اقتوبە قالاسىندا العاش رەت «Aktobe kids» مونتەسسوري ورتالىعى اشىلدى. وسكەلەڭ ۇرپاقتى تاربيەلەۋ مەن وقىتۋ ءۇشىن قاجەتتى جاڭا نىساننىڭ ىسكە قوسىلۋىنا اقتوبە وبلىسىنىڭ اكىمى بەردىبەك ساپارباەۆ قاتىستى.
-بۇگىن اقتوبەدە ماڭىزدى نىسان اشىلىپ وتىر. ءاربىر بالانىڭ وزىندىك بىرەگەي مۇمكىندىگى بار. سونى دەر كەزىندە انىقتاپ, دامىتۋ قاجەت. «جاستا بەرگەن تاربيە, جاس شىبىقتى يگەندەي» دەپ بەكەر ايتپاعان. بۇل بۇلدىرشىندەردىڭ بويىنداعى قابىلەتتى ەرتەرەك اشۋعا العىشارت جزاسايدى. وسىنداي مەتوديكا بىزدە 4 بالاباقشادا قولدانىستا بار. دەگەنمەن وبلىس ورتالىعىنداعى مامانداندىرىلعان ورتالىق ءبىرىنشى رەت اشىلىپ وتىر. ءوز تاراپىمىزدان ءبىز مۇنداي جوبالاردى جۇزەگە اسىرۋعا قولداۋ كورسەتۋگە دايىنبىز, – دەدى ورتالىقتىڭ اشىلۋىندا ءسوز سويلەگەن ايماق باسشىسى.
ورتالىق 500 م2 الاڭعا ورنالاسقان جانە 75 ورىنعا ەسەپتەلگەن. مونتەسسوري ادىسىمەن سەرتيفيكاتتالعان وقىتۋشىلار ءبىر جاستان التى جاسقا دەيىنگى بالالارعا ءتالىم بەرەدى.
ورتالىق وكىلدەرىنىڭ ايتۋىنشا, نەگىزگى ماقسات - بالانىڭ تۇلعا ەرەكشەلىكتەرى مەن داعدىلارىنىڭ قالىپتاسۋىنا مۇمكىنشىلىك تۋعىزۋ جانە دە ينتەلەكتۋالدىق, جەكە باس قاسيەتتەرى مەن فيزيولوگيالىق دامۋىن جۇزەگە اسىرۋ بولىپ تابىلادى. ياعني تاربيە جانە ءبىلىم بەرۋ پروتسەسى ۇنەمى قاتار جۇرەدى. جۇمىس جاساۋ بارىسىندا بالانىڭ جاس ەرەكشەلىك پسيحولوگياسى, دامۋ پروتسەسىنىڭ پسيحوفيزيولوگيالىق زاڭدىلىقتارى ەسكەرىلە وتىرىپ, ءاربىر بالاعا ەرەكشە كوزقاراسپەن قارىم - قاتىناس جاسالادى.
سونىمەن قاتار, بۇلدىشىندەردىڭ جان-جاقتى دامۋى ءۇشىن شاحمات, مەنتالدى اريفمەتيكا, زۋمباكيدس ويىندارى جانە قازاق, اعىلشىن تىلدەرى ۇيرەتىلەدى.
ساتىبالدى ساۋىرباەۆ, "ەگەمەن قازاقستان".
اقتوبە.
