مينيسترلىكتىڭ حابارلاۋىنشا, وندا سەگىز ەكيپاج مۇشەسى مەن 84 جولاۋشى بولعان. ولاردىڭ اراسىندا اسكەريلەرمەن قاتار الەكساندروۆ ءانسامبلى, ء"بىرىنشى ارنا", "زۆەزدا" جانە نتۆ تەلەارنالارىنىڭ جۋرناليستەرى دە بار. "تۋ-154 ۇشاعىندا رەسەيدىڭ قارۋلى كۇشىنىڭ اسكەري قىزمەتكەرلەرىمەن قاتار جاڭا جىلمەن قۇتتىقتاۋ ءۇشىن سيريانىڭ "حمەيميم" اۋە بازاسىنا بارا جاتقان الەكساندروۆ ءانسامبلى, رەسەيلىك باق-تىڭ توعىز وكىلى بولعان", دەيدى رف قورعانىس مينيسترلىگى. سونىمەن قاتار, مينيسترلىك تاراتقان حابارلامادا ۇشاق اپاتىنان ءتىرى قالعاندار جوق ەكەنى ايتىلعان.
الەكساندروۆ ءانسامبلى تۋرالى نە بىلەمىز؟
رەسەي اسكەرىنىڭ ا.ۆ.الەكساندروۆ اتىنداعى ءان جانە بي ءانسامبلى - رەسەيدىڭ ەڭ ءىرى شىعارماشىلىق ۇجىمى. ول 1928 جىلى 12 قازاندا قۇرىلعان. سودان بەرى انسامبل قۇرامى دا, اتاۋى دا بىرنەشە رەت وزگەردى.
العاشىندا 12 ادامدىق بولعان ۇجىمنىڭ قۇرامى 1937 جىلى 274 ادامعا جەتكەن. 1948 جىلى 313 بولسا, قازىر 186 ادامنان تۇرادى. ال ۇشاققا مۋزىكانتتاردىڭ 68-ءى مىنگەن. سوڭعى مالىمەتتەر بويىنشا, ءانسامبلدىڭ كوركەمدىك جەتەكشىسى ۆالەري حاليلوۆ تا ۇشاقتا بولعان.
الەكساندروۆ ءانسامبلى 1935 جىلى 27 قاراشادان باستاپ م.ۆ فرۋنزە اتىنداعى قىزىل اسكەر ورتالىق ءۇيىنىڭ اسكەري اندەر ءانسامبلى دەپ اتالعان. 1949 جىلدان باستاپ ونىڭ نەگىزىن سالۋشىسى ا.ۆ.الەكساندروۆ قۇرمەتىنە اتالا باستاعان. ا.ۆ.الەكساندروۆ اتىنداعى كەڭەس اسكەرىنىڭ ءان جانە بي ءانسامبلى 1978 جىلى ەلۋ جىلدىعى قارساڭىندا ەڭ جوعارى كاسىبي اتتەستاتسيادان ءوتىپ, اكادەميالىق دەگەن اتاۋ الدى. 1998 جىلدان باستاپ رەسەي اسكەرىنىڭ ا.ۆ. الەكساندروۆ اتىنداعى ءان جانە بي اكادەميالىق ءانسامبلى دەپ اتالا باستادى.
دوكتور ليزا كىم؟
ء"ادىل كومەك" ("سپراۆەدليۆايا پوموشش") قورىنىڭ جەتەكشىسى گلينكا ەليزاۆەتا پەتروۆنانىڭ ۇشاقتا بولعانى تەك اپاتقا ۇشىراعانداردىڭ تولىق ءتىزىمى جاريالانعاندا عانا بەلگىلى بولدى. دوكتور ليزا اتانىپ كەتكەن ەليزاۆەتا گلينكا رەسەي پرەزيدەنتى جانىنداعى ازاماتتىق قوعام مەن ادام قۇقىعىن دامىتۋ كەڭەسىنىڭ مۇشەسى, رەسەيگە بەلگىلى فيلانتروپ, ماماندىعى - دارىگەر-رەانيماتولوگ.
دوكتور ليزا 2007 جىلى ء"ادىل كومەك" قايىرىمدىلىق قورىن قۇردى. بۇل قور ونكولوگيالىق جانە باسقا دا اۋىر ناۋقاسقا شالدىققان, تۇرمىسى ناشار ادامدارعا, ۇيسىزدەرگە ماتەريالدىق قولداۋ مەن دارىگەرلىك كومەك كورسەتەدى. قور ەرىكتىلەرى اپتا سايىن مۇقتاج جاندارعا تاماق, ءدارى-دارمەك تاراتىپ, تەگىن مەديتسينالىق جانە زاڭگەرلىك كومەك كورسەتەدى.
2009 جىلى رەن-تۆ ەليزاۆەتا گلينكا تۋرالى "دوكتور ليزا" اتتى دەرەكتى فيلم ءتۇسىردى. ال بيىل 8 جەلتوقساندا ەليزاۆەتا گلينكا قۇقىق قورعاۋ قىزمەتىندەگى ەرەكشە جەتىستىكتەرى ءۇشىن مەملەكەتتىك سىيلىق لاۋرەاتى اتانعان بولاتىن.
جۋرناليستەردەن كىمدەر بولدى؟
نتۆ تەلەارناسىنان ۇشاقتا كوررەسپوندەنت ميحايل لۋجەتسكي, وپەراتور ولەگ پەستوۆ, دىبىس وپەراتورى ەۆگەني تولستوۆ بولعان.
ء"بىرىنشى ارنانىڭ" ءباسپاسوز قىزمەتى اپاتقا ۇشىراعان ۇشاقتا ءۇش قىزمەتكەرى بولعانىن حابارلادى. ولار: ارنا ءتىلشىسى دميتري رۋنكوۆ, وپەراتور ۆاديم دەنيسوۆ, دىبىس وپەراتورى الەكساندر سويدوۆ.
بۇلاردان بولەك بورتتا «زۆەزدا» تەلەارناسىنىڭ ءتىلشىسى پاۆەل وبۋحوۆ, وپەراتور الەكساندر سۋرانوۆ, وپەراتوردىڭ كومەكشىسى ۆالەري رجەۆسكي بولعان.
دايىنداعان گۇلنۇر قۋانىشبەكقىزى,
"ەگەمەن قازاقستان"
