مانەرلەپ سىرعاناۋدىڭ ماسەلەسى شەشىلدى

الماتىدا وتەتىن ۋنيۆەرسيادانىڭ رەسمي اقپاراتتىق سەرىكتەسى قازاقستان ءباسپاسوز كلۋبى مالىمدەگەندەي, دۇنيەجۇزىلىك ۋنيۆەرسياداعا قاتىساتىن قازاقستاننىڭ مانەرلەپ سىرعاناۋ كومانداسىنىڭ اقىرعى ءتىزىمى انىقتالدى. وسىلايشا, قازاقستان چەمپيوناتىنىڭ اقتىق سايىستارىنىڭ ناتيجەسىندە ايەلدەر كومانداسىندا بوس تۇرعان ەكى ورىنعا قاتىستى ماسەلە شەشىلدى. ەرلەر كومانداسىنا دەنيس تەن, ابزال راقىمعاليەۆ جانە ارتۋر پانيحين كىرگەن بولسا, ايەلدەر اراسىنداعى سايىس­تاردا ەل نامىسىن ايزا يمانبەك, ۆەرونيكا شەۆەلەۆا جانە جانسايا ءادىحانوۆا قورعايتىن بولادى. سوچيدەگى وليمپيا ويىندارىنىڭ قولا جۇلدەگەرى دەنيس تەن قىسقى ۋنيۆەرسيادا كەزىندە ەرلەر اراسىنداعى جەكە مانەرلەپ سىرعاناۋ جارىسىنىڭ باس­تى فاۆوريتتەرىنىڭ ءبىرى بولماق. الايدا, باپكەرلەر ايەلدەر كومانداسىنا مەدال ءۇشىن كۇرەس قيىنعا سوعادى دەپ ەسەپتەيدى. – ايەلدەر كومانداسىنداعى جاس قىزداردىڭ ويىنىندا وزدەرىنە ءتان تارتىمدى تۇستارى بار, الار بيىكتەرى ءالى الدا. ەڭ باستىسى, ولار ەل اتىنان بارىنشا جوعارى دەڭگەيدە ونەر كورسەتسە دەيمىن. ايزا يمانبەك العاشقى وندىق تىزىمىنە كىرگەنىن قالايمىن. جاقسىلاپ كۇشىن سالىپ, قوبالجۋىن باسىپ, ءوز ءبيىن تازا ورىنداپ شىعا الاتىن بولسا, ونىڭ قولىنان بۇل كەلەدى. ءبىزدىڭ ايەلدەر قۇراماسىنىڭ ويىنى بارلىعىنىڭ كوڭىلىنەن شىعادى دەپ ۇمىتتەنەمىز, – دەدى قازاقستاننىڭ مانەرلەپ سىرعاناۋ قۇراماسىنىڭ باس باپكەرى قۇرالاي ءۇزىروۆا. جاس مانەرلەپ سىرعاناۋشى ۆەرونيكا شەۆەلەۆا ءۇشىن ۋنيۆەرسيادا ونىڭ مانسابىنداعى ەڭ كۇردەلى سايىسقا اينال­ماق. دۇنيەجۇزىلىك دوداعا دايىندىقتارى قالاي ءجۇرىپ جاتقانى جونىندە ول ءسوزىن  بىلايشا تارقاتتى: – ۋنيۆەرسياداعا قاتىساتىنىمدى ەستىگەندە وتە قاتتى قۋاندىم. وسىنداي دەڭگەيدەگى جارىسقا قاتىسۋ مەن ءۇشىن ۇلكەن قۇرمەت. ءوز كۇشىمە سەنىممەن قارايمىن. بىلەتىنىمنىڭ ءبارىن كورسەتە الامىن دەپ ويلايمىن. قازىر مۇمكىندىگىنشە كوبىرەك جاتتىعۋعا تىرىسىپ, كۇن سايىن 3-4 ساعات مۇزدا جاتتىعۋدامىز. ورايى كەلىپ تۇرعاندا ەسكە سالا كەتەلىك, قىسقى ۋنيۆەرسيادانىڭ بۇكىل تاريحىندا قازاقستاندىق مانەرلەپ سىرعاناۋشىلار ەكى مەدال جەڭىپ العان. 1995 جىلى يسپانيانىڭ حاكاسىندا مارينا حالتۋرينا مەن اندرەي كريۋكوۆ جۇپتىق ويىندا التىن جۇلدەگەر اتانسا, دميتري كازارلىگا مەن ەليزاۆەتا ستەكولنيكوۆا ەلىمىزگە قولا مەدال سىيلادى. ايناش ەسالي, «ەگەمەن قازاقستان» الماتى