەن قاساقانا جالتارعان جاعدايدا سوتقا باس بوستاندىعىن شەكتەۋدىڭ وتەلمەگەن بولىگىن باس بوستاندىعىنان ايىرۋ تۇرىندەگى جازاعا اۋىستىرۋ تۋرالى ماسەلەنى شەشۋ ءۇشىن ماتەريالدار ۇسىنادى;

2) شارتتى تۇردە سوتتالعان ادامعا قاتىستى پروباتسيالىق باقىلاۋ مەرزىمىن ۇزارتۋ تۋرالى نە شارتتى تۇردە سوتتاۋدىڭ كۇشiن جويۋ جانە سوت ۇكىمىمەن تاعايىندالعان جازانى ورىنداۋ تۋرالى ۇسىنۋ ەنگىزەدى.

5. ەگەر پروباتسيالىق باقىلاۋ بەلگىلەنگەن مەرزىمنىڭ كەمىندە جارتىسى وتكەننەن كەيىن شارتتى تۇردە سوتتالعان ادام ءوزىنىڭ مىنەز-قۇلقىمەن تۇزەلگەنىن دالەلدەسە, وندا پروباتسيا قىزمەتى سوتقا شارتتى تۇردە سوتتاۋدىڭ كۇشىن جويۋ تۋرالى جانە سوتتالعان ادامنان سوتتالعاندىقتى الۋ تۋرالى ۇسىنۋ جولدايدى.
6. پروباتسيا قىزمەتى ادامعا قاتىستى الەۋمەتتىك-قۇقىقتىق كومەك كورسەتۋدىڭ جەكە باعدارلاماسىن جاسايدى جانە ونىڭ ىسكە اسىرىلۋىن قامتاماسىز ەتەدى.

الەۋمەتتىك-قۇقىقتىق كومەك كورسەتۋدىڭ جەكە باعدارلاماسى سوتقا دەيىنگى باياندامانىڭ نەگىزىندە جاسالادى. ول جاسالماعان جاعدايدا, الەۋمەتتىك-قۇقىقتىق كومەك كورسەتۋدىڭ جەكە باعدارلاماسى ۇكىمدىك پروباتسيا بارىسىندا جاسالادى.

16-باپ. پەنيتەنتسيارلىق پروباتسيا

1. پەنيتەنتسيارلىق پروباتسيا قىلمىستىق-اتقارۋ (پەنيتەن­تسيارلىق) جۇيەسى مەكەمەلەرىندە باس بوستاندىعىنان ايىرۋ تۇرىندەگى جازاسىن وتەپ جۇرگەن سوتتالعان ادامعا قاتىستى قولدانىلادى.
2. سوتتالعان ادامدى الەۋمەتكە قوسۋ قازاقستان رەسپۋبليكا­سىنىڭ قىلمىستىق-اتقارۋ زاڭناماسىنىڭ تالاپتارىنا سايكەس ونىڭ قىلمىستىق-اتقارۋ (پەنيتەنتسيارلىق) جۇيەسى مەكەمەسىنە كەلگەن كەزىنەن باستاپ جۇزەگە اسىرىلادى.
3. باس بوستاندىعىنان ايىرۋ تۇرىندەگى جازاسىن وتەپ جۇرگەن, جازا مەرزىمىن وتەۋگە دەيىن ءبىر جىل قالعان سوتتالعان ادامعا قاتىستى الەۋمەتكە قوسۋدى پروباتسيا قىزمەتى قىلمىستىق-اتقارۋ (پەنيتەنتسيارلىق) جۇيەسى مەكەمەسىنىڭ اكىمشىلىگىمەن بىرلەسىپ الەۋمەتتىك-قۇقىقتىق كومەك كورسەتۋ نىسانىندا جۇزەگە اسىرادى.
4. الەۋمەتتىك-قۇقىقتىق كومەك كورسەتۋدىڭ جەكە باعدارلاماسىن پروباتسيا قىزمەتى قىلمىستىق-اتقارۋ (پەنيتەنتسيارلىق) جۇيەسى مەكەمەسىنىڭ اكىمشىلىگىمەن بىرلەسىپ جاسايدى جانە ىسكە اسىرادى.
5. الەۋمەتتىك-قۇقىقتىق كومەك كورسەتۋدىڭ جەكە باعدارلاماسى:

1) سوتقا دەيىنگى پروباتسيا كەزەڭىندە پروباتسيا قىزمەتى ازىرلەگەن سوتقا دەيىنگى باياندامانىڭ (بار بولعان جاعدايدا) دەرەكتەرىن;

2) سوتتالعان ادامنىڭ قىلمىستىق-اتقارۋ (پەنيتەنتسيارلىق) جۇيەسى مەكەمەسىندە بولعان كەزەڭىندەگى مىنەز-قۇلقىن سيپاتتايتىن ماتەريالداردى;

3) بوساتىلۋعا دايىندالاتىن ادامنىڭ تالاپ قويۋ تالاپتارىن وتەگەنى جانە (نەمەسە) وتەمەگەنى تۋرالى مالىمەتتەردى;

4) بوساتىلۋعا دايىندالاتىن سوتتالعان ادامنىڭ الەۋمەتتىك بايلانىستارى, ونىڭ دەنساۋلىق جاعدايى, ءبىلىم دەڭگەيى, ەڭبەك داعدىلارى, قۇقىقتارى مەن بوستاندىقتارىن ىسكە اسىرۋدىڭ قۇقىقتىق تەتىكتەرى تۋرالى حاباردارلىعى جونىندەگى مالىمەتتەر, سونداي-اق سوتتالعان ادامنىڭ الەۋمەتتىك مىنەز-قۇلقىن تۇزەۋ جانە تابىستى الەۋمەتتىك بەيىمدەلۋى ءۇشىن قاجەتتى وزگە دە مالىمەتتەردى;

5) بوساتىلۋعا دايىندالاتىن سوتتالعان ادامعا الەۋمەتتىك-قۇقىقتىق كومەك كورسەتۋگە باعىتتالعان ناقتى ءىس-شارالاردى;

6) سوتتالعان ادام بوساتىلعاننان كەيىن وعان الەۋمەتتىك-قۇقىقتىق كومەك كورسەتۋ, ونىڭ جۇمىسقا ورنالاسۋى جانە تۇرمىستىق جاعدايى بويىنشا جوسپارلاناتىن ءىس-شارالاردى قامتيدى.

6. پروباتسيا قىزمەتى قىلمىستىق-اتقارۋ (پەني­تەنتسيارلىق) جۇيەسى مەكەمەسىنىڭ اكىمشىلىگىمەن بىرلەسىپ, بوساتىلۋعا دايىندالاتىن ادامداردىڭ ءوتىنىشى بويىنشا ولاردىڭ:

1) سوتتالعان ادامدى تىركەۋ ءۇشىن جانە وعان بوس ورىندار تۋرالى اقپارات ۇسىنۋ ءۇشىن حالىقتى جۇمىسپەن قامتۋ ورتالىقتارىمەن;

2) تۇرعىن ءۇيدى جالعا الۋ بويىنشا مامانداندىرىلعان ۇيىمدارمەن (اگەنتتىكتەرمەن);

3) قارت ادامداردىڭ, مۇگەدەكتەردىڭ جانە بەلگىلى ءبىر تۇرعىلىقتى جەرى جوق ادامداردىڭ الەۋمەتتىك كورسەتىلەتىن قىزمەتتەر الۋى ءۇشىن الەۋمەتتىك قىزمەتتەرمەن ءوزارا ءىس-قيمىلىن ورناتادى.

7. پروباتسيا قىزمەتى الەۋمەتتىك-قۇقىقتىق كومەك كورسەتۋدىڭ جەكە باعدارلاماسىن ىسكە اسىرۋ كەزىندە:

1) پروباتسيانى جۇزەگە اسىراتىن وزگە دە سۋبەكتىلەرمەن بوساتىلۋعا دايىندالاتىن ادامداردىڭ جۇمىسقا ورنالاسۋى جانە تۇرمىستىق جاعدايى ماسەلەلەرى بويىنشا ءوزارا ءىس-قيمىل جاسايدى;

2) وزىنە قاتىستى پروباتسيا قولدانىلاتىن ادامدارعا قازاقستان رەسپۋبليكاسىنىڭ جۇمىسقا ورنالاسۋ جانە تۇرمىستىق جاعداي ءتارتىبىن رەگلامەنتتەيتىن زاڭناماسىن ءتۇسىندىرۋ بويىنشا جۇمىس جۇرگىزەدى, قۇقىقتارى مەن بوستاندىقتارىن ىسكە اسىرۋ مەن قورعاۋدىڭ قولدانىستاعى قۇقىقتىق تەتىكتەرى تۋرالى حاباردار ەتەدى;

3) باس بوستاندىعىنان ايىرۋ ورىندارىنان بوساتىلعان كەزدە الەۋمەتتىك-قۇقىقتىق كومەك الۋ كولەمى مەن ءتارتىبىن تۇسىندىرەدى;

4) اكىمشىلىك قاداعالاۋدىڭ جانە پروباتسيالىق باقىلاۋدىڭ جۇزەگە اسىرىلۋ ءتارتىبى, سونداي-اق ولاردى بۇزۋدىڭ سالدارلارى تۋرالى الدىن الا حاباردار ەتەدى.

17-باپ. پەنيتەنتسيارلىقتان كەيىنگى پروباتسيا

1. پەنيتەنتسيارلىقتان كەيىنگى پروباتسيا:

1) باس بوستاندىعىنان ايىرۋ تۇرىندەگى جازاسىن وتەۋدەن شارتتى تۇردە مەرزىمىنەن بۇرىن بوساتىلعان;

2) باس بوستاندىعىنان ايىرۋ ورىندارىنان بوساتىلاتىن, وزىنە سوت اكىمشىلىك قاداعالاۋ بەلگىلەگەن;

3) قازاقستان رەسپۋبليكاسى قىلمىستىق كودەكسىنىڭ 73-بابىنا سايكەس باس بوستاندىعىنان ايىرۋ باس بوستاندىعىن شەكتەۋگە اۋىستىرىلعان;

4) قازاقستان رەسپۋبليكاسى قىلمىستىق كودەكسىنىڭ 73-بابىنا سايكەس باس بوستاندىعىنان ايىرۋ ايىپپۇلعا اۋىستىرىلعان;

5) سوت تاعايىنداعان باس بوستاندىعىنان ايىرۋ تۇرىندەگى جازا مەرزىمىن وتەگەن ادامعا قاتىستى قولدانىلادى.

2. باس بوستاندىعىنان ايىرۋ تۇرىندەگى جازاسىن وتەۋدەن شارتتى تۇردە مەرزىمىنەن بۇرىن بوساتىلعان ادامعا قاتىستى پەنيتەنتسيارلىقتان كەيىنگى پروباتسيا قازاقستان رەسپۋبليكاسىنىڭ زاڭناماسىنا سايكەس ونىڭ تۇرعىلىقتى جەرى بويىنشا ىشكى ىستەر ورگاندارى جۇزەگە اسىراتىن پروباتسيالىق باقىلاۋ, سونداي-اق پروباتسيا قىزمەتىنىڭ الەۋمەتتىك-قۇقىقتىق كومەك كورسەتۋ ماسەلەلەرى بويىنشا جاردەمدەسۋى نىسانىندا قولدانىلادى.
3. سوت اكىمشىلىك قاداعالاۋ بەلگىلەگەن ادامعا قاتىستى پەنيتەنتسيارلىقتان كەيىنگى پروباتسيا الەۋمەتتىك-قۇقىقتىق كومەك كورسەتۋ نىسانىندا جۇزەگە اسىرىلادى.
4. باس بوستاندىعىنان ايىرۋ جازاسى باس بوستاندىعىن شەكتەۋگە اۋىستىرىلعان ادامعا قاتىستى پەنيتەنتسيارلىقتان كەيىنگى پروباتسيا وسى زاڭنىڭ 15-بابىندا كوزدەلگەن قاعيدالار بويىنشا جۇزەگە اسىرىلادى.
5. باس بوستاندىعىنان ايىرۋدىڭ سوت تاعايىنداعان مەرزىمىن وتەگەن ادامعا قاتىستى پەنيتەنتسيارلىقتان كەيىنگى پروباتسيا ونىڭ باستاماشىلىعى بويىنشا پروباتسيا قىزمەتىنە ءوتىنىش جاساۋى ارقىلى جۇزەگە اسىرىلادى.

وسى باپتىڭ 1-تارماعىنىڭ 1) تارماقشاسىندا اتالعان, پەنيتەنتسيارلىقتان كەيىنگى پروباتسياعا جاتاتىن ادامعا قاتىستى قازاقستان رەسپۋبليكاسى قىلمىستىق-اتقارۋ كودەكسىنىڭ 169-بابىنىڭ قاعيدالارى بويىنشا پروباتسيالىق باقىلاۋ بەلگىلەنەدى.

وسى باپتىڭ 1-تارماعىنىڭ 3) تارماقشاسىندا اتالعان ادامعا قاتىستى قازاقستان رەسپۋبليكاسىنىڭ قىلمىستىق كودەكسى 44-بابىنىڭ جانە قازاقستان رەسپۋبليكاسىنىڭ قىلمىستىق-اتقارۋ كودەكسى 69-بابىنىڭ قاعيدالارى بويىنشا پروباتسيالىق باقىلاۋ بەلگىلەنەدى.

6. پەنيتەنتسيارلىقتان كەيىنگى پروباتسيا قولدانىلاتىن ادامعا قاتىستى الەۋمەتتىك-قۇقىقتىق كومەك كورسەتۋدىڭ جەكە باعدارلاماسىن جاساۋ كەزىندە مىناداي ءمان-جايلار:

1) الەۋمەتتىك بەيىمدەۋ جانە وڭالتۋ قاجەتتىلىگىن باعالاۋ ءۇشىن قىلمىستىق-اتقارۋ (پەنيتەنتسيارلىق) جۇيەسى مەكەمەسىندە بولۋ ۇزاقتىعى, سونداي-اق ونىڭ ءتۇرى;

2) قىلمىستىق-اتقارۋ (پەنيتەنتسيارلىق) جۇيەسى مەكەمەسىندە بولۋى سەبەبىنەن الەۋمەتتىك پايدالى بايلانىستارىنىڭ ساقتالۋى نەمەسە جوعالۋى;

3) ءوزى دەربەس جۇمىسقا ورنالاسۋ جانە تۇرمىستىق جاعدايىنىڭ مۇمكىندىكتەرى, ەڭبەك داعدىلارىنىڭ ساقتالۋى, سونداي-اق قىلمىستىق-اتقارۋ (پەنيتەنتسيارلىق) جۇيەسى مەكەمەسىندە بولۋ كەزەڭىندە العان ءبىلىمى مەن كاسىبىنىڭ بار-جوعى;

4) قىلمىستىق-اتقارۋ (پەنيتەنتسيارلىق) جۇيەسى مەكەمەسىندە بولۋ كەزەڭىندە وتەلگەن جانە (نەمەسە) وتەلمەگەن تالاپ قويۋ تالاپتارىنىڭ بار-جوعى;

5) ارناۋلى الەۋمەتتىك كورسەتىلەتىن قىزمەتتەردى الۋ قاجەتتىلىگى;

6) پەنيتەنتسيارلىقتان كەيىنگى پروباتسيانى جۇزەگە اسىرۋعا اسەر ەتۋى مۇمكىن وزگە دە ءمان-جايلار ەسكەرىلەدى.

18-باپ. كامەلەتكە تولماعان ادامعا قاتىستى پروباتسيانى جۇزەگە اسىرۋ ەرەكشەلىكتەرى

كامەلەتكە تولماعان ادامعا قاتىستى پروباتسيا:

1) ونىڭ دارا جانە جاس ەرەكشەلىكتەرى ەسكەرىلە وتىرىپ;

2) وتباسىن تارتا وتىرىپ;

3) قورعانشىلىق نەمەسە قامقورشىلىق فۋنكتسيالارىن جۇزەگە اسىراتىن ورگاندارمەن جانە بالا قۇقىقتارىن قورعاۋ جونىندەگى فۋنكتسيالاردى جۇزەگە اسىراتىن ۇيىمدارمەن ءوزارا ءىس-قيمىل جاساي وتىرىپ;

4) ازاماتتارمەن, قوعامدىق بىرلەستىكتەرمەن جانە وزگە دە زاڭدى تۇلعالارمەن كامەلەتكە تولماعان ادامعا الەۋمەتتىك-قۇقىقتىق كومەك كورسەتۋ ماسەلەلەرى بويىنشا ءوزارا ءىس-قيمىل جاساي وتىرىپ جۇزەگە اسىرىلادى.

19-باپ. كامەلەتكە تولماعان ادامعا قاتىستى پروباتسيالىق باقىلاۋدى جۇزەگە اسىرۋ

1. پروباتسيا قىزمەتى:

1) باس بوستاندىعىن شەكتەۋ تۇرىندەگى جازاعا سوتتالعان;

2) شارتتى تۇردە سوتتالعان كامەلەتكە تولماعان ادامعا قاتىستى پروباتسيالىق باقىلاۋدى جۇزەگە اسىرادى.

2. پوليتسيا:

1) باس بوستاندىعىنان ايىرۋ تۇرىندەگى جازاسىن وتەۋدەن شارتتى تۇردە مەرزىمىنەن بۇرىن بوساتىلعان;

2) قازاقستان رەسپۋبليكاسى قىلمىستىق كودەكسىنىڭ 84-بابى ءبىرىنشى بولىگىنىڭ 4) تارماعىندا بەلگىلەنگەن, وزىنە سوت تاربيەلىك ىقپال ەتۋدىڭ ماجبۇرلەۋ شاراسىن تاعايىنداعان كامەلەتكە تولماعان ادامعا قاتىستى پروباتسيالىق باقىلاۋدى جۇزەگە اسىرادى.

3. پروباتسيا قىزمەتى وزىنە قاتىستى پروباتسيالىق باقىلاۋ بەلگىلەنگەن كامەلەتكە تولماعان ادامدى ەسەپكە قويۋ جانە وعان قاجەتتى الەۋمەتتىك-قۇقىقتىق كومەك كولەمىن ايقىنداۋ كەزىندە وسى زاڭنىڭ 18-بابىنىڭ ەرەجەلەرىن ەسكەرە وتىرىپ, قازاقستان رەسپۋبليكاسى قىلمىستىق-اتقارۋ كودەكسىنىڭ 69, 169 جانە 174-باپتارىنا سايكەس شارالار كەشەنىن ىسكە اسىرادى.

قاجەت بولعان كەزدە كامەلەتكە تولماعان ادامعا الەۋمەتتىك-قۇقىقتىق كومەك كورسەتۋدىڭ جەكە باعدارلاماسىندا پەداگوگ پەن پسيحولوگتىڭ قاتىسۋى كوزدەلەدى.

4. وسى باپتىڭ 3-تارماعىندا كورسەتىلگەن شارالارمەن قاتار كامەلەتكە تولماعان ادامعا قاتىستى پروباتسيا قىزمەتى قورعانشىلىق جانە قامقورشىلىق ورگانىنىڭ وكىلدەرىمەن بىرلەسىپ, كامەلەتكە تولماعان ادامنىڭ تۇرعىن ءۇي جاعدايلارىن زەرتتەپ-قاراۋدى اكت جاساي وتىرىپ, توقسان سايىن جۇرگىزەدى.

4-تاراۋ. قورىتىندى ەرەجەلەر

20-باپ. قازاقستان رەسپۋبليكاسىنىڭ پروباتسيا تۋرالى زاڭناماسىن بۇزعانى ءۇشىن جاۋاپتىلىق

قازاقستان رەسپۋبليكاسىنىڭ پروباتسيا تۋرالى زاڭناماسىن بۇزۋ قازاقستان رەسپۋبليكاسىنىڭ زاڭدارىنا سايكەس جاۋاپتىلىققا الىپ كەلەدى.

21-باپ. وسى زاڭدى قولدانىسقا ەنگىزۋ ءتارتىبى

وسى زاڭ العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ قولدانىسقا ەنگىزىلەدى.

قازاقستان رەسپۋبليكاسىنىڭ پرەزيدەنتى ن.نازارباەۆ

استانا, اقوردا, 2016 جىلعى 30 جەلتوقسان

№38-VI قرز