نازارباەۆ داعدارىسقا قارسى كەڭەس قۇرۋدى ۇسىندى

قازاقستان پرەزيدەنتى نۇرسۇلتان نازارباەۆ ەۋرازيالىق ەكونوميكالىق وداقتاعى بىرقاتار ىشكى پروبلەمالاردى اتاپ, بىرلەستىك اياسىندا داعدارىسقا قارسى كەڭەس قۇرۋدى ۇسىندى, - دەپ حابارلايدى ريا نوۆوستي. "وسى ماسەلەلەردى زەرتتەۋ ءۇشىن داعدارىسقا قارسى كەڭەس قۇرۋ كەرەك, وعان الەمدىك دەڭگەيدەگى, ءوزىمىزدىڭ ساراپشىلاردى تارتامىز. كەڭەس كوميسسيا قۇرىلىمىندا ستراتەگيامىزعا قاراماستان, قازىرگى جالپى بيۋروكراتيانىڭ اياسىندا ەرەكشە بولۋى تيىس", - دەدى نازارباەۆ جوعارعى ەۋرازيالىق ەكونوميكالىق كەڭەستىڭ وتىرىسىندا. نازارباەۆ كەڭەستىڭ جۇمىسى تەرەڭ ساراپتاماعا, ۇسىنىستاردى دايارلاۋعا جانە پروبلەمالاردى وڭتايلى شەشۋگە باعىتتالۋى ءتيىس ەكەنىن اتاپ ءوتتى. "كۇردەلى ەكونوميكالىق جاعدايلاردا ءبىر-بىرىمىزگە كومەككە كەلۋ جولدارىن ءبىلۋىمىز كەرەك. سوندىقتان وسى ماسەلەلەردى قاراستىراتىن ورگان كەرەك", - دەدى قازاقستان پرەزيدەنتى. ونىڭ ايتۋىنشا, ەكونوميكالىق قارىم-قاتىناسقا وداقتىڭ ىشكى ماسەلەلەرىنىڭ شەشىلمەۋى اسەر ەتەدى. "وعان ءوزارا ساۋدا, ءاربىر ەلدىڭ قوسىمشا تالاپتارى مەن شەكتەۋلەرى, تاۋار ترانزيتىندەگى قيىندىقتار, نارىققا كىرۋ كەزىندەگى قامتاماسىز ەتىلەتىن تولەمدەر, جەرگىلىكتى بيلىك تاراپىنان بولاتىن كەدەرگىلەر جانە تاعى دا باسقالار كىرەدى", - دەپ ءتۇسىندىردى نازارباەۆ. "بۇل پروبلەمالاردىڭ ءاردايىم بولاتىنىن جانە بولعانىن تۇسىنەمىز, ولار ۋاقىتشا, باستاپقى كەزەڭدە ءاربىر ينتەگراتسيالىق پروتسەسستە بولاتىن جاعدايلار. سوعان قاراعاندا, ەلدەردىڭ بيلىگى مەن بيزنەسى بىرىگىپ جۇمىس ىستەۋى ءۇشىن قاجەتتى تاجىريبەگە, ءبىر-بىرىنە ۇيرەنىسۋگە ۋاقىت كەرەك شىعار, بىراق ونىڭ تەزىرەك بولعانى دۇرىس", - دەپ مالىمدەدى نازارباەۆ.