بۇگىندە بيرجادا دوللاردى ساتىپ الۋ كورسەتكىشى تومەن. بانكتەر مەن اقشا ايىرباستاۋ بەكەتتەرىندە دە اقش ۆاليۋتاسىن ساتىپ العاننان گورى ونى ساتىپ جىبەرۋ وپەراتسيالارى باسىم بولىپ تۇر, دەپ حابارلايدى finprom.kz سايتى.
سوڭعى ءۇش ايدىڭ ىشىندە قور بيرجاسىندا دوللاردىڭ ساۋدا-ساتتىعى 2,5 ملرد-تان اسپاي وتىر. بيرجادان تىس نارىقتا, ياعني بانكتەر مەن اقشا ايىرباستاۋ بەكەتتەرىندە ساتىپ الىنعان جانە ساتىلعان دوللاردىڭ اراقاتىناسى كۇرت وزگەردى. ماسەلەن, قاراشا ايىندا قازاقستاندىقتار اقش-تىڭ ۆاليۋتاسىن كوپ ساتىپ الماي, كەرىسىنشە, 46 ملن. دوللارعا ارتىق اقشانى تەڭگەگە ايىرباستاپ جىبەرگەن.
ال قور بيرجاسىندا العاشقى ون ايدىڭ ىشىندە ەكى ەسە از دوللار ساتىلعان. وتكەن جىلى 48 ملرد. ساتىلسا, بيىل نەبارى 25 ملرد. دوللار وتكەن ەكەن. وسىلايشا, قازاقستانداعى دەۆالۆاتسيالىق قاۋىپ-قاتەرلەردىڭ دەڭگەيى ءتۇسىپ وتىر. بانكتەر, بيزنەس پەن قاراپايىم حالىق دوللاردى ساتىپ الۋدىڭ ورنىنا كوپتەپ وتكىزىپ, ونىمەن دەۆالۆاتسيانىڭ بولاتىنىنا سەنبەي وتىرعانىن كورسەتتى. وسىنىڭ ارقاسىندا ۇلتتىق بانكتە ۆاليۋتا باعامىن ۇستاۋ ءۇشىن جۇمساعان شىعىندارىن ازايتتى. ءۇش اي بويى بانك بىردە-ءبىر ينتەرۆەنتسيا جاساعان جوق.
ايتا كەتكەن ءجون, جىلدىڭ باسىندا ۇلتتىق بانك ۆاليۋتا باعامىنىڭ تەپە-تەڭدىگىن ۇستاۋ ءۇشىن ءبىراز اقشا جۇمساعان بولاتىن. اقپان-ماۋسىم ايلارىندا بانك 3,3 ملرد. دوللاردى ساتىپ العان. بۇگىندە كونتراگەنتتەردىڭ «دەۆالۆاتسيا بۇرق ەتە قالادى» دەگەن الاڭداۋشىلىعى دا باسىلدى. تەڭگە باعامىن ەركىن اينالىمعا جىبەرگەن كەزدە ناقتى نە بولاتىنىن ەشكىم بىلگەن جوق. سودان دۇربەلەڭ تۋىنداپ, دوللاردىڭ سپەكۋلياتسياسى كۇشەيگەن ەدى. سونىڭ سالدارىنان ۆاليۋتا نارىعىندا تۇراقسىزدىق بولدى.
