زەينەتاقى قورىنا تەكسەرۋ جۇرگىزىلىپ جاتىر

2016 جىلعى 21 جەلتوقساننان باستاپ قازاقستان رەسپۋبليكاسى ۇلتتىق بانكىنىڭ قاتىسۋىمەن «بىرىڭعاي جيناقتاۋشى زەينەتاقى قورى» اكتسيونەرلىك قوعامىنىڭ قىزمەتىنە تەكسەرۋ جۇرگىزىلۋدە, دەپ حابارلادى ۇلتتىق بانكتىڭ ءباسپاسوز قىزمەتى. تەكسەرۋ بجزق اكتسيونەرلىك قوعامىنىڭ مەنشىكتى اكتيۆتەردى ينۆەستيتسيالاۋعا قاتىستى جاسالعان وپەراتسيالارى بويىنشا جۇزەگە اسىرىلۋدا. «بجزق» اق-تىڭ مەنشىكتى اكتيۆتەرى ونىڭ كاپيتالى جانە شارۋاشىلىق قىزمەتىنىڭ ناتيجەلەرى ەسەبىنەن قالىپتاستىرىلادى. «بجزق» اق مەنشىكتى اكتيۆتەردى دەربەس باسقارادى. ازاماتتاردىڭ زەينەتاقى جيناقتارى «بجزق» اق-تىڭ بالانسىنان بولىنگەن جانە بولەك ەسكەرىلەدى. ۇلتتىق بانك زەينەتاقى جيناقتارىن ينۆەستيتسيالاۋدى قازاقستان رەسپۋبليكاسىنىڭ ۇلتتىق قورىن باسقارۋ جونىندەگى كەڭەس ماقۇلداعان 2016 جىلعا ارنالعان باعىتتار بويىنشا عانا جۇزەگە اسىرادى. بۇل رەتتە 2016 جىلى زەينەتاقى اكتيۆتەرىن ەكونوميكانىڭ ناقتى سەكتورىنىڭ جەكە كومپانيالارىنىڭ قارجى قۇرالدارىنا ينۆەستيتسيالاۋ كوزدەلمەيدى. ۇلتتىق بانك قۇقىق قورعاۋ ورگاندارىنىڭ ءىس-ارەكەتتەرىنە تۇسىنىك بەرۋگە قۇقىلى ەمەس. احۋالعا قۇقىقتىق باعالاۋ تەكسەرۋ اياقتالعان سوڭ جانە ءتيىستى پروتسەسسۋالدىق شەشىمدەر شىعارىلعاننان كەيىن بەرىلەدى. 2016 جىلعى 11 ايدىڭ قورىتىندىسى بويىنشا زەينەتاقى اكتيۆتەرىنىڭ كىرىستىلىگى 8,15%, بۇل كەزەڭدەگى ينفلياتسيا دەڭگەيى 7,5% مولشەرىندە بولدى, بۇل زەينەتاقى جيناقتارىنىڭ ينفلياتسيادان تولىق قورعالۋىن قامتاماسىز ەتەدى. پورتفەلدىڭ قۇرىلىمى, ينۆەستيتسيالىق قىزمەتى جانە كىرىستىلىك تۋرالى جان-جاقتى اقپارات اي سايىن «بجزق» اق-تىڭ سايتىندا (www.enpf.kz) جاريالانادى.