قوستانايدا جۇزدەگەن كۇدىكتى راقىمشىلىققا ىلىنەدى

قوستاناي وبلىسىندا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭعا سايكەس, 300-دەن استام كۇدىكتىنىڭ قىلمىستىق تەرگەۋىن توقتاتۋ جوسپارلانۋدا, دەپ حابارلادى قازاقپارات. ولاردىڭ اراسىندا كامەلەت جاسقا تولماعاندار, جەڭىل جانە ورتاشا قىلمىستىق ارەكەت بويىنشا كۇدىكتى بولعاندار بار. «راقىمشىلىق نەگىزىنەن الەۋمەتتىك تۇرعىدا ءالسىز توپ ازاماتتارىن, كامەلەتتىك جاسقا تولماعانداردى, جۇكتى ايەلدەردى جانە كامەلەت جاسقا تولماعان بالالارى بار ايەلدەردى, قارتتاردى, مۇگەدەكتەردى جانە ۇساق قىلمىس جاساعانداردى قىلمىستىق جازادان بوساتۋدى كوزدەيدى», – دەدى قوستاناي وبلىسى ءىىد باسشىسىنىڭ ورىنباسارى, پوليتسيا پولكوۆنيگى نۇريدين داۋىلباەۆ. سونىمەن بىرگە, داۋىلباەۆ اتاپ وتكەندەي, زاڭ اسا اۋىر قىلمىس جاساعان تۇلعالارعا راقىمشىلىق جاساۋعا تىيىم سالادى. «بۇل كريمينالدىق جاعدايدىڭ قيىنداۋ قاۋپىن سەيىلتەدى», – دەپ سانايدى قوستاناي وبلىستىق ءىىد باسشىسىنىڭ ورىنباسارى. ايتا كەتەيىك, بەس جىل بۇرىن, ەل تاۋەلسىزدىگىنىڭ 20 جىلدىعىنا وراي, وڭىردە 908 ادام راقىمشىلىقپەن بوساتىلعان ەدى.