ۇزىناعاش. قىربىق قار. كوكپار...

جىر الىبى جامبىل اتىنداعى اۋداندا تاۋەلسىزدىكتىڭ 25 جىلدىق مەرەيتويى قۇرمەتىنە ارنالىپ قازاقتىڭ ۇلتتىق ويىنى – كوكپار تارتىلدى ۇزىناعاشتىڭ كۇنگەيىندە «قيقۋ» سالعان ءجۇز قارالى كىسى ءاپ-ساتتە اپپاق قاردىڭ بوز-بورانىن شىعاردى. اۋىزدىعىمەن الىسقان ارعىماقتار تاناۋىنان بۋ بۇركىپ, قۇلاقشىنىن باسا كيگەن ءاپايتوس جىگىتتەر «اتوي» سالدى. «قازاقتىڭ قانى قىزۋ كوكپار دەسە» دەگەندەي-اق, جينالعان قاۋىمنىڭ دەلەبەسى قوزىپ, ايىزى قاندى-اي! ءتىپتى تالايلار قىستىڭ كۇنى دە كۇزدەگىدەي كوكپار ويىنى بولاتىنىنا دا تاڭدانا الماي قالدى. الماتى وبلىستىق «كاسىپقوي» ۇلتتىق سپورت كلۋبىنىڭ ديرەكتورى ورىنتاي امىرعاليەۆ قىستىڭ كوزى قىراۋداعى كوكپار دوداسى تۋرالى ويىن بىلاي ءبولىستى: – سەزىمتال جانۋارلاردىڭ اششى تەرىن الىپ قىربىق قاردىڭ ۇستىندە بۇلايشا دوداعا ءتۇسىپ, تارتقان كوكپارىمىزدى تاۋەلسىز ەلىمىزدىڭ شيرەك عاسىرلىق مەرەيتويىنا ارنادىق. الاڭعا شىققان بارلىق ات مۇندا جىلى كيىندىرىلگەن كۇيدە, جايلى كولىك­پەن جەتكىزىلدى. ودان ناعىز سپورت­شىعا سپورت ارەناسىندا كورسەتىلەتىن قامقورلىقتان ەشبىر ايىرماشىلىق بايقامايسىز دەر ەدىم. قازاقتىڭ جانى جىلقىمەن ءبىر, وزدەرىڭىزگە ءمالىم, سوندىقتان دا جانۋاردىڭ قينالىپ قالماۋى ءۇشىن بار جاعداي جاسادىق. ەڭ باس­تىسى, مۇنداي قىس كوكپارىن ءبىز ءبىرىنشى رەت وتكىزىپ وتىرعانىمىز جوق... ۇزىناعاشتاعى ات تۇياعىنىڭ ءدۇبىرىن الدىن الا الىستان قۇلاعى شالعان تارازدىق «اۋليەاتا» كوكپارشىلار كومانداسى دا قول قۋسىرىپ قاراپ جاتا الماپتى. قازاقستان كوكپارىنىڭ الدەنەشە دۇركىن چەمپيونى اتاعىن جەڭىپ العان كوماندانىڭ جەتەكشىسى – ات باپكەرى نۇرداۋلەت مومىنوۆ: – ءبىز ءۇشىن ەلىمىزدىڭ تاۋەلسىز­دىگىنەن اسقان مەرەكە بار ما؟ ۇزىناعاشتىق باۋىر­لارى­مىزدىڭ – اتاقتى اتبەگى ورىن­تاي ءامىر­عاليەۆتىڭ شاقى­رۋىن قۇپ الىپ, ارعىماقتاردى ءۇش «كاماز»-عا تيەپ جەتكەنىمىز وسى, مەرە­كە قۇت­تى بولسىن, اعايىندار! – دەدى. سپورتشىلاردى جامبىل اۋداندىق «نۇر وتان» پارتيا­سى ءتو­راعاسىنىڭ ورىنباسارى جۇمابەك شاجاباەۆ قۇتتىقتاپ, سالىمنىڭ مول بولۋىن تىلەدى. ايتسا ايتقانداي, بارلىق سالىم سالۋشى كوكپارشى وزىنە لايىقتى سىيلىعىن الدى. سپورتشىلاردىڭ ەشقايسىسى دا ماراپاتتان قۇر قالمادى. ەڭ باستىسى, جينالعان سپورتشىلار دا, كورەرمەن قاۋىم دا ەگەمەندىك مەرەكەسىنىڭ شىنايى ءمانىن ءتۇسىندى. اۋدانعا عانا ەمەس, كۇللى رەس­پۋب­­ليكاعا ەسىمى وتە-موتە تانىمال اتبەگى ورىنتاي امىرعاليەۆتىڭ ۇلت مە­رەكەسىنە ارناپ شاشقان شاشۋىنا جۇرتشىلىق العىسىن جاۋدىرىپ, كوڭىلدەرىن سەرگىتكەنى ءۇشىن راحمەت ايتتى. ...قىربىق قاردىڭ ۇستىندە ات تۇياعى تايعانامادى. تالعات ءسۇيىنباي, «ەگەمەن قازاقستان»  الماتى سۋرەتتى تۇسىرگەن نۇرمانبەت قيزات ۇلى