الينا رايكوۆا, بياتلونشى: «شابىتتىڭ دا شىرقاۋ شەگى بار»

سەيسەنبى, 27 جەلتوقسان كۇنى «الاتاۋ» شاڭعى-بياتلون كەشەنىندە قازاقستاننىڭ بياتلون چەمپيوناتى اياقتالدى. بۇل ۋنيۆەرسيادا الدىنداعى تەستىك جارىستار بولىپ تابىلادى. وسىناۋ چەمپيوناتتىڭ ناتيجەسىندە قازاقستان بياتلون قۇراماسى جاساقتالدى. اتالمىش كوماندا ءوز ەلىمىزدىڭ تورىندە وتكەلى وتىرعان ستۋدەنتتىك الاماندا ەل نامىسىن قورعايدى. وسى جارىستا وتانداسىمىز الينا رايكوۆادان كۇتەتىنىمىز كوپ. بياتلون بايگەسى باستالعان كەزدە جانكۇيەرلەردىڭ نازارى الينادا بولاتىنى ءسوزسىز. كوكشەتاۋ ءوڭىرىنىڭ تۋماسى الينا بۇعان دەيىن 2015 جىلى وتكەن قىسقى ۋنيۆەرسيادا كەزىندە  15 شاقىرىمدىق قاشىقتىققا سوزىلعان جەكە شاڭعى جۇگىرىسىندە «التىننان» القا تاققان. وسربلەدە توپ جارعان الينا رايكوۆانى ۇلتتىق چەمپيوناتتان كەيىن تاۋىپ الىپ, «ەگەمەن قازاقستان» اتىنان بىرنەشە سۇراق قويعان ەدىك. − ۋنيۆەرسياداعا بار كۇشىمىزدى سالىپ دايىندالىپ جاتىرمىز. جاقسى ناتيجە كورسەتەتىن شىعارمىز دەپ ۇمىتتەنە­مىز. ءبىز ءۇشىن بۇكىل ەلىمىز, بارشا قازاق­ستان, ءتىپتى تۋعان-تۋىسقاندارىمىزعا دەيىن تاقىمدارىن قىسىپ وتىراتىنىن بىلەمىز. سوندىقتان سەنىمدى اقتاۋىمىز كەرەك. − بيىلعى جارىستار ماۋسىمى ءسىزدىڭ سپورتتىق مانسابىڭىزداعى ەڭ كۇردەلى كەزەڭى سياقتى... − شىندىعىندا بيىلعى جارىس كەس­تەلەرى وتە تىعىز. الدى­مەن ۋنيۆەرسيادا وتەدى. ودان كەيىن الەم چەمپيوناتى كۇتىپ تۇر. ىلە-شالا جاپونيادا قىسقى ازيا ويىندارى باستالادى. ارينە, كۇردەلى ءارى جۇيكە شيرىقتىراتىن ماۋسىم. ويتكەنى, 2018 جىلى وتەتىن وليمپيا ويىندارىنا قالاي بولعاندا دا جولداما الۋىمىز قاجەت. ۋنيۆەرسيادا مەن ازيادا كەزىندە وتە جوعارى كورسەتكىشكە قول جەتكىزبەسەك بولمايدى. دەمەك, بۇل جۇلدە ءۇشىن عانا تالاس ەمەس. ەلدىڭ اتاق-ابىرويى, نامىسى ءبىزدىڭ موينىمىزدا. ال جارىستار­دىڭ باستالۋىنا قاراي, جاتتىقتىرۋشى­لار توبى ءار سپورتشىنىڭ مۇمكىندىگى مەن جاعدايىن باقىلاپ وتىرادى. وسى­دان كەيىن بابىنا قاراي قاي سپورت­شى قاي سپورت ءتۇرى بويىنشا جارىس­قا قاتىساتىندىعى جونىندە شەشىم قابىلدايدى. − ءسىز ماۋسىم مارەسىنەن-اق الەم كۋبوگى جارىستارىنا قاتىسىپ كەلەسىز. شاماڭىزدى ءوزىڭىز دە بايقاپ وتىرعان بولارسىز؟ − شىنىمدى ايتسام, ماۋسىم مەن ءۇشىن اسا ءساتتى باستالعان جوق. ماعان تالاي «ءتاج» كيدىرگەن جەكە سا­يىس­تار بولاتىن. بۇل جاعىنان اسا كوڭىل كونشىتەرلىكتەي ناتيجەلەر كورسەتە قويمادىم. جەتى رەت ايىپ ۇپايىن الىپ قالدىم. ودان كەيىن سلوۆەنياداعى پوكليۋك ەستافەتاسىنا دايىندالۋىم كەرەك ەدى. وسىدان كەيىن ءسپرينتتى جۇگىرىپ ءوتىپ, جۇلدە ايماعىنا جەتىپ, 30-ورىنعا تۇراقتادىم. بۇل دا جامان ەمەس. الدە دە ناتيجەلەرىم جاقسارا تۇسەتىندىگىنە سەنەمىن. بىراق تاعى دا اتاپ وتكىم كەلەدى, ءبىز ءۇشىن ەڭ باستى مارە – «ءوز ۇيىمىزدە» وتەتىن ۋنيۆەرسيادا. − ءسىز دە, ءبىزدىڭ قازاقستان بياتلون كومان­داسى دا «الاتاۋ» شاڭعى-بياتلون كەشەنىن بەس ساۋساعىنداي بىلەدى. قالاي بولعاندا دا, بۇل باسەكە­لەس­تەرمەن جارىس جولىنا تۇسكەن كەزدە كادىمگىدەي جەڭىسكە جەتەلەيتىن ارتىقشىلىق بولۋى كەرەك قوي؟ − مۇنى مەن ۇلكەن ارتىقشىلىق دەپ ەسەپتەمەيمىن. ءبارى دە سپورتشىلاردىڭ بابىنا بايلانىستى, دايىندىقتارعا تاۋەلدى. سپورتتىق شابىتتىڭ شىرقاۋ شەگى دەگەن بولادى. «الاتاۋ» كەشەنى ادەت­تەگىدەي بيىكتىكتە ورنالاسقان. جانە جارىسقا قاتىساتىندارعا بىردەي جاعداي جاسالادى. بۇل بيىكتىك ءار سپورتشىعا ءار­تۇرلى باعىنادى. سول سياقتى كليماتقا بەيىمدەلۋ قالاي وتەدى, مۇنىڭ دا ۇلكەن اسەرى بار. بىراق قالاي دەگەندە دە, ءوز ەلىڭدە وتەتىن باسەكەنىڭ كومەگى مەن قولداۋى بولادى. ءبىز مىقتى ناتيجە كور­سەتۋ ءۇشىن بارى­مىزدى سالامىز. − ءسىز قازىر ون­سىز دا جەكە جا­رىس­­­­تار بو­­­­يىن­­­­شا ۋني­­ۆەر­سيا­دا جە­ڭىم­پا­زى ءىس­­پەت­ءتى­سىز. سال­­­­­ماق ءسىز­گە كو­بى­­رەك تۇسە­تىن­دەي... − ارينە, وعان ءسوز بار ما! پسي­­حو­لوگيالىق قىسىم بار, ونى جاسىر­ماي­مىن. بىراق الدىن الا قانداي دا ءبىر بولجامدار جاساپ, كوتەرمە جوسپار قۇرىپ, بىلاي بولادى دەپ ايتقىم كەلمەيدى. قازىر ءبىز شتاتتىق رەجىمدە دايىندالىپ ءجۇرمىز. ناتيجەسىن كورە جاتارمىز. دەگەنمەن, بار كۇشىمىزدى سالىپ, جانكۇيەرلەرىمىزدىڭ كوڭىلىنەن شىعۋعا تىرىساتىنىمىز ءسوزسىز. مەن الدىنعى ۋنيۆەرسياداداعى جەڭىسىمدى قايتالاعىم كەلەدى. اڭگىمەلەسكەن ايناش ەسالي, «ەگەمەن قازاقستان» الماتى