استانادا جاڭا جىلدى قارسى الۋعا قىزۋ دايىندىق ءجۇرىپ جاتىر, دەپ حابارلادى استانا قالاسى اكىمدىگىنىڭ ءباسپاسوز قىزمەتى.
مەرەكە قارساڭىندا قالا ءتۇرلى ءتۇستى ينستاللياتسيالارمەن, جارقىرايتىن اركالارمەن جانە مۇسىندەرمەن بەزەندىرىلدى. بۇل قالا تۇرعىندارى مەن قوناقتارىنا مەيرامنىڭ سيقىرلى اتموسفەراسىن سەزىنۋگە مۇمكىندىك بەرەدى. بيىل ەلوردادا 16 شىرشا ورناتىلدى, بۇعان قوسا, جەرگىلىكتى بيزنەسمەندەر دە وزدەرىنە تيەسىلى ايماقتارعا شىرشالار ورناتتى.
قالانى بەزەندىرۋدە جىلدا بىرىڭعاي ءتۇستى شەشىم تاڭداپ الىنادى, بيىل كوگىلدىر تۇسكە باسىمدىق بەرىلدى. بەزەندىرۋدىڭ جاڭا تۇجىرىمداماسى قۇرىلىپ, جاڭاجىلدىق سيپاتتاعى جارقىرايتىن اركالار مەن كرونشتەيندەر ورناتىلادى. جول قيىلىستارى مەن جولايرىقتارداعى ارالدار جاڭا 3D كىشى ارحيتەكتۋرالىق فورمالارمەن بەزەندىرىلدى. «قازاق ەلى» الاڭىنداعى, «وتان قورعاۋشىلار» مونۋمەنتىنىڭ الدىنداعى, وقۋشىلار سارايىنىڭ جانە سارىارقا اۋدانى اكىمدىگىنىڭ الدىنداعى فونتاندار ەرتەگىلىك سيپاتتا بەزەندىرىلدى. جول بويىنداعى اعاشتار جاڭا ۇلگىدە بەزەندىرىلدى, ولار جارىن-ديناميكالىق شارلارمەن, جۇلدىزشالارمەن, ويىنشىقتارمەن كورىكتەندىرىلدى. «استانا» كونتسەرت زالىنىڭ الدىندا, ب. مومىش ۇلى داڭعىلىندا جانە سۋلى-جاسىل بۋلۆارىندا توننەل تۇرىندەگى جارىق ينستاللياتسيالارى ورناتىلادى.
«بايتەرەك» مونۋمەنتىنىڭ الدىنداعى الاڭدا «ساراي قابىرعاسى» اتتى كومپوزيتسيا ورناتىلادى.
ەسىل وزەنىنىڭ جاعالاۋىن دايىنداۋعا ەرەكشە نازار اۋدارىلدى. روتوندالار, جاياۋ جۇرگىنشىلەر كوپىرى جاڭاجىلدىق يلليۋميناتسيامەن بەزەندىرىلىپ, جاعالاۋدىڭ بويىمەن مەرەكەلىك جارىق اسپاسى ورناتىلدى.
استانالىقتاردىڭ قىستا ءجيى باراتىن ورنى – مۇز قالاشىقتارى. بيىل ەلوردادا ءتورت نەگىزگى قالاشىق جاسالدى. ولار «حان شاتىر» سوسو-نىڭ جانىندا, اكىمدىك عيماراتىنىڭ الدىنداعى الاڭدا, ەسىل وزەنىنىڭ جاعالاۋىندا جانە «ستۋدەنتتەر» ساياباعىندا.
