قىزىلوردا وبلىسىندا ءۇشىنشى نەيروينسۋلت ورتالىعى اشىلدى

جۇرەك-قان تامىرلارى اۋرۋلارى بويىنشا جول كارتاسى باعدارلاماسى اياسىندا 140 ملن. تەڭگەگە مەديتسينالىق قۇرال-جابدىقتار الىندى. جىل باسىنان بەرى ينسۋلت پەن ينفاركت كەزىندە مەديتسينالىق كومەك كورسەتۋ ماقساتىندا 1000-نان اسا مەديتسينا قىزمەتكەرلەرى وقىتۋ كۋرستارىنان ءوتتى. بۇل تۋرالى قىزىلوردا وبلىسىنىڭ دەنساۋلىق ساقتاۋ باسقارماسىنىڭ باسشىسى اقمارال ءالنازاروۆا حابارلادى. - قان اينالىم جۇيەسى اۋرۋلارىنىڭ اسقىنۋىن ەرتە انىقتاۋ ءۇشىن وبلىس بويىنشا العاش رەت جوعارى قاۋىپ توبىنا جاتاتىن قان قىسىمى مەن مي قان تامىرلارىنىڭ اۋرۋىمەن اۋىراتىندارعا فۋنكتسيونالدى زەرتتەۋ جۇرگىزەتىن تاۋەكەل توبى جاساقتالدى. بارلىق اۋدانداردا ۋلترادىبىستىق زەرتتەۋ ماماندارىنىڭ اراسىندا شەبەرلىك ساباقتارى وتكىزىلدى. جۇرگىزىلگەن جۇمىستار ناتيجەسىندە 287 ناۋقاس جوسپارلى تۇردە كورونوگرافياعا جىبەرىلدى جانە ونىڭ 18%-نا ستەنتتەۋ جۇرگىزىلدى. 2000-نان استام جۇرەك پەن  باس ميىنىڭ تامىرلارىنا وتا جاسالىپ, بىلتىرعى جىلمەن سالىستىرعاندا  وتا جاساۋ كولەمى 15%-عا وسكەن,- دەدى اقمارال ءالنازاروۆا. ايماقتىڭ اراقاشىقتىعى ەسكەرىلە وتىرىپ, اعىمداعى جىلدىڭ اقپان ايىندا قازالى تەمىرجول اۋرۋحاناسىنىڭ بازاسىندا ارال, قازالى, قارماقشى اۋداندارى مەن بايقوڭىر قالاسى تۇرعىندارى ءۇشىن ءۇشىنشى اۋدانارالىق نەيروينسۋلت ورتالىعى اشىلدى. ءساۋىر ايىنان باستاپ قازالى اۋداندىق ورتالىق اۋرۋحاناسىنىڭ بازاسىندا ينسۋلت اۋرۋىمەن اۋىراتىنداردى كەش وڭالتۋدى جۇرگىزۋ ءبولىمى, سونداي-اق №3 قالالىق ەمحانانىڭ بازاسىندا ينسۋلتپەن اۋىرعان ناۋقاستارعا كەش وڭالتۋدى جۇرگىزۋ ماقساتىندا نەيرورەابيليتاتسيالىق ورتالىق اشىلدى. ناتيجەسىندە قان اينالىم جۇيەسى اۋرۋىنان كوز جۇمۋ كورسەتكىشى 100 مىڭ تۇرعىنعا شاققاندا 11,3 پايىزعا تومەندەگەن.