فرانتسيادا كۇن باتارەيالارىنان اۆتوجول سالىندى

22 جەلتوقسان كۇنى فرانتسيانىڭ باتىسىندا كۇن باتارەيالارى بار پانەلدەرمەن جابدىقتالعان الەمدەگى العاشقى اۆتوجول اشىلدى. سالتاناتتى شاراعا وسى ەلدىڭ ەكولوگيا, تۇراقتى دامۋ جانە ەنەرگەتيكا ءمينيسترى سەگولەن رۋايال قاتىستى, دەپ حابارلايدى تاسس. مينيستر شارا بارىسىندا بۇل جوبا باسقا دا مەملەكەتتەردى قىزىقتىراتىنىنا ۇمىتتەنەتىنىن ايتتى. "مارراكەشتەگى بۇۇ-نىڭ كليمات تۋرالى كونفەرەنتسياسىندا ءبىر جىل بۇرىن وسى جوبا تانىستىرىلعان بولاتىن. مىنا جولدىڭ بەتىنە كۇن ساۋلەسىن ەلەكتر ەنەرگياسىنا اينالدىراتىن پاننو ورنالاستىرىلعان. ول اۋىل شارۋاشىلىعىنا قاجەتتى جەرلەردى ۇنەمدەۋگە مۇمكىندىك بەرەدى", - دەدى مينيستر. اتالعان جول تۋرۋۆر قالاسىندا ورنالاسقان. قازىر پايدالانۋعا جولدىڭ العاشقى كيلومەترى بەرىلدى. ول جەردە 28 شارشى مەتر كۇن باتارەيالارى بار. مەملەكەت قارجىلىق قولداۋ كورسەتكەن جوباعا جالپى 5 ملن ەۋرو كەتكەن. ال كۇن باتارەيالارى 5 مىڭ تۇرعىنى بار قالانى ەلەكتر ەنەرگياسىمەن قامتۋعا مۇمكىندىك بەرەدى دەپ كۇتىلۋدە. ءمينيستردىڭ ايتۋىنشا, فرانتسيادا 2017 جىلى جاڭا دامۋ باعدارلاماسى قابىدانادى. باعدارلاما اياسىندا 5 جىلدىڭ ىشىندە مىڭ كيلومەتر جولدى كۇن پانەلدەرىمەن جابدىقتاۋ جوسپارلانۋدا. ءبىر ايتا كەتەرلىگى, ەڭ العاش كۇن باتارەيالارى تاجىريبە رەتىندە نيدەرلاندىدا ۆەلوسيپەد جولىنا قولدانىلعان. باسىندا كۇن باتارەيالارىنىڭ قىس كەزىندە تەز توزىپ كەتەتىنى بايقالعان. كەيىن ماماندار بۇل كەمشىلىكتى جويدى. ەندى گەرمانيا كەلن قالاسىنىڭ ماڭىندا كۇن باتارەيالارى بار جول سالۋدى جوسپارلاپ وتىر.