قازينۆەستبانك بارلىق وپەراتسيالاردى توقتاتتى

قازاقستاننىڭ كوممەرتسيالىق قازينۆەستبانكى  دۇيسەنبىگە دەيىن بانكتىك وپەراتسيالاردىڭ بارلىق ءتۇرىن توقتاتىپ قويدى, دەپ حابارلادى abctv.kz پورتالى بانكتىڭ كولل-ورتالىعىنا سىلتەمە جاساپ. «تەحنيكالىق ىركىلىس تۋىندادى, سوعان بايلانىستى دۇيسەنبىگە دەيىن وپەراتسيانىڭ بارلىق ءتۇرى توقتاتىلدى.  قازىر ەشبىر وپەراتسيا جۇمىس ىستەمەي تۇر.  قانداي دا ءبىر مالىمەت بەرە المايمىز, رەسمي مالىمدەمە دۇيسەنبى كۇنى جاسالادى», – دەپ ءتۇسىندىردى كولل-ورتالىق. بانك وكىلدەرى بولىمشەلەردىڭ بارلىعى قازىرگى تاڭدا جۇمىس ىستەمەي تۇرعانىن ايتتى. «ءبىزدىڭ بىلەتىمىز: تەحنيكالىق ىركىلىس تۋىنداعان. قازىر قانداي دا ءبىر سۇراققا جاۋاپ بەرە المايمىز», – دەدى قاۋىرت جەلىنىڭ وپەراتورى. دەرەككوزگە سىلتەمە جاساعان باق-تىڭ اقپاراتى بويىنشا, قازينۆەستبانك تەحنيكالىق دەفولتقا جول بەرگەن.  اتالمىش قارجى ۇيىمىنا  قاتىستى  شەشىمدى دۇيسەنبى كۇنى ۇلتتىق بانك قابىلدايدى. بارشاعا بەلگىلى, ۇلتتىق بانك 2016 جىلدىڭ 1 قاراشاسىنان باستاپ «قازينۆەستبانك» اق جانە «Delta bank» اق-نىڭ  جەكە تۇلعالاردان جاڭا دەپوزيت قابىلداۋ, جەكە تۇلعالارعا بانكتىك ەسەپ-شوت اشۋ ليتسەنزيالارىن 3 اي مەرزىمگە توقتاتىپ قويعان بولاتىن. ليتسەنزيانى توقتاتۋ تۋرالى شەشىم جوعارىدا اتتارى اتالعان بانكتەر تاراپىنان جەكەلەگەن زاڭ بۇزۋشىلىقتارعا جانە ىشكى باقىلاۋ جۇيەسىن جاقسارتۋ قاجەتتىلىگىنە بايلانىستى توقتاتىلعان. ليتسەنزيانى توقتاتۋ جۇمىس ىستەپ تۇرعان دەپوزيتتەرگە جانە بانكتەر كليەنتتەرىنە قىزمەت كورسەتۋگە, سونداي-اق زاڭدى تۇلعالاردان دەپوزيتتەر تارتۋعا اسەر ەتپەيدى. 2016 جىلدىڭ  1 قازانىنداعى جاعداي بويىنشا  «قازينۆەستبانكتىڭ» جەكە تۇلعالاردان قابىلداعان دەپوزيت كولەمى 16,4 ملرد تەڭگە نەمەسە  جەكە تۇلعالاردىڭ دەپوزيتىنىڭ جالپى كولەمىنىڭ 2,3 پايىزىن قۇرادى. KASE مالىمەتى بويىنشا, 2016  جىلدىڭ 1 قاراشاسىندا قازينۆەستبانك اكتسيونەرلەرىنىڭ قۇرامى كەلەسىدەي بولدى: گاۋحار قاپپاروۆا - 9,98%; باعدات ابىلقادىروۆ, مۇرات الماعامبەتوۆ, سەرىك بەيسەنبەكوۆ, ايدار جاقسىلىقوۆ, ايدوس ەرجانوۆ, نۇرجان قايىربەكوۆ, ەرجانات قاليجانوۆ, ءلاززات تىلەۋباەۆا ارقايسىسى – 9,3 %; بەللا چەرشنوۆەتس – 7,1%. قر ۇلتتىق بانكىنىڭ مالىمەتى بويىنشا, «قازينۆەستبانك» 2016 جىلعى قاڭتار-قىركۇيەكتىڭ قورىتىندىسى بويىنشا, ەلدىڭ 34 بانكى اراسىندا اكتيۆ كولەمى بويىنشا  17-ورىندى يەلەندى.