ساعاديەۆ قاراعاندى متۋ ۇجىمىن جاڭا رەكتورمەن تانىستىردى

قر ءبىلىم جانە عىلىم ءمينيسترى ەرلان ساعاديەۆ كەنشىلەر قالاسىنا ارنايى كەلىپ, قاراعاندى مەملەكەتتىك تەحنيكالىق ۋنيۆەرسيتەتىنىڭ ۇجىمىن جاڭا رەكتور – بەلگىلى عالىم, پروفەسسور, تەحنيكا عىلىمدارىنىڭ دوكتورى مارات يباتوۆپەن تانىستىردى. تاياۋدا استانادا مەملەكەتتىك جوعارى وقۋ ورىندارىنىڭ باسشىلىعىنا كانديداتتاردى انىقتاۋ جونىندەگى رەسپۋبليكالىق كونكۋرستىق كوميسسيانىڭ وتىرىسى وتكەن بولاتىن. رەسپۋبليكالىق كونكۋرستىق كوميسسيا, اڭگىمەلەسۋ مەن جوعارى وقۋ ورنىن دامىتۋ جونىندەگى ۇسىنىلعان باعدارلامانى تالقىلاۋ ناتيجەسىندە, قاراعاندى مەملەكەتتىك تەحنيكالىق ۋنيۆەرسيتەتىنىڭ رەكتورى لاۋازىمىنا مارات كەڭەس ۇلى يباتوۆتى تاعايىنداۋدى ۇسىندى. رەكتور جاڭا تالاپتارعا سايكەس, ناقتىراق ايتقاندا, اشىق كونكۋرس ادىسىمەن سايلاندى. بۇرىنعى جىلدارى مەملەكەتتىك جوعارى وقۋ ورىندارىنىڭ رەكتورلارى قر ءبىلىم جانە عىلىم ءمينيسترى تاعايىندايتىن. جانە وقۋ ورىندارىنىڭ باسشىلارى ءوز قىزمەتتەرىن ەكى جانە ودان دا كوپ مەرزىمنەن باسقارىپ كەلدى. بۇرىن دا حابارلانعانداي, اتالعان قىزمەتكە تاعايىنداۋدىڭ جاڭا جولى باسقارۋداعى دەربەستىكتى جەتىلدىرۋ مەن ءبىلىم ساپاسىن ارتتىرۋ, سونىمەن قاتار ولاردىڭ قوعام الدىنداعى جاۋاپكەرشىلىگىن كۇشەيتۋ ماقساتىن كوزدەيدى. م. يباتوۆ قارمتۋ ءۇشىن ءوز ادامى: ول بۇرىن وسى ۋنيۆەرسيتەتتە فاكۋلتەت دەكانى, وقۋ ءىسى جونىندەگى پرورەكتور, ءبىرىنشى پرورەكتور قىزمەتتەرىن اتقارعان. سوڭعى ءتورت جىلدا تەمىرتاۋ قالاسىندا ورنالاسقان قاراعاندى مەملەكەتتىك يندۋستريالدىق ۋنيۆەرسيتەتىنىڭ رەكتورى بولدى. قر پرەزيدەنتى نۇرسۇلتان نازارباەۆ باستاعان تۇلعالار ءبىلىم العان ايگىلى ۋنيۆەرسيتەتتى بىلىكتى عالىم, تاجىريبەلى باسشى م. يباتوۆ جاڭا بيىكتەرگە كوتەرەدى دەگەن سەنىم مول. ەستەرىڭىزگە سالا كەتسەك, بۇعان دەيىن قازاقستاندا ءۇش مەملەكەتتىك جوو-نىڭ رەكتورى تاڭدالعانىن حابارلاعان بولاتىنبىز.  قايرات ءابىلدينوۆ, "ەگەمەن قازاقستان".