تۇركيا مەن ءازىربايجان ءوزارا ساۋدانى ءتول ۆاليۋتالارىمەن جاسايدى

تۇركيا شەت ەلدىك ارىپتەستەرىمەن ءوزارا ساۋدانى ۇلتتىق ۆاليۋتالارىندا جاساۋعا كوشىپ جاتىر. بۇعان دەيىن ەلدىڭ رەسەي, يران, قىتايمەن وسىنداي كەلىسىمگە كەلگەنى ايتىلعان ەدى. سونىمەن قاتار جاپونيا دا تۇركيامەن تەك ليرا جانە يەنمەن ساۋدالاسۋعا مۇددەلى ەكەنىن مالىمدەگەن ەدى, دەدى كەشە باكۋدە تۇركيانىڭ ۇلتتىق ەكونوميكا ءمينيسترى نيحات زەيبەكشى جۋرناليستەرگە بەرگەن سۇحباتىندا. بۇل تۋرالى Haberler باسىلىمى جازادى. ءمينيستردىڭ ايتۋىنشا, ءوزارا ساۋدانى ءجۇز پايىز ۇلتتىق ۆاليۋتاعا كوشىرۋ مۇمكىن ەمەس, دەگەنمەن انكارا بۇل باستامانى جەدەلدەتۋگە بار كۇشىن سالىپ جاتىر. زەيبەكشىنىڭ ايتۋىنشا, باكۋ مەن انكارانىڭ ساۋدا-ەكونوميكالىق قاتىناستارى سوڭعى جىلدارى جاڭا دەڭگەيگە كوتەرىلدى. "قازىرگى تاڭدا ەكى ەل اراسىنداعى تاۋار اينالىمى 3,5 ملرد دوللاردى قۇرايدى. الداعى ۋاقىتتا بۇل كورسەتكىش 10-15 ملرد دوللارعا ۇلعايتىلماق", - دەدى زەيبەكشى.