بەيجىڭدە وتاندىق 20 كومپانيانىڭ اۋىلشارۋاشىلىق ونىمدەرى تانىستىرىلدى

اۋىل شارۋاشىلىعى جانە تاماق ونەركاسىبى سالاسىنداعى قازاقستاندىق 20 تاۋار ءوندىرۋشى كومپانيا قىتاي استاناسىندا ءوز تاۋارلارىن تانىستىرسا, 10 كومپانيا وزدەرىنىڭ ينۆەستيتسيالىق جوبالارىن ۇسىندى, دەپ حابارلادى اتامەكەن پالاتاسى. ولاردىڭ اراسىندا كاسىپكەرلىكتى دامىتۋدىڭ وڭىرلىك كارتاسى اياسىندا جۇزەگە اسىرىلىپ كەلە جاتقان اگروونەركاسىپتىك كەشەن, مەتاللۋرگيا, تاماق ونەركاسىبى, قالدىقتاردى قايتا وڭدەۋ سالالارىنداعى جوبالار بار. تانىستىرىلىمعا اقتوبە, الماتى, اتىراۋ, شىعىس قازاقستان, باتىس قازاقستان, قاراعاندى, قوستاناي, پاۆلودار, سولتۇستىك قازاقستان جانە وڭتۇستىك قازاقستان وبلىستارىنىڭ كومپانيالارى دا قاتىستى. قازاقستاندىق قوناقتارعا, ءوز كەزەگىندە, 120-دان استام قىتايلىق كومپانيا ءوز ونىمدەرىن تانىستىردى. ولاردىڭ قاتارىندا ساۋدا, اۋىل شارۋاشىلىعى ونىمدەرىن قايتا وڭدەۋ جانە تاماق ونىمدەرىن شىعارۋ, مەتاللۋرگيا جانە تاعى باسقا سالالار بار. كومپانيالار بەيجىڭ, شاندۋن, حەنان پروۆينتسيالارى مەن ىشكى موڭعوليا, سۋار جانە شانسي ايماقتارىنا تيەسىلى. قازاقستاندىق تاۋار وندىرۋشىلەر قىتايلىق ارىپتەستەرىنە بالىق, ەت, ءسۇت ونىمدەرىن ۇسىندى. سونداي-اق, قىمىز, قۇرت, ايران جانە اشىتقى, بال, ۇن جانە ماكارون ونىمدەرىن, اس ازىرلەۋ ءۇشىن پايدالانىلاتىن ماي جانە باسقا دا ونىمدەردى ناسيحاتتادى. اۋىل شارۋاشىلىعى ونەركاسىبى جانە ساۋدا پالاتاسى, ونەركاسىپ جانە ساۋدانىڭ جالپىقىتايلىق فەدەراتسياسىنىڭ توراعاسى ۆان تسزيۋنحاونىڭ ايتۋىنشا, «قازاقستان مەن قىتاي اۋىل شارۋاشىلىعى ونىمدەرىن شىعارۋ جانە وڭدەۋ سالاسى بويىنشا تىعىز ىنتىماقتاستىق ورناتا الادى. قىتاي تۇرعىندارىنىڭ قازاقستاندىق تاماق جانە اۋىل شارۋاشىلىعى ونىمدەرىنە دەگەن سۇرانىسى جوعارى, سول سەبەپتى, قىتاي نارىعىن جاۋلاپ الۋعا قازاقستاندىق تاۋار وندىرۋشىلەردىڭ مۇمكىندىگى جەتەدى». تانىستىرىلىمنان كەيىن, ەكى ەلدىڭ كومپانيالارى «ۆ2ۆ» سيپاتىندا كەزدەسۋلەر وتكىزدى.