بۇگىن قازاقستان پرەزيدەنتى نۇرسۇلتان نازارباەۆ رەسەي فەدەراتسياسىنا جۇمىس ساپارى اياسىندا سانكت-پەتەربۋرگتەگى وندىرىسكە قاجەتتى زاماناۋي جوعارىتەحنولوگيالى قۇرىلعىلار شىعارۋدا الەمدە كوش باستاپ تۇرعان كومپانيالاردىڭ ءبىرى سانالاتىن «دياكونت» اق كاسىپورنىندا بولدى. ەلباسى وعان رەسەي پرەزيدەنتى ۆلاديمير پۋتينمەن بىرگە باردى.
«دياكونت» - وندىرىستە عىلىمنىڭ تيىمدىلىگىن ارتتىرۋعا, قاۋىپسىزدىكتى قامتاماسىز ەتۋگە ارنالعان جوعارى تەحنولوگيالى قۇرىلعىلار شىعارۋمەن الەمگە اتى ايگىلى كاسىپورىن. بۇگىندە بۇل كاسىپورىندا الەمدىك دەڭگەيدەگى جوعارى ساپالى, يننوۆاتسيالىق ونىمدەر شىعارىلادى. ماسەلەن, دياگنوستيكا مەن جوندەۋ جۇمىستارىنا ارنالعان روبوتوتەحنيكالىق كەشەندەر, رادياتسياعا ءتوزىمدى تەلەۆيزيالىق كامەرالار, اتوم ەنەرگياسىنا ارنالعان تەحنيكالىق ۇدەرىستەردى باسقارۋدىڭ اۆتوماتتاندىرىلعان جۇيەلەرى سياقتى قۇرىلعىلار جاسايدى.
قازاقستاندا «دياكونتتىڭ» دياگنوستيكالىق روبوتتارى 2009 جىلدان بەرى قولدانىستا. ول «ينتەرگاز-تسەنترالنايا ازيا» كومپانياسىنىڭ جۇمىسىنا ەنگىزىلگەن. سونداي-اق, رادياتسياعا ءتوزىمدى كامەرالارى بەس جىلدان بەرى ەنەرگەتيكا مينيسترلىگىنىڭ «يادرولىق فيزيكا ينستيتۋتىندا» ناتيجەلى جۇمىس ىستەۋدە. ال 2016 جىلدان بەرى قاراعاندىداعى "تۋربومەحانيكالىق زاۋىتتاعى" امەريكالىق قۇرىلعىلاردىڭ ورنىن وسى «دياكونتتىڭ» الدەقايدا كۇشتى ءارى ءتيىمدى ونىمدەرى الماستىرا باستادى.
دينارا بىتىكوۆا, «ەگەمەن قازاقستان».
سانكت-پەتەربۋرگتەن
دينارا بىتىكوۆا, «ەگەمەن قازاقستان».
سانكت-پەتەربۋرگتەن
