مادەنيەت جانە سپورت ءمينيسترى ارىستانبەك مۇحامەدي ۇلىنىڭ توراعالىعىمەن 2017 جىلى الماتى قالاسىندا وتەتىن 28-ءشى قىسقى ۋنيۆەرسيادا ويىندارىنا دايىندىق بارىسى جونىندە كەڭەيتىلگەن جينالىس ءوتتى, دەپ حابارلايدى
قازاقپارات.
جيىنعا سپورت جانە دەنە شىنىقتىرۋ ىستەرى كوميتەتى, استانا جانە الماتى قالالارىنىڭ سپورت باسقارمالارى, 28-ءشى قىسقى ۋنيۆەرسيادانى ۇيىمداستىرۋ بويىنشا ديرەكتسيا مەن ۇلتتىق شتاتتىق كوماندالار جانە سپورتتىق رەزەرۆ ديرەكتسياسىنىڭ باسشىلارى, ءبىلىم جانە عىلىم مينيسترلىگىنىڭ وكىلدەرى جانە سپورت تۇرلەرى بويىنشا باس باپكەرلەر, مەملەكەتتىك جاتتىقتىرۋشىلار قاتىستى.
وتىرىس بارىسىندا ۇلتتىق قۇراما كوماندانىڭ دايىندىعى بويىنشا سپورت كوميتەتىنىڭ توراعاسى, ۋنيۆەرسيادا ويىندارىن ۇيىمداستىرۋ ماسەلەسى بويىنشا ديرەكتسيا باسشىسىلارىنىڭ باياندامالارى تىڭدالدى. ءار باپكەر ءوز سپورت تۇرلەرى بويىنشا ۇلتتىق قۇراما سپورتشىلارىنىڭ دايىندىعى جونىندە ناقتى اقپاراتتار بەردى. ۋنيۆەرسيادا ويىندارىن ۇيىمداستىرۋ مەن سپورتشىلاردى دايىنداۋ بارىسىندا ورىن العان ماسەلەلەر مينيستر ارىستانبەك مۇحامەدي ۇلىنىڭ قولداۋىمەن شەشىمىن تاپتى.
«بۇگىن ءبىز جاقسى ناتيجەلى وتىرىس وتكىزدىك. ۋنيۆەرسيادانىڭ جالپى ءوتۋ بارىسى مەن ءبىزدىڭ ۇلتتىق قۇراما سپورتشىلارىنىڭ بابىن كەلتىرۋ جونىندە ءبىراز ماسەلەنىڭ باسىن اشىپ, شەشىپ الدىق. ەندىگى ماقساتىمىز – وسى جاسالعان اۋقىمدى ءىستىڭ تولىق قورىتىندىسىن كورۋ. ۋنيۆەرسيادانىڭ باستالۋىنا وتىز كۇننەن استام ۋاقىت قالدى وسى ۋاقىت ارالىعىندا جوسپار بويىنشا ارەكەت ەتۋلەرىڭىزدى تاپسىرامىن. كەلگەن ءاربىر قوناق, حالىقارالىق ۇيىم وكىلدەرى مەن سپورتشىلار قازاقستاننىڭ قارقىندى دامىپ كەلە جاتقان قۋاتتى ەل ەكەنىن كورەدى دەپ سەنەمىن. ەلباسى نۇرسۇلتان ءابىش ۇلىنىڭ سارابدال ساياساتىنىڭ ارقاسىندا وسىنداي ۇلكەن جوبالاردى قولعا الىپ وتىرمىز. دەمەك, بىزگە جۇكتەلگەن مىندەتىمىزدى ابىرويمەن اتقارۋعا بار كۇش جىگەرىمىزدى سالۋىمىز كەرەك», – دەدى ارىستانبەك مۇحامەدي ۇلى ءوزىنىڭ قورىتىندى سوزىندە.
