سابيلەر ءساندى عيماراتتا تاربيەلەنەدى

ۇلىتاۋ اۋدانىنا قاراستى جەزدى كەنتىندەگى «ايگولەك» بالاباق­شاسى مۇندا كەلەتىن ءسابي­لەر سانىنىڭ كۇرت وسۋىنەن عيمارات تاپشىلىعىن كورىپ ءجۇر ەدى. وسى ماسەلەنى شەشۋ ءۇشىن وتكەن جىلى رەسپۋبليكالىق بيۋدجەتتەن وسى ەلدى مەكەندەگى ەسكى قوناق ءۇيدى كۇردەلى جوندەۋدەن وتكىزۋگە 80 ميلليون تەڭگە قاراجات ءبولىنىپ, مەردىگەر «ولجا KZ» جشس ىسكە كىرىستى. قۇرىلىس فيرماسى دەگەنىندە تۇرىپ, ەسكى قوناقجايدى ادام تانىماستاي ادەمى ەتىپ جوندەپ, اسەم دە جي­ناقى بالاباقشا عيماراتىن ەل تاۋەلسىزدىگى مەرەكەسى قارساڭىندا پايدالانۋعا بەردى. قوس قاباتتى, جالپى اۋماعى 650 شارشى مەتر بولاتىن جاڭا بالاباقشا عيماراتى 75 بالاعا ارنالعان. ءۇش توپتا تاربيەلەنەتىن سابيلەرگە ارنالىپ جابدىقتالعان مۋزىكا زالى, ويىن الاڭدارى, سپورتتىق كورت جۇمىس ىستەيدى. بالاباقشانىڭ بارلىق بولمەلەرى وتاندىق ءوندىرىستىڭ تاماشا جيھازدارىمەن, باسقا دا كەرەك-جاراقتارمەن تولىق قامتاماسىز ەتىلگەن. مەكەمە دەربەس جىلۋ جۇيەسىمەن جىلىتىلادى. جاڭا عيماراتتىڭ اۋلاسىندا دا ارنايى سپورت, ويىن الاڭقايلارى بار. بالاباقشادا قازىر 18 پەداگوگ ەڭبەك ەتۋدە. ولاردىڭ ءبارى دە تيىسىنشە بىلىكتىلىگىن ارتتىرۋ كۋرستارىنان وتكەن. بالعىندارعا ساباق زاماناۋي باعدارلامالار بويىنشا قازاق, ورىس جانە اعىلشىن تىلدەرىندە جۇرگىزىلەدى. «ايگولەك» بالاباقشاسىنىڭ جاڭا عيماراتى بالالار مەن اتا-انالاردىڭ قۋانىشىنا اينالۋمەن قاتار, جەزدى كەنتىنىڭ دە شىرايىن كەل­تىرىپ تۇر. قايرات ءابىلدينوۆ, «ەگەمەن قازاقستان» قاراعاندى وبلىسى, ۇلىتاۋ اۋدانى