استاناداعى نازارباەۆ ۋنيۆەرسيتەتتە تاۋەلسىزدىكتىڭ 25 جىلدىعى جانە قازاقستان رەسپۋبليكاسى مەن قىتاي حالىق رەسپۋبليكاسى اراسىندا ديپلوماتيالىق قاتىناستاردىڭ ورناعانىنا شيرەك عاسىر تولۋىنا, سونداي-اق, « ۇلى جىبەك جولىنىڭ ەكونوميكالىق بەلدەۋى» باستاماسىنىڭ 3 جىلدىعىنا ارنالعان قازاقستانداعى العاشقى «يسلام ءمادەنيەتى جانە ۇلى جىبەك جولىنىڭ تۇرمىسى» – فوتوونەر شەبەرلەرىنىڭ ۇزدىك تۋىندىلارى» اتتى حالىقارالىق فوتوسۋرەت كورمەسى ۇيىمداستىرىلدى.
2013 جىلدىڭ قىركۇيەك ايىندا وسى ۋنيۆەرسيتەتتە بولعان كەزدەسۋدە قىتاي حالىق رەسپۋبليكاسى تاراپىنان « ۇلى جىبەك جولىنىڭ ەكونوميكالىق بەلدەۋى» بىرلەسكەن جوباسىن باستاۋ جونىندەگى باستاما كوتەرىلىپ, ول قازاقستان تاراپىنان قولداۋ تاپقان بولاتىن. سودان بەرى بۇل باستاماعا 100-دەن استام ەل مەن حالىقارالىق ۇيىم اتسالىسىپ وتىر. ال جىبەك جولى قىتاي ەلىنەن باستاۋ العانى بەلگىلى. ۇلى جىبەك جولى ساۋدا-ساتتىقتىڭ نەگىزى بولا وتىرىپ, بۇل كەرۋەن ارقىلى بىرنەشە ەلدەر مەن ۇلىستاردىڭ مادەنيەتى دە ءبىر-بىرىنە كەڭىنەن ىقپال ەتتى. بۇگىنگى قىتاي مەملەكەتتىك ونەر قورى مۇرىندىق بولىپ وتىرعان ءىس-شاراعا 65 ەلدىڭ فوتوشەبەرلەرىنىڭ تۋىندىلارى ىرىكتەلە كەلىپ, سولاردىڭ ىشىنەن ەڭ ورەلى 200 ونەر تۋىندىسى كورمەگە قويىلىپتى.
قازاقستان دۇنگەندەرىنىڭ قاۋىمداستىعى مەن قىتاي حالىق رەسپۋبليكاسىنىڭ قازاقستان رەسپۋبليكاسىنداعى ەلشىلىگىنىڭ قولداۋىمەن وتكىزىلىپ وتىرعان كورمەدە قىتاي, ساۋد ارابياسى, باحرەين, ومان, مىسىر, ءبىرىككەن اراب امىرلىكتەرى, بانگلادەش, ۆەتنام سياقتى بىرنەشە الەم ەلدەرىنەن بەلگىلى فوتوسۋرەتشىلەردىڭ تۋىندىلارى ۇسىنىلعان. فوتولار ۇلى جىبەك جولى بويىندا ورنالاسقان ەلدەردىڭ مادەنيەتىن, سالت-ءداستۇرىن, ادامي بولمىسى مەن تۇرمىس-تىرشىلىكتىڭ سان قىرلى سالاسىن قامتىپ, يسلام مادەنيەتىنىڭ الۋان قىرىن تالعامپازدىقپەن كورسەتە ءبىلگەن. ولار ۇلى جىبەك جولى ەلدەرىندەگى تىرشىلىكتىڭ كوپ قىرلى الەمىن پاش ەتەدى.
بەرىك سادىر,
«ەگەمەن قازاقستان»
سۋرەتتەردى تۇسىرگەن
ەرلان وماروۆ,
«ەگەمەن قازاقستان»
