ابايلاڭىز, وتشاشۋ!

بۇگىندە جاڭا جىل مەرەكەسىنىڭ باستى دايىندىعى كوزدىڭ جاۋىن العانداي ەتىپ شىرشا بەزەندىرۋ مەن كەڭ داستارقاندى جايناتىپ قويۋ عانا ەمەس, وتشاشۋدىڭ الۋان ءتۇرىن مولىنان ساتىپ الۋعا دەگەن ۇمتىلىسقا ۇلاسىپ كەتتى. جاڭاجىلدىق تۇنگى اسپانداعى «وتشاشۋ بايگەسىنە» اتسالىسۋعا اسىرەسە, بالا اتاۋلىنىڭ اۋەس كەلەتىنىن ەسكەرسەك, البەتتە, ەڭ الدىمەن قاۋىپسىزدىك جاعىن ەستەن شىعارماۋعا ءتيىسپىز. الماتى توتەنشە جاع­داي­لار دەپارتامەنتىنىڭ قىزمەت­كەرلەرى جەرگىلىكتى پوليتسيا قىزمەت­كەرلە­رىمەن بىرگە قالاداعى ساپاسىز پيروتەحنيكا ونىمدەرىن انىقتاۋ ماقساتىندا, زاڭسىز ونىمدەردى ساتاتىن ورىندارعا تەكسەرۋ جۇمىس­تارىن جۇرگىزۋگە كىرىستى. تجد ينجەنەرلىك-ينسپە­تور­لىق قۇرامى تاراپىنان جىل سايى­ن مەرەكە قارساڭىندا قاتاڭ جۇرگىزىلەتىن تەكسەرۋلەردىڭ ار­قاسىندا, زاڭسىز جولمەن ساتىلاتىن پيروتەحنيكالىق ونىمدەردى ساتۋدىڭ ۋاقىت وتكەن سايىن ازايى­پ كەلە جاتقان­دىعىن ايتا كەتۋ كەرەك. كاسىپكەر­لەر دە كەيىنگى جىلدارى وتشاشۋ بۇيىمدارىن زاڭسىز ساتۋعا ساقتىقپەن قاراپ, سەرتيفي­كاتتالعان ونىمدەرمەن ساۋداسىن قىزدىرۋعا بەت بۇرا باس­تادى. تۇتىنۋشىلاردىڭ وزدەرى دە جەكە باس قاۋىپسىزدىگىنە كوبىرەك كوڭىل بولەتىن بولعاندىقتان, جاڭاجىلدىق وتشاشۋلاردى تەك ارنايى دۇكەندەردە ساتىپ الۋعا ۇمتىلاتىن بولدى. سولاي دەسەك تە, ءتۇرلى-ءتۇستى وتشاشۋ, شۋلى شارتىلداق سياقتى ونىمدەردى پايدالانۋدا قاۋىپسىزدىك ەرەجەلەرىن ساقتاۋدىڭ ماڭىزدىلىعىنا ءمان بەرگەن تجد قىزمەتكەرلەرى پايدالانار الدىندا پيروتەحنيكالىق بۇيىمنىڭ قولدانۋ نۇسقاۋلىعىن مۇقيات وقىپ شىعۋعا, ونىمدەردى قولدانۋعا قاتىستى شەكتەۋلەردى قاتاڭ ساقتاي وتىرىپ, تۇتاتار الدىندا قاۋىپسىز الاڭ تاڭداپ الۋعا, وتشاشۋدىڭ جارامدىلىق مەرزىمى مەن دايىندالعان ۋاقىتىنا ايرىقشا كوڭىل بولۋگە, قولدانۋ ءتاسىلى جونىندەگى ءماتىننىڭ قازاق جانە ورىس تىلدەرىندە انىق ءارى ايقىن قارىپتەرمەن تۇسىندىرىلگەنىنە ءمان بەرۋگە كەڭەس بەرەدى. وسىنداي قاراپايىم قاۋىپ­سىزدىك ەرەجەلەرىن ساقتاعاندا عانا وتشاشۋدان تاراعان جۇلدىزدى ورنەكتەر سۇلۋلىعىن تاماشالاپ قانا قويماي, مەرەكەلىك كوڭىل كۇي مەن قۋانىشقا دا كىربىڭ تۇسپەيتىنىن ۇمىتپاعان ابزال دەي­دى ماماندار. ميرا بايبەك, «ەگەمەن قازاقستان» الماتى