بۇرناعى كۇنى ليۆيانىڭ قۋعىنداعى پرەزيدەنتى مۋاممار كاددافيدىڭ زايىبى سوفيا, قىزى ايشا مەن ۇلدارى موحاممەد پەن گاننيبال كورشىلەس الجيرگە قاشىپ كەلگەن بولاتىن. كوتەرىلىسشىلەر الجير وكىمەتىنەن كاددافيدىڭ وتباسىن قايتارۋدى تالاپ ەتىپ وتىر.
الجير ءوز كەزەگىندە پولكوۆنيك وتباسىنىڭ كەز كەلگەن ءۇشىنشى ەلگە وتۋىنە مۇمكىندىك جاساماق جانە كومەك قولىن قايىرىمدىلىق پيعىلدان تانىتقانىن مالىمدەۋدە. ال كاددافيدىڭ ءوزى قاي جەردە جاسىرىنىپ جۇرگەنى بەلگىسىز. ءالجيردىڭ پولكوۆنيكتىڭ وتباسىن قايتارماۋ سەبەبى, ول ليۆيانىڭ ۇلتتىق وتپەلى كەڭەسى (لۇوك) دەگەن قازىرگى بيلىگىن زاڭدى بيلىك دەپ كۇنى بۇگىنگە دەيىن تانىعان جوق.
يەمەندە پرەزيدەنتتىك سايلاۋ وتپەك
يەمەندە 29 تامىزدا ءۇش ايدان كەشىكتىرىلمەي پرەزيدەنت سايلاۋى وتكىزىلەتىن بولادى دەگەن اقپارات تارادى. مۇنداي باستامانى ەل پرەزيدەنتى الي ابدۋللا سالەح كوتەرسە كەرەك. بۇگىندە پرەزيدەنتتىڭ مىندەتىن مەملەكەت باسشىسىنىڭ ورىنباسارى ابدۋرابا مانسۇر حادي اتقارىپ ءجۇر.
جامان ۇلگى جۇقپالى دەگەندەي, يەمەندە دە جىل باسىنان بەرى وكىمەتكە قارسى جاپپاي نارازىلىق اكتسيالارى ءجۇرىپ جاتقانى بەلگىلى. رەزيدەنتسياسىندا جارىلعان سناريادتان وسىدان ءبىراز ۋاقىت بۇرىن سالەح جارالانىپ, ساۋد ارابياسىنا ەمدەلۋگە كەتكەن بولاتىن. سودان ءالى ورالعان جوق. وپپوزيتسيا بولسا, ونى ەلگە كىرگىزبەيمىز دەپ وتىر. افريكاداعى ارىپتەستەرىنىڭ جولىن قۇشپاس ءۇشىن دە سالەح كومپروميسكە باراتىن سىڭايلى.
مايلى جىلىك باسىنان ايرىلىپ قالدى
يران رەسەيدىڭ «گازپروم نەفت» مۇناي كومپانياسىن «ازار» كەن ورنىنداعى مۇنايدى ءوندىرۋ قۇقىنان ايىردى. بۇعان رەسەيلىك كومپانيانىڭ اقش-تىڭ سانكتسيا ەنگىزۋىنەن قورقىپ, جوبانى جۇزەگە اسىرۋدى ەكى جىلعا جۋىق ۋاقىتقا سوزىپ جىبەرۋى سەبەپ بولىپ وتىرعان سەكىلدى.
اقش 1996 جىلى ەل ۇكىمەتىنە يراننىڭ ەنەرگەتيكا سەكتورىنا 20 ميلليون دوللاردان استام ينۆەستيتسيا سالاتىن شەتەلدىك كومپانيالارعا قارسى شارا قولدانۋعا قۇقىق بەرەتىن زاڭ قابىلداعان بولاتىن. وسىلايشا ءامىرى كۇشتىنىڭ الەگى دە كۇشتى دەگەننىڭ كەرى كەلىپ وتىر. جالپىسىندا, يران كولەمى جونىنەن مۇنايدىڭ وپەك-تەگى ەكىنشى ەكسپورتەر بولىپ تابىلادى.
ەستونيا پرەزيدەنتى قايتا سايلاندى
بۇرناعى كۇنى ەستونيا پارلامەنتى ەل پرەزيدەنتىن سايلادى. قازىرگى مەملەكەت باسشىسى تووماس حەندريك يلۆەس جەڭىسكە جەتتى. وعان 73 دەپۋتات وزدەرىنىڭ داۋىسىن بەرگەن. يلۆەسكە جەڭىسكە جەتۋ ءۇشىن 101 دەپۋتاتتىڭ 68-ءى ءوز داۋىستارىن بەرسە, جەتكىلىكتى ەدى.
ءىس باسىنداعى پرەزيدەنتتىڭ قارسىلاسى يندرەك تاراند دەپۋتاتتاردىڭ 25 داۋىسىنا يە بولعان. ءۇش بيۋللەتەن جارامسىز دەپ تابىلعان. ەستونيا پارلامەنتتىك رەسپۋبليكا بولعاندىقتان, پرەزيدەنت نەگىزىنەن وكىلەتتىلىك قىزمەتىن عانا اتقارادى. ونى پارلامەنت دەپۋتاتتارى 5 جىلدىق مەرزىمگە سايلايدى.
جاقسىلىق ويلاساڭ دا جامانسىڭ با؟
وزبەكستاندا وسىدان ەكى جىل بۇرىن ۆيچ/سپيد پروفيلاكتيكاسى تۋرالى بروشيۋرالار باسىپ شىعارعانى ءۇشىن 7 جىلعا سوتتالعان پسيحولوگ, «يزيس» ۇكىمەتتىك ەمەس ۇيىمىنىڭ جەتەكشىسى ماكسيم پوپوۆ بوستاندىققا شىعارىلدى. ونىڭ تۇرمە مەرزىمى تۇزەۋ جۇمىستارىمەن الماستىرىلدى.
ەندى م.پوپوۆ تاشكەنتتە ءتۇرلى قارا جۇمىستار ىستەمەك جانە ەڭبەكاقىسى مەملەكەت ەسەبىنە اۋدارىلاتىن بولادى. ونىڭ اتالعان ۇيىمى 2003 جىلى قۇرىلسا, قىزمەتى بۇۇ دب جانە يۋنيسەف تاراپىنان قولداۋ تاۋىپ كەلگەن. «يزيس» جاستارعا قايتسە سپيد اۋرۋىن جۇقتىرۋدىڭ الدىن الۋعا بولاتىنىن, ەسىرتكىگە تاۋەلدىلىكتەن قالاي شىعۋ كەرەكتىگىن ءتۇسىندىرىپ كەلىپتى. ال مۇنداي ىزگى نيەت وزبەك باسشىلىعىنا ۇناماسا كەرەك.
پروكۋراتۋرا قىزمەتكەرىنە جازا جەڭىل
رەسەيدىڭ ۆولگوگراد قالاسىنىڭ اۋداندىق سوتى 7 جاسار بالانى Opel Corsa جەڭىل كولىگىمەن باسىپ ولتىرگەن ۆولگوگراد وبلىستىق پروكۋراتۋراسىنىڭ قىزمەتكەرى ەلەنا يۆانوۆانى 2,5 جىلعا عانا باس بوستاندىعىنان ايىردى جانە بۇل ۇكىم 5 جىلعا كەيىن شەگەرىلىپ ورىندالاتىن بولدى.
يۆانوۆاعا مۇنداي جەڭىلدىك 9 جاسار بالانى ءبىر ءوزى اسىراپ وتىرعانىنا بايلانىستى بەرىلگەن. قازا تاپقان بالانىڭ اناسى تاتيانا كولوكولتسەۆا سوت ۇكىمىمەن كەلىسپەيتىنىن بىلدىرگەن. انانىڭ ايتۋىنشا, ول بالاسىن 7 جىل باعىپ-قاعىپ وسىرگەن, 9 اي ىشىندە كوتەرگەن, ال 2,5 جىل جازا وتە-موتە از جانە 5 جىلعا دەيىن كوپ نارسە وزگەرىپ كەتۋى مۇمكىن.
قىسقا قايىرىپ ايتقاندا:
اقش-تا «ايرين» داۋىلىنان قۇربان بولعاندار سانى ءبىر كۇندە ەكى ەسەگە ءوسىپ, 40 ادامعا جەتتى. ماشينەسىن سۋ تاسقىنى اعىزىپ اكەتكەن تاعى ءبىر امەريكالىق ءىز-ءتۇزسىز جوعالىپ كەتكەندەر قاتارىندا. داۋىلدان كەلگەن ەكونوميكالىق شىعىن دا ايتارلىقتاي. بەلورۋسسيادا سوڭعى ءبىر ايدا شوشقا مەن سيىر ەتىنىڭ باعاسى ءۇش مارتە ءوستى. ەلدىڭ ەكونوميكا مينيسترلىگى مۇنىڭ سەبەبىن ىشتەگى باعانىڭ اسا ارزاندىعىمەن ءتۇسىندىرىپ وتىر. سىرتتاعى ساۋداگەرلەر اتالعان ەت تۇرلەرىن جوعارى باعاعا كوپتەپ ساتىپ الاتىندىقتان, ەل ىشىندە ەت تاپشىلىعى سەزىلە باستاپتى. سوڭعى قىمباتتاعاندى قوسا العاندا, بۇگىندە بەلورۋسسياداعى شوشقا مەن سيىر ەتىنىڭ باعاسى تەڭگەگە شاققاندا تيىسىنشە 425 جانە 415 تەڭگە شاماسىندا. ليتۆادا ەلدەگى «الباتروس» دەپ اتالاتىن ەكى L-39 وقۋ-اسكەري ۇشاعىنىڭ ءبىرى بالتىق جاعالاۋىنداعى ناتو ميسسياسىنىڭ قۇرامىنا كىرەتىن فرانتسۋزدىڭ جويعىش ۇشاعىمەن سوقتىعىسىپ قالدى. فرانتسۋز ۇشقىشتارى زاقىمدانعان ۇشاقتى قوندىرىپ ۇلگەرسە, «الباتروس» جەرگە قۇلاعان. ۇشقىشتارى امان. اۋعانستان تاۋلارىنىڭ بيىك شىڭدارىنىڭ ءبىرىن باعىندىرماق بولعان ەكى نەمىس ءتۋريسىنىڭ جوعالىپ كەتكەنىن بۇعان دەيىن حابارلاعان بولاتىنبىز. ەندى ولاردىڭ ۇرلاپ اكەتىلگەنى انىقتالىپ وتىر. بىراق وعان «تاليباننىڭ» قاتىسى جوق كورىنەدى. ينتەرنەت ماتەريالدارى نەگىزىندە ازىرلەندى.
