ۆوكزال جانىنداعى اۆتوتۇراق اكىمدىكتىڭ قاراۋىنا وتەدى

2017 جىلدىڭ باسىنان باستاپ تەمىرجول ۆوكزالىنىڭ اۆتوتۇراق ايماعى قتج-دان ەلوردا اكىمدىگىنىڭ قاراۋىنا وتەدى. وسىعان بايلانىستى جانە ەلوردا تۇرعىندارى مەن قوناقتارىنان شاعىمداردىڭ كوپتەپ تۇسۋىنە بايلانىستى استانا اكىمى تەمىرجول ۆوكزالىندا كوشپەلى كەڭەس وتكىزدى. سەيسەنبى كۇنى كەشكە اسەت يسەكەشەۆ ۆوكزالعا ءوزى بارىپ, حالىقتىڭ شاعىمدارى جەدەل شەشىم قابىلداۋدى تالاپ ەتەتىنىنە كوزى جەتتى, دەپ حابارلايدى ەلوردا اكىمدىگى. وسىعان بايلانىستى اكىم قوعامدىق كولىكتىڭ جۇمىسى ءۇشىن جاۋاپتى ءبىرىنشى ورىنباسارى سەرگەي حوروشۋنعا 10 قاڭتارعا دەيىنگى مەرزىم ىشىندە ۆوكزال ماڭىنداعى الاڭدى تارتىپكە كەلتىرۋدى تاپسىردى. اكىم 2017 جىلدىڭ اقپان ايىندا تەمىرجول ۆوكزالىندا حالىق شاعىمدارىن ەسكەرە وتىرىپ, عيمارات ىشىندە قايتا قۇرىلىس جۇمىستارى باستالاتىنىن جەتكىزدى. جۇمساق ورىندىقتار قويىلىپ, بالالارعا ارنالعان ايماقتار بولىنەدى, سۋپەرماركەت, بيلەت ساتۋ كاسسالارى تالاپقا ساي جەتىلدىرىلەدى, عيماراتتاعى قاۋىپسىزدىك كۇشەيتىلەدى. جۇمىستار كەلەسى جىلدىڭ 1 ساۋىرىنە دەيىن جۇرگىزىلۋگە ءتيىس. 10 قاڭتاردان باستاپ ۆوكزال ماڭى الاڭىندا اقىلى پاركينگ ىسكە قوسىلادى, ول اۆتوكولىكتەردى ءتارتىپسىز قويۋ ماسەلەسىنەن ارىلتادى. پاركينگتى وقۋ كۋرستارىنان ءوتىپ, سالىق ورگاندارىندا تىركەلگەن اككرەديتاتسيالانعان تاكسي كولىكتەرى عانا پايدالاناتىن بولادى. اسەت يسەكەشەۆتىڭ ايتۋىنشا, وسىنىڭ ءبارى جولاۋشىلاردىڭ قاۋىپسىزدىگى مەن ىڭعايلىلىعىن قامتاماسىز ەتۋگە باعىتتالعان. «كەلەسى جىلعى قاڭتاردىڭ ورتاسىنان باستاپ ەلوردا ۆوكزالى ماڭىنداعى الاڭ «ساعات سياقتى» جۇمىس ىستەيدى. سەرگەي حوروشۋنعا كولىكتىك باقىلاۋ كوميتەتىنىڭ, مەملەكەتتىك كىرىستەر كوميتەتىنىڭ, ەلوردالىق ءىىد جەرگىلىكتى پوليتسيا قىزمەتىنىڭ وكىلدەرىنەن جۇمىس توبىن قۇرىپ, اۋماقتا ءتارتىپ ورناتۋدى تاپسىرامىن», –  دەدى اسەت يسەكەشەۆ. اكىمنىڭ ايتۋىنشا, كۇن سايىن ۆوكزال 40 مىڭعا دەيىن ادامدى قابىلدايدى (جولاۋشىلار مەن شىعارىپ سالۋشى ادامداردى ەسەپتەگەندە) جانە جاڭا تەمىرجول ۆوكزالى قولدانىسقا ەنگىزىلگەنىنە قاراماستان, ەسكى ۆوكزال بارلىق, سونىڭ ىشىندە, جايلىلىق بويىنشا دا حالىقارالىق ستاندارتتارعا سايكەس كەلۋگە ءتيىس.