تەمىر جول بيلەتى نەگە تاپشى؟

استانا ۆوكزالىنىڭ ءىشى-سىرتى ىعى-جىعى حالىق. جەلتوقسان باستالسا بولدى, جولاۋشى ءنوپىرى كۇرت ارتاتىنى – جىلداعى جاعداي. بيىل دا سول, باراتىن باعىتتارىنا بيلەت ىزدەپ سابىلعانداردىڭ قاراسىن ساناي المايسىز. كاسساعا باس سۇعىپ, قاي وڭىرگە بيلەت سۇراساڭىز دا «جوق» دەگەن جاۋاپ الاسىز. ەسەسىنە, ءسىز ىزدەگەن «قات قاعاز» دەلدالداردىڭ قالتاسىندا بار. ال ونىڭ قۇنى ۇشاق بيلەتىنىڭ باعاسىنان دا «ۇشىپ» تۇر. راس, سوڭعى كەزدەرى كولىك لوگيستيكاسىنىڭ قاي سالاسىندا دا ىرگەلى ىستەر اتقارىلۋدا, ىلگەرىلەۋ بار. تەمىرجولدا دا وڭ وزگەرىستەر بايقالادى. جۇرتشىلىق جول ءجۇرۋ بيلەتتەرىن ۇيلەرىنەن شىقپاي, ونلاين تۇردە الا الادى. كاسسالار الدىنداعى قيساپسىز كەزەكتى سەيىلتكەن تەرمينالدار كۇندىز-ءتۇنى جۇمىس ىستەپ تۇر. ۆاگوندار جاڭارتىلۋدا. جولاۋشىلارعا قىزمەت كورسەتەتىن تاسىمالداۋشى كومپانيالارعا قويىلاتىن تالاپ تا, باقىلاۋ دا كۇشەيگەن. دەسە دە, مەرەكە قارساڭىندا جانە مەرەكە كۇندەرى بيلەتتىڭ جەتكىلىكسىزدىگى, دەلدالداردى قۇرىقتاۋعا دارمەنسىزدىك اڭعارىلادى. وبالى نەشىك, كەشە كوپكە بەلگىلى «جولاۋشىلار تاسىمالى» اق جىل توعىسار تۇستاعى جولاۋشىلار سۇرانىسىن قاناعاتتاندىرۋ ماقساتىندا ءارتۇرلى باعىتتارداعى پويىزدارعا قوسىمشا 80 (!) ۆاگوننىڭ تىركەلەتىنىن حابارلاعان. قازىرگى ۋاقىتتا «الماتى-استانا», «الماتى-سەمەي» جانە «الماتى-ارىس» باعىتتارىنا قاتىنايتىن قوسىمشا پويىزداردى شىعارۋ دا قاراستىرىلىپ جاتقان كورىنەدى. سونىمەن قاتار, تۇڭعىش رەت وتاندىق «تۇلپار-تالگو» زاۋىتىندا جاسالعان كەڭ كۋزوۆتى جاڭا ۇلگىدەگى ۆاگوندارمەن جاساقتالعان ەكى جۇردەك پويىز جولعا شىعادى. ونىڭ ءبىرى «الماتى-2-استانا» باعىتىندا قاتىناسا, ەكىنشىسى كەلەسى جىلدىڭ العاشقى كۇنىنەن باستاپ «الماتى-2-شىمكەنت» اراسىن جول قىلادى. سۇرانىستىڭ ارتۋىنا بايلانىستى قوسىمشا ۆاگوندار تىركەۋدى وزگە دە تاسىمالداۋشى كومپانيالار قولعا الماق. الايدا, مۇنداي قوزعالىس بيلەت تاپشىلىعىن تۇبەگەيلى شەشە الار ەمەس. نەگە؟ بار تۇيتكىل جوعارىدا ءسوز ەتكەن دەلدالداردا بولىپ تۇر. بيلەتتى بيزنەسكە اينالدىرعان ولار, ماسەلەن, استانا-الماتى اراسىنا قاتىنايتىن پويىزدىڭ 30-جەلتوقسانداعى جولدا ءجۇرۋ قۇجاتىن باقانداي وتىز مىڭ تەڭگەگە پۇلداۋدا. ال ءوز باعاسى ورتاشا ەسەپپەن 7-8 مىڭ تەڭگە تۇرادى, ياعني, ءۇش ەسەگە ارتىق ساۋدالانۋدا. «ءبىز بيلەتتى كىمنىڭ قانداي ماقساتتا ساتىپ الاتىنىن بىلمەيمىز. جانە قازىرگى تاڭدا جولاۋشىلاردىڭ بيلەتكە قول جەتكىزۋى بارىنشا وڭتايلاندىرىلعان: قالانىڭ قاي جەرىندە دە تەمىر جول كاسسالارى, تەرمينالدار جۇمىس ىستەپ تۇر. سوندىقتان دەلدالداردى باقىلاۋ قۇزىرلى مەكەمەلەردىڭ ەنشىسىندەگى شارۋا بولۋى ءتيىس», دەيدى كومپانيا وكىلدەرى. كەز كەلگەن جولاۋشى كەرەك بيلەتىن اي بۇرىن الا المايتىنى انىق. جولعا شىعۋ ۋاقىتى تاياعاندا بيلەت تاپشىلىعىنا كەزدەسەدى. سودان كەيىن زاڭسىز ساتۋشىلاردىڭ قالتاسىن تولتىرۋعا ءماجبۇر. مۇنى كىم باقىلايدى, كەلەڭسىزدىككە شەكتەۋ قوياتىن قانداي مەكەمە, قۇزىرلى ورگاندار بۇل احۋالدان حاباردار ما؟ بۇل جاعى, البەتتە, بىزگە بەيمالىم. ايتپاقشى, ۆاگوندارداعى بوس ورىنداردى ساۋدالايتىن جولسەرىكتەر دە بارشىلىق ەكەنىن جاسىرا المايمىز. تاسىمالداۋشى كومپانيا قىزمەتكەرلەرىن پاراقورلىققا يتەرمەلەيتىن دە بيلەت تاپپاعان ءوزىمىز ەكەنىن ەشكىم جوققا شىعارمايدى. قوس تۇيتكىلدىڭ دە سەبەبى بيلەت تاپشىلىعىندا. ال جولدا ءجۇرۋ قۇجاتىنا مەرەكە قارساڭىندا سۇرانىستىڭ ەسەلەپ ارتاتىنىن بىلەتىن دەلدالدار ونى ساۋداعا قويىلعاننان ءتۇرلى جولدارمەن يەلەنىپ, باعاسىن ەسەلەپ پۇلدايدى دەدىك. ەندەشە, قۇزىرلى ورگاندار وسىنداي «بيزنەسمەندەردى» قۇرىقتاسا, يگى. بيلەت تاپشىلىعى ءبىرشاما شەشىلەر مە ەدى؟.. اسحات رايقۇل, «ەگەمەن قازاقستان»