اقتوبە مۇزقالاعا اينالادى

جىل مەزگىلدەرىنىڭ ارقايسى­سىنىڭ وزىندىك ەرەكشەلىگى مەن قىزىعى بار. قىراۋلى قىستىڭ قىزىعى شاڭعى تەۋىپ, مۇز ايدىندارىندا كونكيمەن سىرعاناۋ ەكەنى بەلگىلى. وبلىس ورتالىعىندا وسىنداي بۇقارالىق سپورتتى دامىتۋ ءۇشىن قانداي جاعداي جاسالۋدا؟ قالالىق دەنە تاربيەسى جانە سپورت ءبولىمىنىڭ باسشىسى ەۆگەني گونچاروۆتىڭ ايتۋىنشا, قازىر اقتوبەدە 40-تان استام مۇز ايدىنى جۇمىستارىن باستاپ كەتىپتى. ونىڭ 5-ءى حوككەي قوراپشاسىمەن قورشالعان. جالپى, بيىلعى قىستا بارلىعى 60 مۇز ايدىنىن اشۋ كوزدەلۋدە. – اقتوبەدە مۇز ايدىندارى مەكتەپتەردىڭ اۋلالارىندا, قالاعا قاراستى اۋىلدىق وكرۋگتەردە ورنالاستىرىلدى. سونداي-اق, جەكە كاسىپكەرلەر دە قىسقى ۋاقىتتى ءتيىمدى پايدالانۋعا ءوز ۇلەستەرىن قوسىپ, مۇز ايدىندارىن جاساۋدى داعدىعا اينالدىرىپ كەلەدى. ورتالىق ساياباقتا كونكيدى 300 تەڭگەگە جالعا الۋعا بولادى. مۇز ايدىندارىنىڭ كوپشىلىگى فۋتبول الاڭدارىنا جاسالدى. اۋا رايىنا بايلانىستى جىلدىڭ سوڭىنا دەيىن بارلىق 60 مۇز ايدىنى ىسكە قوسىلادى, – دەيدى ول. جاقىندا «مەگا اقتوبە» ويىن-ساۋىق ورتالىعىنىڭ اۋماعى ارقىلى وتەتىن سازدى وزەنىنىڭ ۇستىنەن مۇز ايدىنى جانە تۇڭعىش پرەزيدەنت اتىنداعى ورتالىق ساياباقتا حوككەي الاڭى اشىلدى. سونداي-اق, ساياباقتا بالالارعا ارنالعان ەكى مۇز سىرعاناعى سالىنۋدا. مۇنداعى حوككەي مۇز ايدىنى بارلىق زاماناۋي تالاپتارعا ساي سالىنعان. ارنايى اياق كيىم اۋىستىراتىن جانە تاماقتانۋعا ارنالعان ورىندار بار. اقتوبەلىكتەر «فەر­رو» سپورت كلۋبىندا, ا.پۋش­كين اتىنداعى ساياباقتا, «گرين لەند» دەمالىس بازاسىنداعى مۇز ايدىندارىنا, ال شايبا قۋىپ, حوككەي ويناعىسى كەلەتىندەر قوراپشاسى بار ايدىن­دارعا بارا الادى. بۇگىنگى تاڭدا العا, شالقار, حرومتاۋ اۋداندارىندا دا حوككەي الاڭدارى اشىلدى. بۇل ءۇردىس باسقا اۋدانداردا جالعاسىن تابۋدا. وسىلايشا وبلىستا قىسقى سپورت تۇرلەرى­مەن اينالىسۋعا كوڭىل بولىنۋدە. اقتوبەدە مۇز سارايى قۇرىلىسى سالىنىپ جاتىر. بولا­شاقتا بۇل نىسان دا كونكي سپور­تىمەن اينالىستىندارعا ەسىگىن ايقارا اشپاق. قىسقاسى, اق­توبە مۇزقالاعا اينالادى. ساتىبالدى ءساۋىرباي, «ەگەمەن قازاقستان» اقتوبە