وسكەمەن قالاسىنداعى رەسپۋبليكالىق, وبلىستىق جانە قالالىق بۇقارالىق اقپارات قۇرالدارى وكىلدەرى ءبىر كۇنىن ۇلتتىق ۇلان ساپىندا وتكىزدى. ولار قايناعان اسكەري ءومىردىڭ تىنىسىن سەزىنىپ, ەل قاۋىپسىزدىگى جولىنداعى تىنىمسىز تىرلىگىنە كۋا بولىپ قايتتى. ءارى وزدەرى دە قالامدارىن قارۋعا الماستىرىپ, جاۋىنگەرلىك دايىندىقتان ءوتتى.
«شىعىس» وڭىرلىك قولباسشىلىعى ۇيىمداستىرعان بۇل شارا ەل تاۋەلسىزدىگىنىڭ 25 جىلدىعىنا ورايلاستىرىلعان. باستى ماقسات – جەرگىلىكتى باق وكىلدەرىنە ۇلتتىق ۇلاننىڭ «شىعىس» وڭىرلىك قولباسشىلىعىنداعى جاۋىنگەرلىك دايىندىق پەن ۇرىستىق الەۋەتىمەن تانىستىرىپ, بۇقارالىق اقپارات قۇرالدارىمەن بايلانىستى نىعايتۋ.
تاڭعى 8:00-دە وڭىرلىك قولباسشىلىقتا جينالعان جۋرناليستەر ۇستەرىندەگى جەڭىل كيىمدەرىن اسكەري كيىمگە اۋىستىرىپ, بىردەن پلاتستا ساپقا ءتىزىلدى. البەتتە, اسكەري كيىمنىڭ بارىنە شاق كەلە قويماعانى راس. ويتكەنى, كەي نازىك جاندى جۋرناليستەردىڭ بويلارى بەلگىلەنگەن اسكەري تالاپقا ساي ەمەس. بىرىنە ەتىگى ۇلكەن بولسا, بىرىنە شالبارى شاق كەلمەي جاتتى. دەسە دە, بارىمەن بازار قىلعان قالامدى قارۋلاستار ءبىر كۇندىك جاۋىنگەرلىك تاپسىرمالاردى ابىرويمەن ورىنداۋعا مىقتاپ بەكىندى. كومانديرلىك جاۋاپكەرشىلىكتى وزىنە جۇكتەگەن «شىعىس» وڭىرلىك قولباسشىلىعىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پولكوۆنيك راشيد احمەدجانوۆ ءبىر كۇندىك اسكەر قاتارىنا قابىلدانعان جاس ساربازدارعا وقۋ-جاتتىعۋ الاڭىندا قارۋمەن وق اتۋ بارىسىنداعى قاۋىپسىزدىك ەرەجەلەرىن ءجىتى ءتۇسىندىردى. بۇدان كەيىن تەمىردەي تارتىپكە باعىنعان جۋرناليستەر اسكەري كولىكپەن وسكەمەن گارنيزونىنىڭ وقۋ-جاتتىعۋ الاڭىنا اتتاندى.
بۇل كۇنى اۋا رايى قولايلى بولا قويعان جوق. تاۋلى ايماقتىڭ ىزعارى ەسىپ, تۇنىمەن تولاسسىز جاۋعان ومبى قار اياققا قۇرساۋ بولعانىمەن, ءبىر ساعات بۇرىن قىمسىنا قابىلداعان اسكەري كيىمنىڭ قادىرىن «جاس ساربازدار» بىردەن ءتۇسىندى. كولىكتەن تۇسە سالا, ساپقا تىزىلگەن جۋرناليست-جاۋىنگەرلەرگە بەرىلگەن العاشقى تاپسىرما – بيىك جوتادا ورنالاسقان اتۋ الاڭىنا ساپپەن جىلدام جۇگىرە جەتۋ. بەتتى شالعان ۇسكىرىك اياز بەن اياقتى ءتىرسەككە دەيىن كومكەرگەن ومبى قار كوماندير بۇيرىعىنا توسقاۋىل بولا المادى. وسى تۇستا شارانىڭ باستى كەيىپكەرلەرى ۇلتتىق ۇلان جاۋىنگەرىنە قويىلاتىن باستى تالاپ – دەنە دايىندىعىنىڭ مىقتى بولۋى كەرەكتىگىن اڭعاردى. اتۋ-جاتتىعۋ الاڭىندا قولعا بىردەن قارۋ ۇستاتپاس بۇرىن, اۋەلدە سول قارۋدى قالاي ۇستاپ, قالاي وقتاۋ كەرەكتىگى ۇيرەتىلدى. از ۋاقىتتا قارۋدىڭ قىر-سىرىن مەڭگەرگەن جۋرناليستەر اۆتوماتتى شاشىپ, قايتا قۇراۋدان جىلدامدىققا جارىستى. ابدەن قارۋعا قول ۇيرەنگەننەن كەيىن, نىسانانى كوزدەۋدە مەرگەندىكتەرىن سىنادى. اقپارات مايدانىندا قالامدارى توسەلگەن تىلشىلەر, كەز كەلگەن جان كورە بىلمەيتىن ەرەكشە قۇبىلىستاردى كامەرا وبەكتيۆىمەن سەزەتىن تەلەوپەراتورلار, فوتوتىلشىلەر وزدەرىنەن مىقتى جاۋىنگەر شىعاتىنىن ءاپ-ساتتە دالەلدەدى.
جاتتىعۋ بارىسىندا باق وكىلدەرىنە «شىعىس» وڭىرلىك قولباسشىلىعىنداعى قارۋ-جاراقتىڭ ءتۇر-ءتۇرى تانىستىرىلدى. كۇشى ءتىپتى, بروندالعان تەحنيكانى تالقانداۋعا جەتەتىن ارنايى ماقساتتا قولدانىلاتىن ءىرى كاليبرلى ۆينتوۆكالار جۋرناليستەر قاۋىمىن تامساندىرماي قويمادى.
شارا بارىسىندا پولكوۆنيك راشيد احمەدجانوۆ تىلشىلەر قاۋىمىنا ۇلتتىق ۇلاننىڭ ىشكى قاۋىپسىزدىكتى قورعاۋداعى الار ورنى مەن بۇگىنگى كۇنگە دەيىنگى جەتكەن جەتىستىكتەرى جايلى باياندادى. – تاۋەلسىزدىك جىلدارىندا ەلدىڭ قورعانىس سالاسى تالاي جەتىستىكتەرىمەن ماقتانا الادى. اسكەري الەۋەتتىڭ جوعارى دەڭگەيى – ەل تىنىشتىعىنىڭ كەپىلى. سايدىڭ تاسىنداي ساربازدار كەز كەلگەن جاعدايعا ساقاداي-ساي. بىزدەگى تەحنيكا مەن قارۋ-جاراقتىڭ تۇرلەرىن وزدەرىڭىز كوردىڭىزدەر. وزىمىزگە جۇكتەلگەن تاپسىرمالاردى 25 جىل كولەمىندە ابىرويمەن اتقارىپ كەلەمىز. ءبىزدىڭ بولىمشە سوناۋ تاجىكستان ەلىنە دە كومەك قولىن سوزىپ, «سارباز» دەگەن اتقا كۇنى بۇگىنگە دەيىن لايىقتى ەڭبەك ەتىپ كەلەدى, – دەيدى ول.
وزدەرىن جاۋىنگەر رەتىندە سەزىنىپ, مۇمكىندىكتەرىن سىناپ كورگەن جۋرناليستەر اسكەري ءومىردىڭ عانا ەمەس, ساربازدارعا ارنالعان بوتقانىڭ دا ءدامىن تاتتى. كەز كەلگەن جاعدايدا, قانداي اۋا رايىندا بولماسىن ەلدىڭ تۇتاستىعى مەن قاۋىپسىزدىگىن قورعايتىن جاۋىنگەرلەردىڭ قىراعىلىعى مەن توزىمدىلىگى ابىرويعا لايىقتى ەكەنىنە كوز جەتكىزدى. تىلشىلەر قاۋىمى ءبىر كۇن بولسا دا وسىناۋ قاتاڭ رەجىمنىڭ قىر-سىرىنان حاباردار بولىپ, اسكەري ءومىردىڭ قيىندىعىن تەرەڭىرەك ءتۇسىندى.
ەندى الداعى كوكتەم ايلارىندا جۋرناليستەر اراسىندا تاكتيكالىق وقۋ-جاتتىعۋلاردان جارىس ۇيىمداستىرۋ كوزدەلىپ وتىر.
باعدات امانگەلدى,
قاتارداعى جاۋىنگەر
وسكەمەن
