«استانا» فك ناۋقاس بالاعا قاراجات جيناپ بەردى

ەلوردا اكىمدىگىنىڭ باستاماسىمەن ۇيىمداستىرىلعان «استانا - مەيىرىمدى قالا» اكتسياسى اياسىندا «استانا» فۋتبول كلۋبى سال اۋرۋىنا شالدىققان رايىمبەكتىڭ قىتايدا ەم-دوم الۋىنا قاجەتتى قاراجات جيناپ بەردى, دەپ حابارلايدى قازاقپارات. 12 جىل بۇرىن ساپ-ساۋ دۇنيەگە كەلگەن رايىمبەك مەرگەنباەۆ 9 ايلىعىندا سالعىرت دارىگەرلەردىڭ ەكپەسىنەن تسەرەبرالدى سال اۋرۋىنا (تسسا) شالدىعىپ, مۇگەدەكتەر ارباسىنا تاڭىلعان. بالاسىنىڭ اتى جامان اۋرۋعا شالدىققانىن ەستىگەن رايىمبەكتىڭ اكەسى وتباسىن تاستاپ كەتكەن. رايىمبەكتىڭ اناسى رايا مەرگەنباەۆا ءبۇلدىرشىننىڭ جالعىز جاناشىرى بولىپ وتىر. رايا مەرگەنباەۆا - ەكىنشى توپتاعى مۇگەدەك. مەملەكەت تاراپىنان مەرگەنباەۆتار وتباسىنا ءجيى كومەك كورسەتىلىپ, زەينەتاقى ۋاقىتىلى تولەنىپ تۇرعانىمەن, ول قاراجات بالانىڭ ەمىنە جەتكىلىكسىز. ونىڭ ۇستىنە, كومەككە ءزارۋ وتباسىنىڭ باسپانالارى دا جوق. قازىرگى تاڭدا ولار تۋىستارىنىڭ شاڭىراعىن پانالاۋعا ءماجبۇر. «استانا» فۋتبول كلۋبىنىڭ ۇجىمى رايىمبەكتىڭ قىتاي ەلىندە تسەلەبرالدى سال اۋرۋىن ەمدەيتىن ارنايى ورتالىقتا جاسالاتىن ەم-دومى ءۇشىن قاراجات جيناپ بەردى. ودان بولەك, ەلوردالىق كوماندانىڭ وكىلدەرى رايىمبەككە ءوز ەسىمى جازىلعان كوماندا جەيدەسىن سىيعا تارتىپ, الداعى ماۋسىمدا «استانا ارەنا» ستاديونىندا وتەتىن قازاقستان چەمپيوناتىنىڭ ويىندارىنا شاقىردى. اتاپ وتكەن ءجون, «استانا» كومانداسى مۇمكىندىگى شەكتەۋلى جاندارعا ستاديوننان ارنايى ورىن ءبولىپ, ويىندى بارىنشا قولايلى جاعدايدا تاماشالاۋعا مۇمكىندىك جاساۋدا. كومەككە ءزارۋ وتباسىنا قايىرىمدى جاندار جاردەم كورسەتە الادى. فۋتبول كلۋبىنىڭ رەسمي سايتىندا رايىمبەكتىڭ اناسى رايا مەرگەنباەۆانىڭ بايلانىس نومىرلەرى كورسەتىلگەن. «استانا - مەيىرىمدى قالا» اكتسياسى 31 جەلتوقسانعا دەيىن جالعاسادى. وعان كەز كەلگەن ادام قاتىسا الادى.