ءوز ءىسىنىڭ شەبەرى

ورتوپەديا – ادامنىڭ تىرەك, قوزعالىس جۇيەلەرىن رەتكە كەلتىرۋدى ماقسات ەتەتىن مەديتسينانىڭ, سونىڭ ىشىندە حيرۋرگيانىڭ باستى ءبىر سالاسى. مۇنىڭ ءۇش تارماعى بار ەكەن. بۇلار دەنە ءبىتىمىنىڭ كەمىستىگىنىڭ الدىن الۋ, ەمدەۋ جانە وتا جاساۋ بولىپ تابىلادى. بۇگىنگى كۇنى ورتوپەديالىق-تراۆموتولوگيالىق سا­لا ادامدارعا قىزمەت جاساۋ باعى­تى­نا قاراي بەت بۇرىپ وتىر. وسى ورايدا ورال قالاسىندا جوعارى ساناتتى ورتوپەد-تراۆموتولوگ اسىل­بەك الىبەكوۆ ءوز شەبەرحاناسىن اشتى. وعان «بيزنەستىڭ جول كارتاسى-2020» باعدارلاماسى اياسىندا قارجىلاي قولداۋ كورسەتىلدى. وسى ارقىلى نەسيەنىڭ پايىزدىق مولشەرلەمەسى اجەپتاۋىر قىسقار­تىلدى. مۇنىڭ سەپتىگى عيمارات الۋعا دا ءتيىپتى. ال شەبەرحانا ءۇشىن قۇرال-جابدىقتار مەن ەم-شارا جۇرگىزۋگە قاجەتتى قوندىرعىلار جەكە قا­راجاتقا الىنعان. جاڭا كاسىپ يەسى ءوز قىزمەتىنىڭ ەرەكشەلىگى تۋرالى گازەت تىلشىسىنە بايانداپ بەردى. ونىڭ ۇزىن-ىر­عاسى قانداي دەگەنگە كەلسەك, بۇگىنگى كۇنى تۇرعىندار تاراپىنان ورتوپەد-ماماننىڭ قىزمەتىنە دەگەن سۇرانىس ارتا ءتۇسىپتى. حالىقتان تابان دەفورماتسياسىن تۇزەتۋ جونىندەگى تىلەكتەر كوبىرەك تۇسەدى ەكەن. اسىرەسە, وڭىردەگى جاستار اراسىندا مايتاباندىلىق دەرتىنىڭ ءجيى كەزدەسۋى ويلاندىرماي قويمايدى. سونىڭ سالدارىنان قارۋلى كۇشتەر قاتارىندا قىزمەت ەتۋگە جارامسىزدار سانى ءوسىپ كەلەدى. «ونى ەمدەۋ مەن الدىن الۋدىڭ تاسىلدەرى جەتكىلىكتى. ءبىز ونى قاجەتتىلىككە قاراي قولدانامىز», دەيدى ورتوپەد-تراۆماتولوگ اسىلبەك الىبەك ۇلى. جالپى, جالپاق تاباندى ادام جۇرگەن كەزدە تەز شارشايدى. قوزعالعان كەزدە بالتىرى, تابانى مەن بەلى سىرقىراپ قويا بەرەدى. مۇنىڭ ءبارى تابانداعى وزگەرىستەردىڭ اسەرى.  ەمدەلمەي جۇرە بەرسە, بۇل تىزە مەن جامباس بۋىندارىنىڭ, سونىمەن بىرگە ومىرتقا سۇيەكتەرىنىڭ وزگەرىسىنە سوقتىرادى ەكەن. ماماننىڭ ايتۋىنشا, تابان سۇيەكتەرى دەنەنىڭ بۇكىل سالماعىن كوتەرەدى. بۇل رەتتە اياق كيىمنىڭ ۇلكەن ءمانى بار ەكەنىن ەكىنىڭ ءبىرى بىلە بەرمەيدى. مىسالى, ۇنەمى بيىك وكشەلى اياق كيىم كيىپ جۇرگەن جاعدايدا تابان سۇيەگى بۇل اۋىرتپالىقتى كوتەرە الماي, وزگەرىسكە ۇشىرايتىن كورىنەدى. سوندىقتان, اتا-انالار بالالارىنىڭ قانداي اياق كيىم كيەتىنىنە كوڭىل اۋدارماسا, كەيىن وكىنىشكە تاپ بولۋى مۇمكىن. ا.الىبەكوۆ كاسىبي بىلىكتىلىگىن ۇدايى جەتىلدىرىپ وتىرادى. ول كەيىنگى كەزدە ءوزىنىڭ بىلىكتىلىگىن تەك قازاقستاندا عانا ەمەس, سونىمەن بىرگە, رەسەي مەن پولشانىڭ ىرگەلى عىلىمي-مەديتسينالىق ورتالىق­تارىندا كوتەرىپ كەلەدى. سونىڭ ناتيجەسىندە, ول وڭىردەگى تىرەك-قوزعا­لىس جۇيەلەرىن ەمدەيتىن بىرەگەي مامانعا اينالعان. ونىڭ شەبەر­حاناسىنداعى وتا جاسايتىن ورىننىڭ بارلىق تالاپتارعا ساي ەكەنى دە سۇيسىندىرمەي قويمايدى. مۇندا وتا جاساۋ تۇرلەرى دە جەتىلدىرىلە تۇسۋدە. ورتوپەد ۇسىنىپ وتىرعان قىزمەت ءورىسى تەك وتا جاساۋمەن شەكتەل­مەيدى. سونىمەن بىرگە, اسىل­بەكتىڭ شەبەرحاناسى ارقىلى اقىلى دارىگەرلىك كەڭەستەر بەرىلەدى, كوم­پيۋ­تەرلىك دياگنوستيكا جاسالادى. قازىرگى تاڭدا ورتوپەديالىق تاۋارلارعا دەگەن سۇرانىستار دا وسە تۇسۋدە. ا.الىبەكوۆ تۇرعىنداردىڭ بۇل قاجەتتىلىكتەرىن وتەۋگە دە ۋاقىت تاۋىپ ءجۇر. ءبىز جوعارىدا بۇگىنگى كەيىپكەرىمىزدىڭ وي-پىكىرىنە سۇيەنە وتىرىپ, تىرەك-قوزعالىس جۇيەسىندەگى دەرتتەردىڭ بىرقاتارى جايسىز اياق كيىم كيگەننەن پايدا بولاتىنىن ايتقان ەدىك. وسى تۇرعىدا بىلىكتى ماماننىڭ لايىقتى ءارى ىڭعايلى اياق كيىمدى ءتيىستى جەرلەردەن ىزدەپ تاۋىپ, ءوز كليەنتتەرىنە ۇسىنۋى دا ونىڭ بۇگىنگى قىزمەتىنىڭ تاعى ءبىر ەرەكشەلىگىن تانىتقانداي. تەمىر قۇسايىن, «ەگەمەن قازاقستان» ورال