اۋىلشارۋاشىلىق ونىمدەرىن قايتا وڭدەۋگە باسىمدىق بەرىلەدى

2017 جىلدان باستاپ كوكتەمگى دالالىق جۇمىستارعا بەرىلەتىن كرەديت جىلدىق 3%-عا دەيىن ازايتىلاتىن بولادى. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا اۋىل شارۋاشىلىعى مينيسترلىگى وسىمدىك شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتىنىڭ ديرەكتورى اجار قاجىبەكوۆا مالىمدەدى. ونىڭ ايتۋىنشا, وسىمدىك ءوسىرۋ ونىمدەرىن ءتيىمدى دامىتۋ ماقساتىندا ءونىمدى قايتا وڭدەۋ جانە وتكىزۋ ينفراقۇرىلىمىنا بايلانىستىرا وتىرىپ, وندىرىستەردى وڭىرلىك مامانداندىرۋ قامتاماسىز ەتىلەتىن بولادى. «بۇل ماقساتتا ءونىمدى ساقتاۋ, تاسىمالداۋ, قايتا وڭدەۋ جانە وتكىزۋ ينفراقۇرىلىمىن سالۋ, مينەرالدى تىڭايتقىشتار مەن پەستيتسيدتەردى پايدالانۋ, سونداي-اق جوعارى رەپرودۋكتسيالى تۇقىم ءوندىرۋ جانە پايدالانۋ قولعا الىناتىن بولادى, سونىڭ ارقاسىندا مول استىق جانە ساپالى ءونىم الۋعا مۇمكىندىك تۋادى», – دەدى ا.قاجىبەكوۆا. سونداي-اق دەپارتامەنت ديرەكتورى گەكتار بويىنشا سۋبسيديالاۋدان قايتا وڭدەۋگە بەرىلگەن ءونىمدى سۋبسيديالاۋعا ءوتۋ وسىمدىك ءوسىرۋ سالاسىنداعى باستى وزگەرىس ەكەنىن اتاپ ءوتتى. «قايتا وڭدەلەتىن مايلى داقىل مەن قانت قىزىلشاسىن سۋبسيديالاۋ قايتا وڭدەيتىن كاسىپورىنداردىڭ وندىرىستىك قۋاتتىلىعىن ارتتىرۋعا ىقپال ەتەدى», – دەدى ول. بۇدان بولەك, كوكتەمگى ەگىس جۇمىستارىنا ارنالعان نەسيە ءداندى داقىلداردان باسقا, كارتوپ, كوكونiس-باقشا, مايلى جانە باسقا دا داقىلداردى ەگۋگە بەرىلەدى. ا. قاجىبەكوۆانىڭ ايتۋىنشا, «قازاگرو» ۇبح» اق-نىڭ قارجى ۇيىمدارى ارقىلى بەرىلەتىن نەسيەلەر بويىنشا ءتيىمدى پايىزدىق مولشەرلەمەنى بەلگىلەۋ جوسپارلانۋدا. «ماسەلەن, كەلەسى جىلدان باستاپ كوكتەمگى-دالالىق جۇمىستارعا ارنالعان كرەديت سوڭعى تۇتىنۋشى ءۇشىن 3 %-دىق جىلدىق مولشەرلەمەمەن بەرىلەدى», – دەدى دەپارتامەنت ديرەكتورى. ايدار ورىسباەۆ, "ەگەمەن قازاقستان".