جامبىل دۇيسەن ۇلى شىعارماشىلىق كەش وتكىزدى

استاناداعى ورتالىق «قازاقستان» كونتسەرت زالىندا قازاقستان رەسپۋبليكاسى مادەنيەت جانە سپورت مينيسترلىگىنىڭ قولداۋىمەن جامبىل دۇيسەن ۇلىنىڭ شىعارماشىلىق كەشى ءوتتى دەپ, حابارلايدى قر مادەنيەت جانە سپورت مينيسترلىگىنىڭ ءباسپاسوز-قىزمەتى. جامبىل دۇيسەن ۇلى 13 جاستا. ءوزىنىڭ بالعىن جاسىنا قاراماستان, ول ءۇش پوەزيالىق جىر جيناعىن شىعارىپ ۇلگەردى. ادەبيەتشىلەردىڭ پىكىرىنشە, ونىڭ ولەڭدەرى تەرەڭ ليريكامەن, بۋىندارىنىڭ تازالىعىمەن ەرەكشەلەنىپ, قازاق پوەزياسىنىڭ الىپتارى جامبىل جاباەۆ پەن مۇقاعالي ماقاتاەۆتىڭ تۋىندىلارىمەن ۇندەستىك تابۋدا. «مەن بۇل كەشتى تاۋەلسىزدىكتىڭ 25 جىلدىعىنا جانە تۇڭعىش پرەزيدەنتىمىز ەلباسىنا ارنايمىن. مەملەكەتىمىزگە بەيبىتشىلىك پەن بىرلىك, بيىك جەتىستىكتەر, ەلىمىزگە ماڭگىلىك تاۋەلسىزدىك تىلەيمىن!», -دەگەن تىلەكتەرىمەن جاس اقىن كەش شىمىلدىعىن اشتى. اقىننىڭ كەشىنە قازاق ەستراداسىنىڭ جۇلدىزدارى – بيبىگۇل تولەگەنوۆا, ەسكەندىر حاسانعاليەۆ, ماقپال ءجۇنىسوۆا, سۇلۋشاش نۇرماعامبەتوۆا, مايرا ءىلياسوۆا, رامازان ستامعازيەۆ, قاراگوز تىلەۋبەكوۆالار قولداۋ كورسەتىپ, جاس انشىلەر - يبراگيم ەسكەندىر, بەيبىت مۇساەۆ, ەركەبۇلان ەلشاتقىزى, داۋلەت ماحانوۆتار قاتىستى. جاس اۆتوردىڭ ايتۋىنشا, ونىڭ وتانعا, حالقىنا, تۋعاندارىنا دەگەن ماحابباتى مەن سۇيىسپەنشىلىگى شىعارماشىلىعىنا دەگەن شابىتىن وياتىپ, قاناتتاندىرادى.