اتا زاڭ ۇلىقتالعان كەش

قازاق ءۇشىن باعا جەتپەس ەڭ باستى قۇندىلىق ەل تاۋەلسىزدىگى دەسەك, وسى ويدى ءار ازاماتتىڭ كوكىرەگىنە شا­شاۋسىز شەگەلەگەن مەملەكەتتىڭ مەرەيلى قۇجاتى – كونستيتۋتسيانىڭ ور­نى قاشاندا بيىكتەن سايلانۋى جارا­سىمدى. دالا تىرشىلىگىنىڭ وربۋىنە وزەك بولعان اتا زاڭدى اسقاق رۋحپەن اسپانداتقان دۋماندى كەش شىمىل­دى­عىنىڭ تاتتىمبەت اتىنداعى اكادە­ميالىق قازاق ۇلت اسپاپتار وركەس­ترىنىڭ ورىنداۋىنداعى نۇرعيسا ءتى­لەن­ديەۆتىڭ «ماحامبەت» سيمفونيا­لىق كۇيىمەن اشىلۋىنىڭ وزىندە ءۇل­كەن ءمان بار. ءدال بۇگىن قازاقتىڭ كەڭ دالاسى ازاتتىق اڭساپ وتكەن سول بۇ­رىنعى ماحامبەت سىندى ناركەسكەن بابالاردىڭ ءۇنىن قايتا جاڭعىرتىپ, ەلدىك پەن بىرلىكتىڭ تۋىن تىكتەپ جات­قانىن ناقىشتى بوياۋىمەن قاپىسىز بەدەرلەگەن كۇي قۇدىرەتى ەرەكشە اسەر­لەندىرەدى. كەشەگى ساز بەن بۇگىنگى ۇر­پاقتىڭ تىڭ سارىنى قاتار ورىلە كەلىپ, بويدى سەرپەر سەزىم بيلەيدى. وسى شالقىما كۇيدىڭ سوڭىنان م.ماقاتاەۆتىڭ سوزىنە جازىلعان ت.را­قىموۆتىڭ «قازاعىم-اي» ءانىن ەركىن شۇكىمانوۆتىڭ ورىنداپ شىققانى كۇللى تىڭدارماندى كۇمىس كومەي ءۇن­نىڭ سيقىرىنا بولەپ تاستادى. ك.بايسەيىتوۆا اتىنداعى ۇلتتىق وپەرا ءجا­نە بالەت تەاترىنىڭ ترۋپپاسى مىڭ بۇرالىپ «ايجان قىزدى» بيلەگەندە جازيرا دالا كوك كىلەمىن قۇلپىرا جايىپ تاستاعانداي كەلىستى كەستە ورنەك توكتى. ارتىنشا سارىارقانىڭ سازى سايىن بەلدى قۋالاپ, كەشەگى كۇننەن ءبىر ءۇن ءتىرىلىپ ءتىل قاتقانداي ەدى. ول بولات ەسىمحانوۆ ورىنداعان ءماديدىڭ ەل اراسىنا كەڭ تاراعان «قاراكەسەك» ءانى بولاتىن. جەكە ورىن­داۋشىنىڭ داۋىسىنا ب.باي­قاداموۆ اتىنداعى اكادەميالىق كاپەللا مەن استانالىق وپەرا جانە بالەت تەاترىنىڭ حورى قوسىلا ءوڭ بەرگەندە, بۇل شىعارما ءتىپتى ۇلكەن ساحنادا ورىندالاتىن كلاسسيكالىق ءىنجۋ-مارجانعا ۇقساپ كەتكەنى شىندىق. «دالا سازى» دەپ اتالاتىن ءان توپتاماسى قۇلاقتىڭ قۇرىش ەتىن قاندىرار ءتاتتى اۋەزدەرمەن سۋسىن­داتىپ, قازاقتىڭ حالىق اندەرىن بي­بىگۇل ساۋىتوۆا, انار قۇماروۆا, گۇل­دانا نوعايباەۆا, ۆەنارا قار­جاۋ­باەۆا, گ ۇلىم الشىنوۆا ناز تولى ناقىشپەن نارلەندىردى. جاس ورىنداۋشىلار نارۇل تويكەنوۆ پەن ەميل ەرعالي قازاقستان كومپوزيتورلارىنىڭ اندەرىنەن توپ­تا­مانى ۇسىنسا, ىلە-شالا وركەستر تۇركەشتىڭ «كوڭىل اشارىمەن» ءوز ونەرىن قورىتىندىلاپ شىقتى. ي.شتراۋستىڭ «جارقانات» وپەرەت­تا­سىنان ادەلدىڭ شۋماقتارىن ك.بايسەيىتوۆا اتىنداعى ۇلتتىق وپەرا جانە بالەت تەاترى سيمفونيالىق وركەسترىنىڭ (ديريجەرى – ايدار ءاب­جاقانوۆ) سۇيەمەلدەۋىمەن ورىنداعان ءمادينا يسلاموۆانىڭ, ا.جۇبانوۆ اتىنداعى رەسپۋبليكالىق مۋزىكا مەكتەبىنىڭ «اق تىلەك» بالالار حورىمەن بىرگە گ.پودەلسكي مەن ي.نازالەۆيچتىڭ «ليۋبليۋ تەبيا, موي كراي رودنوي» انىمەن شىققان كسرو حالىق ءارتىسى الىبەك دىنىشەۆتىڭ, اسكەري اندەردەن پوپۋرري ۇسىنعان مەدەۋ ارىنباەۆ, ايقىن جانە ءرۇس­تەم نۇرجىگىتتىڭ ونەرى كەش اجا­رىنا كوتەرىڭكى لەپ بەرگەندەي. ن.نازارباەۆ پەن ا.قورازباەۆتىڭ «سارىارقا» ءانىن ستەپانيدا باسيۋك, ناتاليا كوچكينا, اندرەي ترەگۋبەنكو مەن يگور بلاگودارنىي وزىندىك تالعاممەن وڭدەلگەن ۇلگىدە پاش ەتتى. ەسترادا ءانشىسى ءدىلناز احماديەۆا باستاپ شىققان جاستار توبى ي.گريبۋلينانىڭ «استاناسىن», داۋلەت, جاسۇلان مەن باقىتجان سىندى ءجاسوسپىرىم ورەندەر «اق تىلەك» پەن «ەلىگاي» بالالار حورىمەن  بىرگە ءا.ىسقاق پەن ا.احمەتبەك ۇلىنىڭ «كوك تۋدىڭ جەلبىرەگەنى» ءانىن, ازامات جىلتىركوزوۆ, باۋىرجان ءاندىر­جانوۆ پەن اندرەي ترەگۋبەنكو ق.ءجۇنىسوۆتىڭ «ەگەمەن قازاقستان» ءانىن پاتريوتتىق رۋحتا كوككە سام­عاتقاندا, اتا زاڭنىڭ قۇرمەتىنە توگىلگەن شۋاق ەلوردا ءتورىن ەڭسەلەندىرىپ جىبەرگەن. قاراشاش توقسانباي. سۋرەتتى تۇسىرگەن ورىنباي بالمۇرات.